Бид олон нийтэд нээлттэй компаниудын хувьцаа эзэмшигчдийн хурлаар яригдсан зүйлсийг уншигчдадаа ойлгомжтой, дэлгэрэнгүй хүргэх зорилгоор “LP Transcript” буюу хурлын тэмдэглэлийн контент гаргадаг билээ. LP Transcript-н ээлжит дугаараар Бодь Даатгал ХК (BODI)-ийн хувьцаа эзэмшигчдийн хурлын (ХЭХ) тэмдэглэлийг хүргэж байна. Тухлан сууж, таалан уншина уу! 

📅 2026 оны 4 сарын 20
⏲ 11:00 минут
📍 Цахим хурал

Бодь Даатгал ХК-ийн 2026 оны ээлжит ХЭХ-ыг ТУЗ-ийн дарга Б.Билэгт нээж үг хэлэв. Ингэхдээ тэрээр ХЭХ-даа оролцсон нийт хувьцаа эзэмшигчдэд талархал илэрхийлж, энэхүү ХЭХ-ыг даргалах Бодь Даатгал ХК-ийн Гүйцэтгэх захирал А.Энхжаргалыг урилаа.

Гүйцэтгэх захирал А.Энхжаргал

ТУЗ-ийн Б.Билэгт даргадаа баярлалаа. Бодь Даатгал ХК-ийн нийт хувьцаа эзэмшигчид, ТУЗ-ийн дарга, бусад гишүүд болон хуралд оролцож буй нийт хүмүүст энэ өдрийн мэндийг хүргэе. Бодь Даатгал ХК-ийн ХЭХ албан ёсоор 11 цаг 28 минутад эхэлж байна. Хурлын дарааллын дагуу хурлын ирцийг бүртгэх үйл ажиллагааг эхлүүлнэ үү хэмээн тооллогын комиссыг урьж байна.

Тооллогын комиссын дарга Х.Сарангоо

Нийт хувьцаа эзэмшигч та бүхэнд энэ өдрийн мэндийг хүргэе. 2026 оны 4-р сарын 20-ны өдрийн Бодь Даатгал ХК-ийн ХЭХ-ийн хурлын тооллогын комиссын тогтоол гарсан байна. Дугаар №1 Улаанбаатар хот. Компанийн тухай хуулийн 67, 69.1, 69.2 болон Бодь Даатгал ХК-ийн дүрмийн 4.7, Бодь Даатгал ХК-ийн ХЭХ-ын тооллогын комиссын дүнг үндэслэн тогтоох нь. 

1. Бодь Даатгал ХК-ийн хувьцаа эзэмшигчдийн ээлжит хуралд 205,510,132 ширхэг энгийн хувьцаа эзэмшиж буй 26 хувьцаа эзэмшигч оролцож нийт саналын эрх бүхий 231,931,348 ширхэг хувьцааны 88.61% болж байгааг хуралд оролцогчид болон хурлын даргад мэдээлсүгэй. 
2. Компанийн тухай хуулийн 69.1. 69.2 дахь заалт Компанийн дүрмийн 7.4 дэх заалтыг үндэслэн нийт саналын эрхтэй энгийн хувьцааны 88.61%-ийн хувьцаа эзэмшигчид хуралд оролцож байгаа тул компанийн хувьцаа эзэмшигчдийн ээлжит хурлыг хүчин төгөлдөрт тооцсугай.

Гүйцэтгэх захирал А.Энхжаргал

Тооллогын комиссын багтаа баярлалаа. Ингээд хурлын ирц маань бүрэн бүрдсэн, хүчин төгөлдөр байх тул ХЭХ-ыг албан ёсоор нээснийг та бүхэнд мэдэгдье. Тиймээс хурлыг даргалагч Гүйцэтгэх захирал А.Энхжаргал миний бие өнөөдрийн хурлаар хэлэлцэх асуудал буюу хурлын дэгийг та бүхэндээ танилцуулахад бэлэн боллоо. Өнөөдрийн хурлаар нийт 6 асуудлыг танилцуулах болон хэлэлцүүлж батлуулахаар байна. 

