Lemon Press-н ярилцлагын буланд Монтэ Гарден төслийг хэрэгжүүлж буй Астра Группийн Гүйцэтгэх захирал Т.Бат-Өлзийг урьж, Монголын тансаг зэрэглэлийн “хаус”-ын зах зээлийн өнөөгийн байдал болон хөрөнгө оруулалтын боломжийн талаар ярилцлаа. Хүлээн авна уу.

Ярилцлагаа Монтэ Гарден төслийг эхлүүлэх болсон шалтгаан болон төслийн танилцуулгаас эхэлье. 

Астра Групп тансаг зэрэглэлийн хаус хотхоны төсөл болох Монтэ Гарден төслөө 2022 оны намар эхлүүлж байсан. Төсөл эхлэхийн өмнө хамгийн түрүүнд бид хувийн хөрөнгө оруулалтаар 3 сарын хугацаанд хотхон руу орж, гарах 5 км хатуу хучилттай авто замыг ашиглалтад оруулсан. Шалтгаан нь бид барилгын ажил эхлэхийн өмнө тог цахилгаан, зам цаашлаад бусад дэд бүтцийн асуудлаа шийдэхийг чухалчилж байсантай холбоотой. Дэд бүтцийн асуудлаа шийдсэнээр төслийн үнэ цэнийг эхнээс нь нэмэгдүүлж, ирээдүйд ч үнэ цэнээ хадгалах зорилготой холбоотой. 

Байршлын хувьд Монтэ Гарден төсөл нь Богд Хан уулын Чулуутын аманд дангаар байрших 200 айлын хаус төсөл. Дангаар гэж онцолж буй шалтгаан нь тухайн уулын ам, цогцолбор газар зөвхөн Монтэ Гарден төслийн нэгдсэн зохион байгуулалт, нэгдсэн төлөвлөлт, нэгдсэн дэд бүтэцтэйгээр хэрэгжиж байгаа гэсэн үг. Яг ийм консепттой төсөл Монголд манайхаас гадна 1 л байдаг. 

Монголд нэгдсэн зохион байгуулалтгүй хаус хороолол, хотхон маш олон байдаг. Нэгдсэн зохион байгуулалтгүй байхын сул тал нь оршин суугчдын тав тух, аюулгүй байдлаас эхлээд дэд бүтцийн, нийгэм, эдийн засгийн, сэтгэл ханамжийн гэхчлэн эрээвэр хураавар олон асуудлыг дагуулж байдаг. 

Монголд хаусын хөгжил ямар явцтай явж байна гэж харж байгаа вэ? 

Цаг үеэ дагаад хүмүүсийн хэрэгцээ өөрчлөгдөж байгаатай холбоотойгоор орон сууц, амины орон сууцыг харах өнцөг ч ихээхэн өөрчлөгдлөө. Тухайлбал, 1990 онд зах зээлийн эдийн засагт шилжсэнээр хүмүүсийн орон сууцад орох, амьдрах анхдагч хэрэгцээ буцалж эхэлсэн. Орон сууцад орж л байвал  тэр нь 2 өрөө байх уу, 3 өрөө байх уу буюу зай талбай, бүр цаашлаад байршил ч төдийлөн чухал биш байсан цаг. Харин чөлөөт эдийн засагтай зах зээл тодорхой хэмжээнд хөгжиж, иргэд ч тодорхой хэмжээнд хөрөнгөжсөний дараагийн ээлжид утаа, түгжрэл багатай, цаг зав хэмнэсэн бүх үйлчилгээ төвлөрсөн байршилд үл хөдлөхтэй болох сонирхол нэмэгдсэн. Үүнд мэдээж төвлөрөл түүнийг дагасан түгжрэл голлон нөлөөлж буй.  

