Камбожийн Үйлдвэрлэл, шинжлэх ухаан, технологи, инновацын яамны Шинжлэх ухаан, технологи, инновацын газрын дарга болон албаны бусад хүмүүс Сократус Стартап Студиогийн гарааны бизнес, ЖДҮ-ийг бойжуулах, дэмжих хөтөлбөр, монголын шинжлэх ухаан, гарааны бизнесийн экосистемийн оролцогч талуудын үйл ажиллагаатай танилцах, цаашлаад хамтын ажиллагаагаа өргөжүүлэх чиглэлээр харилцан санал солилцох 5 өдрийн сургалт, хэлэлцүүлгийн арга хэмжээ боллоо. 

Тус арга хэмжээг Азийн Бүтээмжийн Байгууллага, Монголын Бүтээмжийн Төв дэмжиж хамтран ажиллаа. Камбожийн талаас цаашдын хамтын ажиллагааг өргөжүүлэх, Камбожийн гарааны бизнес, ЖДҮ-ийг хөгжүүлэхэд Сократус Стартап Студиогийн хөтөлбөрийг хэрэгжүүлэх саналыг тавьсан ба талууд дараах чиглэлээр хамтран ажиллахаар харилцан тохиролцож хамтын ажиллагааны санамж бичиг байгууллаа. 

• Камбожийн стартап экосистемд системийн инженерчлэлд суурилсан бойжуулах хөтөлбөрийг нэвтрүүлэх замаар Камбожийн гарааны бизнес, ЖДҮ-ийг хамтран бойжуулах
• Хоёр улсын гарааны компаниудыг хоёр улсын зах зээлд нэвтрэхэд дэмжих
• Камбожийн гарааны бизнесийн экосистемийг хөгжүүлэхэд шаардлагатай хууль эрх зүйн орчны судалгаа хийх, зөвлөхөөр ажиллах зэргээр хамтран ажиллана.

Мөн Азийн Бүтээмжийн Байгууллага Сократусын бүтээсэн арга аргачлал, хөтөлбөр, экосистемийн жишиг загварыг гишүүн улс орнуудад түгээн дэлгэрүүлэх чиглэлээр хамтран ажиллах сонирхлоо илэрхийлсэн байна. 

Өнгөрсөн оны 11-р сард Сократус Стартап Студио Камбожийн тус яамны урилгаар "Стартапын экосистемийг системийн инженерчлэлд суурилсан загвараар амжилттай бүтээх нь" сэдвийн хүрээнд 5 өдрийн сургалтыг тус яамны мэргэжилтэн, бизнес эрхлэгчдэд зохион байгуулжээ.

Ташрамд дурдахад, Сократус нь дотоодын 21 гарааны компани, ЖДҮ-үүдэд ₮4 гаруй тэрбумын үнэлгээ бүхий хөрөнгө оруулалтыг хийж, бойжуулах хөтөлбөртөө хамруулаад байгаа бөгөөд тэдний төгсөгчдөөс цахим сургалтын платформ хөгжүүлэгч www.melearn.mn, англи хэл сургалтын Neolingo app, STEAM сургалтын агуулга, арга зүй хөгжүүлэгч Шимт Боловсрол, Янзтай брэндийн ясны шөл үйлдвэрлэгч Гарааны Эс Ти Эс Фүүдс зэрэг компаниуд зах зээлд үйл ажиллагаагаа амжилттай явуулж байна.   

Эх сурвалж: Сократус Стартап Студио