Хурлаар хэлэлцэх асуудлууд болон хурлын дэгийг доорх хэсэгт харуулав.

Хурлын хэлэлцэх асуудал:

1. Компанийн 2025 оны үйл ажиллагааны болон санхүүгийн тайлангийн талаарх мэдээллийг танилцуулах, ТУЗ-ийн гаргасан дүгнэлтийг хэлэлцэн батлах.
2. 2025 оны үйл ажиллагааны цэвэр ашгаас Ногдол ашиг тараах эсэх тухай ТУЗ-ийн шийдвэрийг танилцуулах.
3. Дүрмийн сан нэмэгдүүлэх тухай асуудлыг хэлэлцэн батлах.
4. Бодь Даатгал ХК-ийн дүрэмд өөрчлөлт оруулах тухай асуудлыг хэлэлцэн батлах.
5. ТУЗ-ийн гишүүдийг сонгох, нэр дэвшигчдийг хурлаас гарах шийдвэрийн төслийн хамт батлах.
6. ТУЗ-ийн үйл ажиллагааны зардлыг хэлэлцэж, гарах шийдвэрийн төслийн хамт батлах.

Хурлын дэг:

1. 11:00-11:20 Хурлын ирцийг бүртгэх
2. 11:20-11:30 Хурлын ирцийг хурлын дарга болон хуралд оролцогч нарт мэдээлэх
3. 11:30-11:35 Хурлын дарга хурлын нээх, хурлаар хэлэлцэх асуудлууд, дэгийг танилцуулах
4. 11:35-12:30 Хурлаар хэлэлцэх асуудлуудыг танилцуулж, хэлэлцэн батлах
5. 12:30-12:35 Хурлаас гарах шийдвэрийн төсөлтэй холбоотой асуултад хариулах
6. 12:35-12:40 Саналын хуудас бөглөх зааврыг танилцуулах
7. 12:40-13:00 Хувьцаа эзэмшигч, төлөөлөгчдөөс саналын хуудас хүлээн авах
8. 13:00-13:15 Ирүүлсэн саналыг хурлын шийдвэр тус бүрээр нэгтгэх
9. 13:15-13:25 Саналын хуудсыг тоолж, шийдвэр бүрээр дүн гаргах
10. 13:25-13:35 Нэгтгэсэн саналын дүнг тооллогын комиссын тогтоолоор баталгаажуулах
11. 13:35-13:45 Тооллогын комиссын тогтоолыг үндэслэн хурлын тогтоолыг боловсруулах
12. 13:45-13:50 Тооллогын комиссын тогтоолыг танилцуулах
13. 13:50-14:00 Хурлаас гарах шийдвэр, тогтоолыг танилцуулах
14. 14:00-14:05 Хурлыг хаах

Хурлын хэлэлцэх асуудлууд болон хурлын дэгийг танилцуулсны дараа хамгийн эхний хэлэлцэх асуудал болох компанийн 2025 оны санхүү, үйл ажиллагааны үр дүнг Бизнес хөгжил хариуцсан захирал М.Мөнхбаатар танилцууллаа. 

1.1. Компанийн 2025 оны үйл ажиллагааны болон санхүүгийн тайлан: Бизнес хөгжил хариуцсан захирал М.Мөнхбаатар

Юуны өмнө ХЭХ-д хүрэлцэн ирсэн нийт хувьцаа эзэмшигч, удирдлагын баг болон ажлын албаныханд энэ өдрийн мэндийг хүргэе. Компанийн 2025 оны үйл ажиллагааны болон санхүүгийн үйл ажиллагааны талаар танилцуулгыг танилцуулахад бэлэн болсон байна.

