Гадаад, дотоодын олон компаниуд ээлж дараалан тайлангаа гаргасаар. Энэ удаад Ариг банкны 2022 оны үр дүнг тоймлоё. Тэдний үзүүлэлт нэлээд өссөн сурагтай. Нийт актив нь л гэхэд 153% өсөж ₮260.5 тэрбумд хүрчээ.

Санхүүгийн сонин сайхан

Тус банкны цэвэр зээлийн хэмжээ 471% өсөж ₮94.6 тэрбум болсон аж. Харин тэдний чанаргүй зээлийн хэмжээ 5.8% буурсан байна. Мэдээж зээл олголт нь нэмэгдсэн тул орлого, ашиг нь ч дагаад өсөв. Тодруулъя,

• 25 жилийн ой = 2.5x: Ариг банкны 25 жилийн ой өнгөрсөн жил тохиосон. Тэгвэл тэдний хүүгийн орлого тус онд 2.5 дахин өсөж ₮15.9 тэрбум болсон байна.
• Ногооров: 2021 онд ₮3.4 тэрбумын алдагдал хүлээгээд байсан тэд өнгөрсөн жил орлогын өсөлтөөс үүдэн ₮7.6 тэрбумын ашигтай ажиллажээ. 
• Тэлэлт: 2021 онд тэдний нийт харилцах, хадгаламжийн хэмжээ ₮34.4 тэрбум байсан бол 80% өсөж ₮61.9 тэрбумд хүрсэн аж. Түүнчлэн тэдний хадгаламжийн хүү өсөж 13.5%-д хүрээд буй. 

Оныг онцлох нь

Үргэлжлүүлээд Ариг банкны 2022 оны онцлох үйл явдлуудыг харъя. 

• ₮100 тэрбум: Тэдний өөрийн хөрөнгийн хэмжээ Монголбанкны тавьсан зорилтот хэмжээнд хүрч ₮100 тэрбум болсон юм. Ингэснээр эрсдэл даах чадвар нь нэмэгдсэнээс гадна төлбөрийн чадвар нь ахисан хэрэг. 
• Бүтээгдэхүүн: Түүнчлэн тэд шаталсан хүүт хадгаламж, автомашин барьцаалсан бизнесийн зээл, ханган нийлүүлэгчийн зээл зэрэг шинэ бүтээгдэхүүн үйлчилгээ үзүүлж эхэлсэн. Эдгээр дээр нэмээд Arig Online апп-ийг зах зээлд нэвтрүүлэв. 

Эцэст нь… Санхүүгийн зах зээлд эзлэх байр сууриа тэлж, технологид суурилсан дижитал банк болохыг зорьж буй тэдний 2022 оны үр дүн иймэрхүү байлаа.