Алсын хараа-2050 амжилттай хэрэгжихийн цагт энэ мэдээг уншиж буй та бидний нас аль хэдийн явсан байх нь тодорхой. Энэ онд дэлхийн +65 насныхан 857 сая байгаа ч 2050 он гэхэд 2 дахин нэмэгдэх тооцоотой. Тэгвэл одоогийн тэтгэврийн тогтолцоо 2050 оны энэ өсөлтөд бэлэн үү?

🌎 Судалгаа тайлан 

Allianz-н судалгаанд дэлхийн 71 орны тэтгэврийн тогтолцооны бэлтгэлтэй, тогтвортой, ил тод байдлыг илтгэх Allianz Pension Index (API)-н дундаж оноо 3.7 буюу дийлэнх улсын тэтгэврийн сангийн тогтолцоо хангалтгүй үнэлэгджээ. Тэргүүлэгчдийн хувьд Дани, Нидерланд, Швед гэх мэт өндөр хөгжилтэй улсууд орох нь мэдээж. Харин сүүл мушигсан орнуудад Шри Ланка, Малайз, Лаос багтав. Энэхүү судалгаанд манай улсыг оролцуулаагүй ч хэрэв оруулсан бол эхний 71-т орох нь эргэлзээтэй.

👴🏻 Сард авдаг тэтгэвэр

Тэтгэврийн тогтолцоо нь хөгжсөн орны иргэд сард дунджаар $1,200-оос $2,800 хүртэлх тэтгэврийн авдаг бол хөгжиж буй орнуудад $100-оос $500 хооронд хэлбэлзэж байна. Урт хугацааны хуримтал, өндөр өгөөж, сайн зохицуулалт зэрэг нь тэтгэврийн тогтолцооны хөгжилд чухал. Манай улсын хувьд жил бүр тэтгэврийн хэмжээ инфляцаас хамаарч нэмэгдэхээр хуульд тусгагдаж, энэ жилээс тэтгэврийн дундаж хэмжээ ₮787 мянга буюу $220 болов.  

🇲🇳 Нөхцөл байдал

2024 онд НДС-гийн орлого өмнөх оноос 29.1% өсөж ₮5.6 их наядад хүрсэн бол зарлага 33.3% нэмэгдэж ₮5.4 их наядад хүрчээ. Тэтгэврийн даатгалын сангаас жилийн эцэст 509.5 мянган хүнд ₮4.7 их наядыг олгож, тэтгэвэр авагчид 12.5 мянгаар, тэтгэврийн хэмжээ ₮1 их наядаар тус тус өссөн аж. Манай улсын нийгмийн даатгалын тогтолцоо дорвитой шинэчлэл хийлгүй удлаа. Эртхэн арга хэмжээ авахгүй бол хэцүү дээ. 

Эцэст нь… Тэтгэврийн тогтолцоо дээр ямар нэг шийдэл, реформ бидэнд агаар ус шиг л хэрэгтэй байна. Өнөөдөр орой 20:30 цагаас NTV-н Анализ шоу - Засаглал ба Зах зээл нэвтрүүлэг дээр энэ асуудлыг хариуцах салбарын сайд маань НД-ын хуулийн шинэчлэл, тэтгэврийн реформын тухай ярилцах нь. Сувгаа тааруулаад юу ярихыг нь чих тавин сонсъё доо.