Нийт хөрөнгө: Даатгалын зах зээлийн нийт хөрөнгийн хэмжээ өнгөрсөн онд өмнөх оны мөн үеэс 16.4% өсөж ₮771.3 тэрбумд хүрчээ. Энэ нь 2021 оны мөн үетэй харьцуулахад 81.3%-иар өссөн үзүүлэлт нь Үүний 87.4% буюу ₮674.4 тэрбумыг ердийн даатгалын компаниуд бүрдүүлж байна. Харин Бодь Даатгал ХК-ийн нийт хөрөнгө 2025 оны III улирлын байдлаар ₮47.7 тэрбумд хүрсэн нь өмнөх оны мөн үеэс 16.6%-иар өссөн үзүүлэлт болжээ. Энэхүү өсөлтөд даатгалын үйл ажиллагааны цэвэр ашиг, хөрөнгө оруулалтын өсөлтүүд голлон нөлөөлсөн байна. Мөн Бодь Даатгал ХК-ийн нийт хөрөнгө 2020 онтой харьцуулахад 47.6%-ийн өсөлт үзүүлжээ.

Ашигт ажиллагаа: Бодь Даатгал ХК-ийн цэвэр ашиг сүүлийн жилүүдэд тогтмол өссөөр байна. Тухайлбал, компани 2023 онд ₮1.34 тэрбум, 2024 онд ₮2.55 тэрбумын цэвэр ашигтай ажилласан бол 2025 онд цэвэр ашгийн хэмжээ даруй 2.1 дахин өсөж ₮5.4 тэрбумд хүрсэн. Үүний нөлөөгөөр нийт хөрөнгө өмнөх оноос 10%-иар өсөж ₮45.5 хүрсэн бөгөөд өөрийн хөрөнгө мөн адил нэмэгдсэн байна. Цаашлаад, 2025 онд өөрийн хөрөнгийн өгөөж өмнөх оноос 6.4 нэгж хувиар өсөж 26.2%-д, активын өгөөж 2.3 нэгж хувиар нэмэгдэж 8.4%-д хүрсэн нь ашигт ажиллагаа сайжирч буйг харуулж байна.

2025 оны голлох үзүүлэлтүүд: 2025 оны жилийн эцсийн байдлаар компанийн санхүүгийн үндсэн үзүүлэлтүүд өмнөх оны мөн үетэй харьцуулахад мэдэгдэхүйц өсөлт үзүүлсэн байна. Тодруулбал, нийт хураамжийн орлого 34.8% өсөж ₮43.2 тэрбумд, хөрөнгө оруулалтын орлого 27.7% нэмэгдэж ₮3.7 тэрбумд, эрсдэл андеррайтингийн бодлого хэрэгжүүлснээр нийт нөхөн төлбөр 0.7%-иар буурч ₮11.1 тэрбумд, цэвэр хураамжийн орлого 5.9%-иар өсөж ₮23.5 тэрбумд, цэвэр ашиг 112.2% нэмэгдэж ₮5.4 тэрбумд тус тус хүрчээ.

Харьцаа үзүүлэлт: Манай компани 2021 оноос эхлэн эрсдэлд суурилсан андеррайтингийн бодлогыг оновчтой, тасралтгүй хэрэгжүүлснээр хохирлын харьцааг бууруулж чадсан. Тухайлбал  2022 онд хохирлын харьцаа 73%-тай байсан бол энэ үзүүлэлт 2025 онд 49% болж буурчээ. Санхүүгийн Зохицуулах Хороо (СЗХ)-оос тогтоосон зохистой хохирлын харьцаа 30%-иас 75% хооронд байдаг бол Бодь Даатгал ХК-ийн хохирлын харьцаа 49% байгаа нь бодлогын оновчтой хэрэгжилтийн үр дүнг илтгэж байна.

Өр төлбөрийн бүтэц ба Нөөц сан: Өнгөрсөн 2025 онд Бодь Даатгал ХК хуримтлагдсан ашгаа 45.2%-иар өсгөж ₮9.3 тэрбумд хүргэсэн байна. Мөн нөөц сангийн хэмжээг нэмэгдүүлснээр санхүүгийн тогтвортой байдлаа бэхжүүлэн ажилласан юм.