Цаашлаад, амьдрал нь чанаржиж, тодорхой хэмжээгээр хөрөнгөжсөн хүмүүсийн хувьд үл хөдлөх хөрөнгөө сайжруулах гол хөшүүрэг нь амар тайван байдал, эрүүл орчин, мэдээж байрны дотоод зохион байгуулалт, зай талбай, гаднах ногоон байгууламж, байршил, түгжрэл, хотхон доторх сургууль, цэцэрлэгийн хүртээмж, чанар чухал болчихсон. Энэ бүх хэрэгцээнд тулгуурлан Монголд хаусын эрэлт ч ихсэж байна.  

Хаусын хөгжлийн үе шат Монголд зуслан буюу бидний хэлж заншсанаар лагериас эхэлж, дараагаар нь өвөл, зун харгалзахгүй амьдрах боломжтой 4 улирлын хаус болон хөгжиж эхэлсэн. Гол сул тал нь хүмүүс цэвэр агаарт амьдрахын тулд хотоос гарах шаардлагатай буюу дор хаяж ирж очихын 2 цаг, заримдаа амралтын өдрүүдээр гэх мэтчилэн ихэнх цагаа зам дээр өнгөрүүлж буй. 

Анх төсөөлөхдөө ажлын орой болгон очиж хоноод өглөө ажилдаа явах амьдралын хэв маягийг төсөөлж байсан ч хотын түгжрэл бидэнд тийм завдал олгохгүй байна шүү дээ. Гэхдээ хүмүүсийн хотын захад лагерьтай болох сонирхол гагц Монголд дэлгэрч байгаа кейс биш шүү. Тухайлбал, амины орон сууцыг дотор нь үндсэн зориулалтаар нь 2 ангилдаг. Эхнийх нь “residential house” буюу амьдрах зориулалттай нөгөөх нь “vacation house” буюу амралтын өдрүүдээр очдог гэж 2 ангилчхаж байгаа юм. Лагерь, зуслангийн бүсийн хувьд ямар ч газар очсон хойноо гоё. Гэвч ирж, очно гэдэг нь өөрөө хамгийн том асуудал болчхоод байна. Үүнээс болж “vacation house”-н үнэ цэн буурч үхмэл хөрөнгө болсон кейс маш олон.

Харин энэ 2 ойлголтыг нэгтгэсэн төсөл бол Монтэ Гарден. Төслийг хэрэгжүүлж эхлэх болсон шалтгаан нь ч хот дотроо ч утаа, түгжрэлээс хол эрүүл орчинд амьдрах боломж олгох явдал байсан. Бидний төсөл захиалагч нарт ч үнэ цэнтэй хөрөнгө оруулалт болно гэдэгт маш итгэлтэй байдаг. Хотод амьдрах хамгийн том асуудал болсон түгжрэлээс эхлэн ярихад Шангрилагаас буюу хотын төв цэгээс Монтэ Гарден 17.4 км зайтай. Өөрөөр бол 19-39 минутын газар гэсэн үг. 

Америкт ямар нэг газрын хол, ойрыг хугацаагаар хэмждэг. Хэдэн минутын зайтай эсвэл хэдэн цагийн зайтай газар юм бэ буюу туулах замын урт биш, харин тэр замд зарцуулах хугацаа нь илүү чухал. Улаанбаатар хотод хэт түгжрэлтэй үед 3 км замыг 2-3 цаг туулах тохиолдол бишгүй их. Мэдээж 17 км-ийг 19-39 минутад туулна гэхээр худлаа сонсогдож магадгүй. Гэхдээ бид төслийн талбай руугаа түгжрэлтэй, түгжрэлгүй, амралтын, ажлын гэхчлэн өдөр бүр явдаг. Товчоор бол санаандаа орсон тоо бус өөрсдийн бодит туршлагаас тооцоолон гаргасан тоо гэсэн үг. 

