Одоогоор ипотекийн зээл авсан 136.5 мянган зээлдэгч байгаа. Харин энэ тоог ирэх онд 14 мянгаар нэмнэ гэнэ. Хэрэв үнэхээр тэгж нэмбэл ипотекийн зээлд хамрагдагчдын тоо түүхэндээ анх удаа 150 мянгыг давна. 

🤡 Поп ЕС-ын 9 шийдвэрийн дор

Өчигдөг Ерөнхий сайд маань 9 шийдвэр гаргахдаа ирэх онд нийт 16 мянган өрхийг орон сууцтай болгоно гэв. Үүнээс 14 мянган өрхийг ипотекийн 6%-ийн зээлд, харин 2 мянган өрхийг түрээслээд өмчлөх хөтөлбөрт хамруулах аж. Мөн төрөөс барьж буй 4,000 орон сууцны урьдчилгаа төлбөрийг 30%-иас 15% болгон бууруулахаар төлөвлөсөн гэнэ дээ.

🤕 Дунджаас дээгүүр нэмэлт

2018 оноос хойш ипотекийн зээлд хамрагдагсдын тоо жилд дунджаар 4.8% нэмэгдсэн байдаг. Харин ирэх жилд нэмэгдэх дүн дунджаас 5.5 нэгж хувиар өндөр байгаа юм. Тоон талаасаа харвал энэ шийдвэрийн хамгийн том давуу тал нь орон сууцны зээлийн хүртээмжийг огцом нэмэгдүүлнэ. 

• 📌 Гэхдээ энд нэг эрсдэл бий: Ипотекийн зээлд хамрагдах боломжтой хүний тоог нэмэх нь өөрөө орон сууцны нийлүүлэлтийг нэмэхгүй. Эрэлт огцом өсөж, харин шинэ орон сууцны нийлүүлэлт түүнтэй ижил хурдаар нэмэгдэхгүй бол байрны үнэ өсөх дарамт үүснэ.
• ⚠️ Өсөлтийн баримт: Ипотекийн зээлдэгчдийн 73.6% нь Улаанбаатарт байгаа бөгөөд шинэ орон сууцны үнэ Улаанбаатарт 2022 оноос 46.9% өссөн. Энэ утгаараа 1 зээлдэгчид ногдох ипотекийн зээлийн үлдэгдэл тус хугацаанд 59.2% нэмэгдсэн байгаа юм.  
• ☢️ 50% буурах дээр: Нэмээд урьдчилгааг 50% бууруулах нь анх харахад том дэмжлэг. ₮300 саяын байрны урьдчилгаа ₮45 сая болж буурна. Гэхдээ урьдчилгаа багасах тусам зээлийн үндсэн дүн өснө. Тиймээс бодлогын зорилго зөвхөн илүү олон хүнд байртай болгох биш өрхийн орлого, зээлийн эргэн төлөлтийн чадвартай уялдсан байх шаардлагатай.

Эцэст нь… Хаа сайгүй үнэ өсөж байгаа энэ үед попорсон шийдвэрээс илүүтэй эрэлт, нийлүүлэлттэй хамааруулсан шийдвэр хэрэгтэй байна. Энэ шийдвэрийн 16 мянган өрх байртай болсон гэдгээр хэмжих хангалтгүй. Байрны үнэ хэр өссөн, өрхийн өрийн дарамт хэр өөрчлөгдсөн, шинээр баригдсан орон сууцны нийлүүлэлт хэдээр нэмэгдсэн, мөн орон сууцны бодит хүртээмж сайжирсан эсэхийг хамтад нь харах хэрэгтэй.