Монгол Улсын тогтвортой санхүүгийн зах зээлийг дэмжих, ажлын байр бий болгохын зэрэгцээ хөрвөх чадварыг нэмэгдүүлэх зорилгоор ОУСК-аас Монгол Улсад анх удаа хамгийн том арилжааны банк болох ХААН Банкны гаргаж буй нийгмийн бондод $100 сая хүртэлх хөрөнгө оруулалтыг хийж байна.

Бондын нийт дүн нь $130 сая хүртэл байх бөгөөд үүнээс $30 саяыг боломжит бусад хөрөнгө оруулагчдаас татан төвлөрүүлэх юм. Энэхүү 3 жилийн хугацаатай нийгмийн бонд нь Олон улсын хөрөнгийн зах зээлийн холбоо (ICMA)-ны Нийгмийн бондын зарчмуудыг мөрдөнө. ОУСК-ийн зүгээс ХААН Банканд нийгмийн бондын хүрээг боловсруулахад туслалцаа үзүүлсэн бөгөөд үүнийг хөндлөнгийн дүгнэлтээр баталгаажуулжээ. Бондын хөрөнгийг эрүүл мэнд, боловсрол, хүнс, ХАА, нэн шаардлагатай дэд бүтэц, орон сууцны төслүүдийг санхүүжүүлэхэд зарцуулах бөгөөд  Монгол Улсад үйл ажиллагаа явуулж буй жижиг компаниудын дийлэнх хэсгийг эзэлдэг эмэгтэй эзэнтэй, хөдөө орон нутагт үйл ажиллагаа явуулдаг бичил, жижиг, дунд үйлдвэрүүд (БЖДҮ)-ийг хөгжүүлэхэд чиглэнэ.

Хэдийгээр БЖДҮ-үүд нь Монгол Улсын нийт ажиллах хүчний 72%-ийг хамарч, ДНБ-ний 17.8%-ийг бүрдүүлж байгаа хэдий ч санхүүжилтийн асуудалтай тулгарсаар байна. Дэлхийн банкны аж ахуйн нэгжийн судалгаа (2019)-нд мэдээлснээр судалгаанд хамрагдсан Монгол компаниудын 31% нь зээлийн бүрэн хязгаарлалтад орсон байгаа нь Зүүн Ази, Номхон далайн бүс нутгийн бусад орнуудын дунджаас өндөр байна. Үүний хариуд Монгол Улсын Засгийн газар БЖДҮ-ийг бэхжүүлэхэд онцгой анхаарч байгаа бөгөөд ажилгүйдлийн түвшин өндөр, хөдөлмөрийн оролцоо доогуур байгаа энэ нөхцөлд ажлын байрыг олноор бий болгож тогтвортой өсөлтийг хангах, уул уурхайн хамаарлыг багасган, эдийн засгийг төрөлжүүлэх зорилт тавин ажиллаж байна.

Монгол Улс 2023 онд тогтвортой хөрөнгө оруулалтын санхүүжилтийг нэмэгдүүлэх зорилгоор Тогтвортой Хөгжлийн Зорилт (ТХЗ)-уудын Санхүүжилтийн таксономийг боловсруулж, мэдээлэл, харилцаа холбооны технологи, эрүүл мэнд, боловсрол, соёл, хямд төсөр суурь дэд бүтэц зэрэг 4 салбарыг нийгмийн санхүүжилтийн ангилалд нэмсэн. 2030 он гэхэд ТХЗ-уудад хүрэхийн тулд Монгол Улсад нэмэлт $43 тэрбумын санхүүжилт шаардлагатай гэж сүүлийн тайланд тооцоолсон байна. Нийгмийн бонд бол энэхүү ТХЗ-ын Санхүүжилтийн таксономийг эхлүүлэхэд дэмжлэг үзүүлэх зорилгоор тус улсад гаргаж буй анхны үнэт цаас юм.

“Бид бүхэн Монгол Улсаас анхлан Нийгмийн бонд гаргаснаар цаашид нийгэмд эерэг өөрчлөлт, үр ашгийг бий болгох чухал ач холбогдол бүхий төсөл, хөтөлбөрүүдийг тусгайлан  дэмжинэ. Ингэснээрээ улсынхаа хамгийн том банкны хувьд зорилтот салбарын санхүүгийн хүртээмжийг нэмэгдүүлэх, эдийн засгийн чадавхийг бэхжүүлэх, байгаль орчны тогтвортой байдлыг дэмжих замаар эерэг үр нөлөөг бий болгоход үлгэр жишээ үзүүлж байгаадаа баяртай байна” хэмээн ХААН Банкны Гүйцэтгэх захирал Р. Мөнхтуяа онцоллоо.

ОУСК нь ХААН Банкны 2023 онд гаргасан Монголын анхны ногоон бондод хөрөнгө оруулж байсан бөгөөд үүний хүрээнд уур амьсгалын санхүүжилтийг нэмэгдүүлэх зорилт бүхий зөвлөх үйлчилгээг үзүүлэн хамтран ажиллаж байна. Түүнчлэн, ОУСК-аас ЖДҮ-ийг дэмжих зорилгоор Хаан банканд $130 саяын зээлийг мөн олгож байсан билээ. 

“ОУСК нь нийгмийн үнэт цаас анхлан гаргагчдын нэг төдийгүй ийм санхүүгийн хэрэгслийг хөгжүүлэх чиглэлээр тэргүүлэгчийн хувьд ХААН Банкийг анх удаа Нийгмийн бонд гаргахад нь шаардлагатай дэмжлэг үзүүлж ажилласандаа баяртай байна. Энэхүү хөрөнгө оруулалтаар дамжуулан ОУСК нь зах зээлийн тэргүүлэгч тоглогч ХААН Банканд шаардлага хангасан нийгмийн төслүүдэд санхүүжилт татах боломж олгохын зэрэгцээ цаашид Нийгмийн бонд нь Монголын хөрөнгийн зах зээлд урт хугацаат санхүүжилтийн шинэ төрөл болон бэхжих суурийг эхлүүлж байна” гэж ОУСК-ийн Монгол дахь суурин төлөөлөгч Руфат Алимарданов цохон тэмдэглэв.

Сүүлийн 10 жилийн хугацаанд ОУСК нь Монгол Улсад тогтвортой санхүүжилтийг хөгжүүлэхэд тогтмол дэмжлэг үзүүлсэн. Тухайлбал, арилжааны банкуудад тавигдах байгаль орчин, нийгмийн эрсдэлийн удирдлагын шаардлагуудыг боловсруулж, нэвтрүүлэхэд тусалснаас гадна Японы засгийн газрын санхүүжилтээр Монгол Улсын Ногоон бондын зохицуулалт, удирдамжийн баримт бичгийг боловсруулахад туслалцаа үзүүлж, дотоодын зах зээлд ногоон бонд гаргах боломжийг нээсэн юм.

ОУСК нь анх 2017 онд Нийгмийн бондын хөтөлбөрийг хэрэгжүүлж эхэлснээс хойш нийт $8 тэрбум гаруй дүн бүхий 92 нийгмийн бондыг, 14 төрлийн валютаар дамжуулан гаргажээ.

Эх сурвалж: Олон улсын санхүүгийн корпораци