Түүнчлэн гадагш, дотогш ажил, амьдралын шалтгаанаар тогтмол явдаг амьдралын хэв маягтай бизнес эрхлэгчдийн хувьд онгоцны буудлаас гэртээ харих зам нислэгийн хугацаанаас хамаагүй урт болчихсон. Харамсалтай хэдий ч бидний бодит байдал нь Бээжин, Улаанбаатар хот хооронд ирж, очиход 2 цаг 30 минут байхад онгоцны буудал болон гэрийн хооронд ирж очих гэж л 3 цаг гаруй хугацааг зарцуулж буй явдал. Тиймээс хотхоны орц, гарцыг Скай ресортын замаас цааш зөвхөн манай хотхонд очиж төгсөх байдлаар төлөвлөсөн. Мэдээж онгоцны буудал руу Зайсанг дайраад уулын замаар явах боломжтой ч маш их цаг зарцуулна. Харин Скай ресортооос цаашаа Шинэ Налайхын замаар дайраад Төв аймгийн урдуур явахад ямар ч түгжрэлгүй, нэмээд богино хугацаанд очиж байгаа нь давуу. 

Үргэлжлүүлээд хотхоны зохион байгуулалтын талаар хуваалцана уу? Төслийн зургийг харж байхад банк санхүүгийн үйлчилгээ болон цэцэрлэг, сургууль харагдаж байсан.

Тансаг зэрэглэлийн хотхонуудад бүх банк, санхүүгийн байгууллагууд ойртож үйлчлэхийг хичээдэг. Үүний тод жишээ хэд хэдэн хотхонд бий. Томоохон банк санхүүгийн байгууллагууд бүгд тэдгээр хотхонд VIP болон премиум салбаруудаа нээсэн байдаг. Үүний нэгэн адил манай төсөлд ч банк, санхүүгийн үйлчилгээнээс гадна хөрөнгө оруулалтын төвтэй. Хөрөнгө оруулалтын төвийн хувьд бид зуучлагчийн буюу зохицуулагчийн үүрэг гүйцэтгэх байдлаар оршин суугчид дундаа хөрөнгө оруулалтын комюнити үүсгэхээр зорьж буй. 

Үүн дээр нэмэлт тодруулга хэлэхэд, манай компани Монтэ Гарден төсөлд захиалга өгч буй хүмүүстээ тодорхой хэмжээний шалгуур тавьж байгаа. Өөрөөр бол зүгээр л мөнгөтэй хүн байх уу, эсвэл тодорхой хэмжээний шалгуурыг хангасан хүн амьдрах уу гэдэг нь сонин. Үл хөдлөх хөрөнгийн үнэ цэнд тухайн үл хөдлөх хөрөнгөд хамтран амьдарч буй хүмүүс, тэдний соёл ихээхэн  нөлөөлдөг. Энэ утгаараа хөршийн холбоо бол хамгийн чухал зүйл. Угтаа бид хамтаар амьдарч байгаа хотхон, орон сууцдаа эерэг, эерэг биш юм аа гэхэд сөрөг нөлөөгүй байх ёстой шүү дээ. Гэтэл одоо цагт хөршийн холбоо үнэхээр суларчихсан. 

Цаашлаад, хотхоны зохион байгуулалтад сургууль, цэцэрлэгийн үйлчилгээ мөн төвлөрч байгаа. Эрүүл, аюулгүй орчинд хүүхдээ сургах, үүнээс чухал зүйл нь сургууль, цэцэрлэг нь гэртээ ойрхон байх эцэг эхчүүдэд ямар их дэмтэй байдаг билээ дээ. Энэ утгаараа ийм орчныг бүрдүүлэх нь бидний гол фокус байсан. Хотхоны оршин суугчид, хүүхдээ хотхон доторх цэцэрлэг, сургуульд өгөх эсэх нь тэдний хүсэлтээс хамаарна. Одоогоор хотхон доторх сургууль, цэцэрлэгийн нэрийг зарлахад эрт байгаа ч сургалтын чанараараа тэргүүлэгч сургууль, цэцэрлэг байхын сацуу хотхон дотор “shuttle bus”-н үйлчилгээ нэвтрүүлэхийг дуулгахад таатай байна.

