Өнгөрсөн 7 хоногт Монголын Хөрөнгийн Бирж (MSE)-д бүртгэлтэй томоохон компаниудын хувьцааны үнэ дээшээ хөдөлж зах зээлийн үнэлгээ түүхэн дээд түвшиндээ хүрсэн. Улмаар Монгол Улс ₮3 их наяд давсан үнэлгээтэй 2 компанитай болоод байна. 

• 🤩 ТОП-20 ба рекорд: Өнгөрсөн 7 хоногт ТОП-20 индексийн компаниудын 12-ийнх нь хувьцааны үнэ дунджаар 6.6% өсжээ. Харин 8 компанийнх дунджаар 2.1% буурсан аж. 

🤑 ₮3 их наядын сунгаа ба Таван толгой ХК 

Зах зээлийн үнэлгээний өөрчлөлтийг Таван толгой ХК (TTL) дангаараа манлайллаа. Тус компанийн хувьцааны үнэ ердөө ганцхан 7 хоногийн дотор 37.7% огцом өсөж зах зээлийн үнэлгээ нь ₮3.2 их наядад хүрснээр ХААН Банк (KHAN)-ийг гүйцэж, МХБ-ийн хамгийн өндөр үнэлгээтэй компани боллоо. Ингэснээр манай зах зээл түүхэндээ анх удаа ₮3 их наядаас дээш үнэлгээтэй 2 гигант компанитай болж байна.

📈 Өсөлт ба бууралтыг чиглүүлэгчид 

ТОП-20 индексээс өссөн 12 компанийн эгнээг Монголын Хөрөнгийн Бирж болон Голомт Банк (GLMT) үргэлжлүүлсэн бол ХасБанк (XAC), Монложистикс Холдинг (MLG)-ийн хувьцааны үнэ ч нэлээд өсөв.

• 🏦 Банкны нөлөө: Банкны салбарын ТОП тоглогчид хөрөнгө оруулагчдыг татах гол хүч хэвээр байж, ₮1 их наядын үнэлгээний босго давсан 4 компанийн 3-ыг ТОП-3 банк бүрдүүлж байна. 
• ⬇️ Харин ₮1 их наядын клубт багтдаг АПУ (APU)-гийн хувьцааны үнэ 6.7% буурсан нь энэ 7 хоногийн хамгийн өндөр уналт болов. Түүнчлэн Эм Жи Эл Акуа (MGLA), Улсын их дэлгүүр (UID), Түмэн Шувуут (TUM) зэрэг компаниудын хувьцаа унажээ.

Эцэст нь... ТОП-20 индексийн нийт үнэлгээ ийнхүү түүхэн рекорд тогтооход уул уурхай болон банкны салбарын идэвхжилт гол хөдөлгүүр боллоо. Томоохон компаниудын санхүүгийн чадавх бэхжиж, хөрөнгө оруулагчдын итгэл өндөр байгаа нь дотоодын хөрөнгийн зах зээл шинэ чанарт шилжиж байгааг илтгэж байна.