Орлогын тайлан: Орлогын тайлан нь цэвэр хураамж, орлогод тооцсон хураамж, цэвэр нөхөн төлбөр, үйл ажиллагааны зардал, гэрээний зардал, татварын дараах цэвэр ашиг, алдагдал гэсэн 6 үндсэн үзүүлэлтээс бүрдэж байна. Сүүлийн 4 жилийн хугацаанд компани цэвэр хураамжийг дангаар өсгөхөөс илүүтэйгээр эрсдэлд суурилсан андеррайтингийн бодлогыг сайжруулж, ашигт ажиллагааг нэмэгдүүлэх чиглэлд төвлөрч ирсэн. Үүний үр дүнд 2025 онд цэвэр хураамжийн орлого 2024 оноос тодорхой хэмжээнд өссөнөөс гадна орлогод тооцсон хураамж ₮1 тэрбумаар нэмэгдсэн байна.

Мөн компани хамгийн гол үзүүлэлт болох цэвэр нөхөн төлбөрийн үйл ажиллагаанд онцгойлон анхаарч, тус үзүүлэлтийг ₮7.8 тэрбумд хүргэсэн. Түүнчлэн технологи болон бусад үйл ажиллагааны хүрээнд шаардлагатай зардлуудыг оновчтой гарган, үр ашгийг нэмэгдүүлжээ. Гэрээний зардлын хувьд жилийн эцсийн байдлаар ₮3.2 тэрбумд барьж ажилласан. Улмаар 2022 онд ₮1.3 тэрбумын алдагдалтай байсан даатгалын үйл ажиллагаа 2025 онд мэдэгдэхүйц сайжирч, ₮5.4 тэрбумд хүрээд байна.

Төлбөрийн чадвар: Төлбөрийн чадварын хувьд бол 2022 оны IV улирлыг 2025 оны IV улиралтай харьцуулахад үзүүлэлтүүд тогтвортой сайжирсан байна. Өнгөрсөн оны байдлаар төлбөрийн чадвар хэвийн, төлбөрийн чадвар сайтай гэсэн үзүүлэлт дээр хадгалагдаж байгаа нь компанийн санхүү, үйл ажиллагаа тогтворжсоныг илтгэж байна. 

2025 оны онцлох үйл явдал: Өнгөрсөн 2025 онд дараах 12 онцлох үйл ажиллагааг Бодь Даатгал ХК амжилттай хэрэгжүүлжээ. 

• 30 жил: Бодь Даатгал ХК нь 1995 оноос тасралтгүй 30 дахь жилдээ үйл ажиллагаагаа явуулж байгаа Монгол Улсын ууган даатгалын компани билээ. Бид өнгөрсөн хугацаад даатгалын зах зээлд даатгуулагчийн хэрэгцээ шаардлагад нийцсэн шинэ содон бүтээгдэхүүн үйлчилгээг нэвтрүүлж ирснээ бататгаж 30 жилийн ойн баяраа харилцагч байгууллагуудтайгаа тэмдэглэж өнгөрсөн онцгой үйл явдал болж өнгөрсөн.
• Бодь апп: Бид бүхий л цаг хугацаанд даатгалын зах зээлд тэргүүлэгч байж ирсэн. Үүнийгээ нотолж, даатгалын зах зээлд анх удаа иргэдийн даатгалын 14 бүтээгдэхүүнийг цахимаар гэрээ байгуулах, иргэдийн бүх төрлийн даатгалын нөхөн төлбөрийн хүсэлтийг хүлээн авах боломжтойгоос гадна нөхөн төлбөрийн үйл явцыг бодит цагийн горимоор хянах, мэдээлэл авах боломжтой “Даатгалын цогц үйлчилгээ” үзүүлэх боломжтой апп-ыг нэвтрүүлсэн.
• IVR технологи: Харилцагчийн халамж үйлчилгээний нэгжээр дамжуулан санал, гомдлыг шийдвэрлэх боломжтой болсон. Мөн ослын дуудлагыг оройн цагаар IVR-д шилжүүлэх замаар хөдөлмөрийн бүтээмжийг сайжруулсан.
• AXA Global Healthcare: Бид зах зээлд “AXA Global Healthcare” олон эрүүл мэндийн даатгалын бүтээгдэхүүний амжилттай нэвтрүүлж нутагшуулаад 10 жил болсон нь бидний амжилтыг бататгасан онцгой үйл явдал болсон