Мөн түүнчлэн Монтэ Гарден төсөлд нисдэг тэрэгний зогсоол, морины зүчээ байгуулахаар төлөвлөснөөрөө онцлог.  

Төслийн зорилтот худалдан авагчдын хэдэн хувь нь монгол хүмүүс, хэдэн хувь нь гадаад хүмүүс байгаа бэ? 

Одоогоор захиалагч нарын маань 5% орчим нь гадаадын иргэн харьяат хүмүүс. Бидний судалгаагаар гаднын хөрөнгө оруулагч нар Монголд ирээд амьдрах болон байрлах газрын сонголт маш цөөхөн байдаг юм билээ. Газарзүйн байршлын хувьд хамгийн ойроороо Хятадаас  цаашлаад Ойрх Дорнод буюу Арабын ертөнцийн иргэд нэлээн сонирхож байгаагаа илэрхийлсэн. Угтаа хүн л бол хүн. Үүнд гадаадын харьяат иргэн байна уу, монгол хүн байна уу тийм ч том нөлөөгүй. Харин төслийн багийнхны гол анхаарч буй зүйл нь хотхоны сайн хөршийн холбоог бүтээлцэх хүмүүсийн хандлага. 

Өдгөө Монголд хаусинг зах зээл хөгжиж байна. Төвлөрлийн хувьд амьдрах зориулалттай тансаг зэрэглэлийн хаусууд Хан-Уул, Баянзүрх дүүргүүдэд төвлөрч байна. Дан ганц амьдрахаас гадна түрээсийн өгөөж нь дунджаар 12% гэхчлэн ганц амьдрах бус хөрөнгө оруулалтын хэрэгсэл болоод хөгжих болж. Танай төслийг хөрөнгө оруулалтын чиглэлээр сонирхож хэр олон хүн байна? 

Мэдээж манай төсөл бол маш том төсөл буюу өндөр дүнтэй хөрөнгө оруулалт шаардаж байгаа. Энэ ч утгаараа бид худалдах, худалдан авах гэрээ бус хөрөнгө оруулалтын гэрээг захиалагч нартайгаа байгуулдаг. Захиалагч нар дунд маань хөрөнгө оруулалтын зорилгоор худалдан авч байгаа хүмүүс бол байгаа. Дээрээс нь үл хөдлөх хөрөнгийн үнэ цэнээ алдахгүй байх тал дээр манайх шиг уулын аманд дангаараа хэрэгжиж буй төсөл цөөхөн. Цаашид ийм төсөл хэрэгжих бололцоо ч хомс. Товчоор бол Монтэ Гарден төслийн давтагдашгүй бөгөөд орлуулшгүй байдал нь төслийн үнэ цэнийг хангалттай тодорхойлох байх. 

Нөгөө талд Монтэ Гарден шиг өргөн цар хүрээтэй, тансаг зэрэглэлийн хаус төслийн эрэлт хэр байдаг талаарх сонирхолтой судалгаа байвал хуваалцана уу? 

Одоогоос 10 жилийн өмнө  Монгол Улсад ойролцоогоор өндөр дүн бүхий худалдан авах чадвартай 10 мянган өрх байсан. Өнгөрсөн 10 жилийн хугацаанд хүн ам өссөн. Үүний дунд өнөө өндөр дүнтэй худалдан авалт хийх чадвартай хүмүүс ч нэмэгдсэн байгаа. Бизнесийн орчны хувьд ч дараагийн буюу II үеийнхэн хэдий тоглоомын талбарт гарч ирж байна. Өөрөөр бол томоохон шилжилтийн үе гэсэн үг. II үе гэлтгүй III үеийн залгамжлагчид ч маш ойрхон байгаа. Өдгөө тус 10 мянган өрх 30-40 мянга, дахиад 10 жилийн дараа энэ тоо 100 мянгад хүрэх тооцоолол байдаг. Тэгэхээр тансаг зэрэглэлийн хаус, хотхонуудын эрэлтийн хувьд цаашид ч өсөн нэмэгдэх төлөвтэй байгаа. Харин нөгөө талд яг одоо хэрэгжиж байгаа жинхэнэ утгаараа тансаг зэрэглэлийн хаус хотхоны төслүүд энэ эрэлтэд дүйх хэмжээнд бол биш байна гэж хардаг. 

