Нэг жилийн хугацаанд түр завсарласан “Код бичих охидын хөтөлбөр” энэ жил дахин зарлагдлаа. Тус хөтөлбөрийн бүртгэл 4 сарын 25-наас 5 сарын 17 хүртэл үргэлжлэх юм.

Тус хөтөлбөрийг Цахим хөгжил, харилцаа холбооны дэд сайд асан, SpaceX компанийн стратеги хариуцсан менежер Б.Болор-Эрдэнэ 2020 онд санаачилсан юм. Өдгөө тус хөтөлбөрөөр дамжуулан 80 охин код бичих ур чадварыг эзэмшсэн юм. 

3 дахь жилдээ зохион байгуулагдах гэж буй тус хөтөлбөрийн ивээн тэтгэгчээр Энержи Ресурс ХХК, НҮБ-ын Хүүхдийн сан, Голомт банк, Нано Интернэйшнл, ОНДО ХХК зэрэг байгууллагууд ажиллаж байгаа бол дэмжигч байгууллагаар Боловсрол, шинжлэх ухааны яам болон Монгол Улсын их сургууль ажиллаж байна. 

Энержи Ресурс ХХК-ийн хувьд нийгмийн хариуцлагынхаа хүрээнд өөрсдийн үйл ажиллагаа явуулдаг Өмнөговь болон Баянхонгор аймгаас тус бүр 5 охиныг дэмжиж ажиллахаа илэрхийлсэн бол НҮБ-ын Хүүхдийн сангаас нийслэл хотоос оролцох охидыг дэмжиж, ажиллахаа илэрхийлсэн. Тодруулбал, доорх сургуулиас бид энэ жил нийслэл хотын охидын сонгон шалгаруулалтыг хийнэ. Иймд доорх дурдсан сургуулийн охид идэвхтэй бүртгүүлэхийг уриалж байна. 

• БЗД-ийн 14 -р сургууль 
• СБД-ийн 29-р тусгай сургууль
• СБД-ийн 16-р сургууль
• СБД-ийн 131-р сургууль
• ЧД-ийн 57-р сургууль
• ХУД-ийн 89-р сургууль
• БГД-ийн 47-р сургууль
• СХД-ийн Өнөр цогцолбор сургууль
• СХД-ийн 74-р сургууль
• СХД-ийн 151-р сургууль

Түүнчлэн энэ жилийн “Код бичих охидын хөтөлбөр-2024”-т салбартаа манлайлж буй залуучууд ментороор ажиллана. Тухайлбал, Tesla-н инженер Э.Жавхлан, Оксфордын их сургуульд сансар судлал, өгөгдлийн шинжлэх ухаанаар докторын зэрэг хамгаалж буй Б.Марал, OpenAI компанийн Бодлого хариуцсан захирал Никола, Google-н хиймэл оюун ухааны ахлах судлаач М.Цэндсүрэн, Samsung группийн менежер Р.Эрдэнэтулга болон Нано Интернэйшнл группийн Гүйцэтгэх захирал Б.Бүжинлхам нар энэ жилийн хөтөлбөрт хамрагдах 30 оролцогчын ментороор ажиллана. 

Хөтөлбөрт хамрагдах охидыг 3 шатны сонгон шалгаруулалтаар сонгоно. Үүнд: 

1. Анкетын түвшний шалгаруулалт;
2. Математик болон англи хэлний онлайн шалгалт;
3. Ярилцлагын шалгаруулалт.

Тавигдах шаардлага: 

1. Алслагдсан орон нутагт амьдардаг байх;
2. ЕБС-ийн 10-12 ангийн сурагч байх;
3. Англи хэлний анхан шатны мэдлэгтэй байх;
4. Ачаалал даах чадвартай байх;
5. Зуны амралтын хоёр сарыг код бичих сургалтад зарцуулах сонирхолтой байх;
6. Цаашид мэдээллийн технологийн чиглэлээр суралцах сонирхолтой байх;
7. Эцэг эх нь 2 сарын хугацаанд Улаанбаатар хотод вакумжуулсан сургалтад хамрагдахыг зөвшөөрсөн эсэх.

Дээрх шаардлагыг хангасан охид 4 сарын 25-наас 5 сарын 17-ны хооронд энэ ФОРМ-оор бүртгүүлнэ үү. 

Холбоо барих хаяг: [email protected] болон сошиал сувгийн чатаар холбогдоно уу. 

Эх сурвалж: Girlscode.mn