Одоо төслийн архитекторын талаар ярилцъя. Бусад тансаг зэрэглэлийн төслөөс юугаараа онцгой болон яагаад энэ төслийг сонгох ёстой гэж?

Улаанбаатар хотын хэмжээнд хаус хотхоны амжилттай, амжилтгүй хэрэгжсэн олон төслүүд байна. Харин манай төслийн хувьд 10, 20 ч биш 200 айлын төсөл. Монтэ Гарден төслийн Ерөнхий архитектор нь Итали хүн. Тэр хүн маань анх төсөл эхэлж байхад 200 айлын яг ийм зэрэглэлийн, ийм хотхон, ийм цогцолбор гэдэг бол хотхон биш. Энэ бол “micro city” буюу бичил хот гэж байсан юм. Тиймээс бид нар бие даасан төлөвлөлттэй, нэгдсэн зохион байгуулалт буюу өнөө дэд бүтэц, нийгмийн болон нийтийн үйлчилгээ, бүх төрлийн анхдагч хэрэгцээг хангах үйлчилгээг нэвтрүүлэхээс аргагүй. 

Үндсэндээ хотхон дотроос хүн гарахгүй амьдрах боломжтой байж гэмээ нь бичил хот гэх утгадаа дүйнэ ээ дээ? Энэ нь манай төслийг бусдаас онцгой болгох хангалттай том шалтгаан болох болов уу. Монголд 200 оршин суугчтай тансаг зэрэглэлийн хотхон хэд байдаг билээ гээд хайхад судалгаагаар бол 3 гэж гарсан. 

Манай эхний ээлжийн 65 хаус энэ жил буюу 2025 оны III-IV улиралд багтаж бүрэн ашиглалтад орно. Дараагийн ээлж нь мөн энэ онд эхлээд дунджаар бол 2.5 жилийн хугацаатай үргэлжилнэ. Тэгэхээр 200 айл бүтнээрээ ашиглалтад орж дуустал ойролцоогоор 5 жилийг зарцуулах төлөвлөлттэй байна. Нийт төслөөр нь аваад үзэх юм бол 8 жилийн хугацаанд хэрэгжсэн төсөл болно гэсэн үг. Энэ хэмжээний болон ижил төстэй төсөл зарим тохиолдолд 20 шахуу жил хэрэгжсэн кейс ч байдаг. Миний хэлэх гээд буй санаа нь энэ төрлийн төслийн нэг сул тал нь амьдарч байгаа айлууд нь төсөл бүрэн ашиглалтад ортлоо байнга барилгын талбай дээр амьдардаг. Харин бид төслөө хэрэгжүүлэхдээ дээрээсээ буюу нэг захаас нь шахаж хэрэгжүүлж байгаа учраас эхний ээлжийн айлуудад ямар нэгэн байдлаар нөлөөлөхгүй, саад болохгүй. Барилгын талбайтай огтлолцохгүй болохоор тэр шүү дээ. Манай нийт төслийн урт л гэхэд 2 гаруй км. Тэгэхлээр бие биедээ саад болох магадлал маш бага. 

Төслийн өөр нэг онцлог бол яалт ч үгүй Итали архитекторын гараар бүтэж буй явдал. Онцлоод байгаа шалтгаан нь итали хүн, монгол хүн хаус төлөвлөлт хийхийн ялгааг бид өөрсдөө ч бие махбодоороо мэдэрч байна. Учир нь Монголд хаус хөгжөөд удаагүй. 20 гаран жил л болж байгаа байх. Яг үнэндээ төслийн зургийг зурж байгаа хүмүүс нь өөрсдөө ч хаусын талаар ойлголтгүй байхад хэрхэн хауст амьдрахын сайн, муу талыг мэдэх билээ. 

Харин нөгөө талд Европ ялангуяа Италид хаусын хөгжил хэдэн 100 жилээр яригдаж, хүмүүс нь ч  хэдэн үеэрээ хаусанд амьдраад үзчихсэн байна. Бидний төслийн зургийг зурж байгаа хүн төрөхдөө л хаусанд л төрчихсөн гэх утгаараа хаус төлөвлөлтөд юуг анхаарах ёстой вэ, гэдэг дээр А-Я хүртэл нь сайн мэдэж байхаас аргагүй л юм. 

Хүмүүс хаус гэхээр л том хэмжээтэй, тансаг байшин гэж ойлгодог. Гэхдээ сайн төлөвлөөгүй бол том байшин нэг их ач холбогдолгүй шүү дээ. Хаус төлөвлөлт гэдэг нь зөвхөн хэдэн өрөөг, ямар байршилтай төлөвлөх тухай асуудал биш, харин нарны тусгал, салхины чиглэл, орон зайн зохицол, хүний өдөр тутмын хэрэглээ гээд олон зүйлсийг бодолцох хэрэгтэй. Тансаг зэрэглэлийн хаусуудын хувьд унтлагын өрөө бүр өөрийн гэсэн ариун цэврийн өрөө, хувцасны хэсэгтэй байх нь стандарт болсон. Үүн дээр нэмээд мастер унтлагын өрөөнүүдийн зохион байгуулалт бас чухал. 

Ерөнхийдөө хаус төлөвлөхдөө "Day Area" буюу өдрийн бүс, "Night Area" буюу шөнийн бүс гэж хоёр хуваадаг. Өдрийн бүсэд зочны өрөө, гал тогоо, хооллох хэсэг багтдаг бол, шөнийн бүсэд унтлагын өрөө багтана. Гол зарчим нь нарны гэрлийг зөв ашиглах. Жишээ нь, манай төсөл зочны өрөө болон гал тогоо нь ихэвчлэн нар мандах, жаргах зүг рүү харсан том цонхтой байж, унтлагын өрөөнүүдийг илүү тайван, нам гүм орчин бүрдүүлэхээр төлөвлөсөн.

Монголд хүмүүс ихэвчлэн хэдэн өрөөтэй вэ, гэх асуултад "4 өрөө" гэх мэтээр хариулдаг ч олон улсын стандартаар хаусыг унтлагын өрөөний тоогоор л тооцдог. Манай төсөлд хамгийн багадаа 3 унтлагын өрөөтэй, хамгийн ихдээ 6 унтлагын өрөөтэй хаусууд бий. Мөн үүнээс гадна агуулах, угаалгын өрөө, техникийн өрөө гэх мэт нэмэлт орон зайг төлөвлөсөн. Хэмжээгээр нь харвал хамгийн жижиг хаус 310 м², хамгийн том нь 1200 м² хүртэл талбайтай.

Төслийн захиалга хэдэн хувьтай явж байгаа вэ? Түүнчлэн Астра Группийн хэрэгжүүлсэн онцлох төслүүдийн талаар уншигч нартай маань хуваалцана уу? 

Одоогоор манай төслийн эхний ээлж 85%-ийн борлуулалттай, бараг сонголтгүй болчхоод байна. Харин II үе шатны төлөвлөлт дуусах шатандаа орж байгаа бөгөөд эхний ээлжийн туршлагадаа тулгуурлан илүү сайжруулаад явна. Үүнээс анхаарах зүйл нь бид барилгын тодорхой үе шатанд хүрсний дараа захиалга авч эхэлдэг. Ингэснээр худалдан авагч талдаа ч найдвартай, баталгаатай сонголт болж өгдөг.

Манай групп Монголын барилгын салбарт олон жилийн туршлагатай. Соёмбо Тауэр буюу Монголын хамгийн өндөр барилгаас эхлээд бусад тансаг зэрэглэлийн төслүүд дээр ажиллаж ирсэн. Манай санхүүжилтийн тогтвортой байдал нь төслүүдийг найдвартай, богино хугацаанд дуусгах гол хүчин зүйл болдог. Өөрөөр хэлбэл манайх одоогийн байдлаар ямар нэгэн санхүүгийн хэрэгсэл ашиглаагүй, банк санхүүгийн зээлгүйгээр төслөө хэрэгжүүлж яваа. Өөрсдийн цэвэр хөрөнгө оруулалт болон захиалагч нарын хөрөнгө оруулалт дээр суурилсан бүтцээр төслүүдээ санхүүжүүлдэг. Үүнд мөн манай охин компаниуд буюу бизнес хоорондын синержи сайн байх нь ч ихээхэн нөлөөлж буй. 

Бидний ярилцлагад амьдралын чанар гэдэг ойлголт нэлээдгүй дурдагдлаа. Монтэ Гарден төслийн танилцуулга дээр захиалагчийн 6 хэрэгцээг хангасан төсөл гэж дурдсан байсан энэ талаар товч яривал? 

Амьдралын чанар гэдэг ойлголт хүний хөдөлмөрийн чадвар, санхүүгийн боломж сайжрахын хэрээр улам чухал асуудал болоод ирдэг. Монтэ Гарден төслийн хувьд ч биеийн эрүүл мэнд, сэтгэл зүйн эрүүл мэнд, санхүүгийн тогтвортой байдал, таатай хүрээлэл, ажил амьдралын тэнцвэр, хувь хүний хөгжил гэсэн гол 6  хүчин зүйлээр амьдралын чанарыг тодорхойлсон.

Монтэ Гарден төслийн гол зорилго бол эдгээр бүх хүчин зүйлсийг цогцоор нь бүрдүүлж, хангаж чадах тийм орчныг цогцлооход л оршиж байгаа. Байгальтай ойр, цэвэр агаартай, стрессгүй, эрүүл амьдрах орчин бүрдүүлж, хотын түгжрэл, дуу чимээ, бохирдлоос ангид, аюулгүй, тайван амьдрах орон зайг хэн хүсэхгүй байх билээ? Бидний өнөөдрийн хотын амьдрал олон талаараа “амьд үлдэх” горим дээр л явж байна. Хотын төвийн их хөл хөдөлгөөн, түгжрэл, амжих ёстой ажил, цаг хугацааны хомсдол хүн бүрийг ядаргаанд оруулж байгаа нь илэрхий. Монтэ Гарден төсөл бол Улаанбаатар хотын энэ хурдтай, зарим талаараа ядаргаатай амьдралын хэв маягаас холдож, амар амгалан, тайван, хүн өөрийн мөрөөдлийн амьдралаа бодитоор мэдрэх боломжтой орчин.

Үнэндээ бид хүн бүрийн хүсдэг тэр “үлгэрийн орныг” бүтээхийг зорьж байна. Бидний төсөл дээр ирж танилцсан нэг захиалагч маань “Уулын ам эргээд хотхон руу ороход үлгэрийн орон шиг юм” гэж уулга алдсанаа хэлж байсан. Энэ бол зүгээр нэг үг биш, харин бидний бий болгож буй амьдралын чанарын бодит илэрхийлэл юм.

Бид таны мөрөөдлийн амьдралыг бодит болгохыг хүсэж байна. “Монтэ Гарден” танд чанартай амьдралыг санал болгоно гэх үгээр ярилцлагаа дуусгах нь зүйтэй санагдаж байна.

Цаг гарган ярилцсанд баярлалаа. 

Баярлалаа.