• Бидний мэдэх даатгалын төгсгөл: Бодь Даатгал ХК 30 жилийнхээ ойн хүрээнд Номакс Паблишинг ХХК-тай хамтран “Бидний мэдэх даатгалын төгсгөл” хэмээх технологийн дэвшил уламжлалт салбаруудыг өөрчилж буй энэ үед даатгал ч мөн адил шинэ түвшинд гарч, илүү хурдан, хүртээмжтэй, хэрэглэгч төвтэй болж байгааг харуулсан бүтээлийг Монгол хэлнээ хөрвүүлэн толилуулсан.
• Засаглал сайн, эрсдэлгүй: Бид Компанийн засаглалын кодексийн хэрэгжилтийн үнэлгээгээр 97.22% буюу “Засаглал сайн, эрсдэлгүй” гэж үнэлэгдсэн.
• Шинэ бүтээгдэхүүн: Цахилгаан тээврийн хэрэгслийн даатгал, Тэтгэврийн зээлийн эрсдэлийн даатгал зэрэг шинэ бүтээгдэхүүнийг зах зээлд нэвтрүүлсэн онцлог үйл явдлууд боллоо.

Дүгнэхэд: 2025 онд Бодь Даатгал ХК цэвэр ашиг ₮5.4 тэрбумд хүрсэн эерэг үр дүн гарсан байна. Программ хангамжийн чиглэлд дотоод үйл ажиллагааг системтэй хөгжүүлэх зорилгоор хотын ERP системийг нэвтрүүлж, сайжруулсан бөгөөд ажилтнуудад илүү ойлгомжтой, үр ашигтай байдлаар шинэчлэлийг хэрэгжүүлжээ. Мөн өнгөрсөн онд даатгалын зах зээлд Бодь апп болон шинэ веб сайтаа илүү орчин үеийн шийдэлтэйгээр, амжилттай нэвтрүүлж ажиллалаа. 

• Борлуулалтын тухайд цэвэр даатгалын хураамжийн хэмжээ тогтвортой хадгалагдсан нь орлогын чанар хэвээр байгааг, мөн давхар даатгалын оновчтой бодлогоор бодит орлогоо хамгаалж чадсаныг харууллаа. 2025 онд нийт болон цэвэр хураамжийн орлого өссөн нь борлуулалтын үйл ажиллагааг дахин идэвхжиж, зах зээлд байр сууриа хадгалахын зэрэгцээ тодорхой хэмжээнд тэлэх боломж бүрдэж, суурь бааз чадавхжиж байгааг харуулж байна. 
• Нөхөн төлбөрийн үйл ажиллагааны хувьд өмнө дурдсанчлан эрсдэлд суурилсан андеррайтингийн бодлогыг үр дүнтэй хэрэгжүүлснээр 2022-2025 оны хооронд тодорхой эерэг үр дүн гарчээ. Энэ нь компанийн ашигт ажиллагааг нэмэгдүүлэхэд чухал хувь нэмрийг оруулсан байна.

2025 оны жилийн эцсийн компанийн санхүүгийн үр дүн, тайланг танилцуулсны дараа хурлын хэлэлцэх асуудлын дарааллын дагуу санхүүгийн тайлангийн талаарх ТУЗ-өөс гаргасан дүгнэлтийг ТУЗ-ийн дарга Б.Билэгт танилцууллаа.

1.2. ТУЗ-өөс гарсан 2025 оны санхүү, үйл ажиллагааны талаарх дүгнэлт: ТУЗ-ийн дарга Б.Билэгт

Компанийн 2025 оны жилийн эцсийн компанийн санхүүгийн үр дүн тайлан танилцуулсан Мөнхбаатар захиралдаа баярлалаа. Одоо ТУЗ-өөс гаргасан Бодь Даатгал ХК-ийн 2025 оны санхүүгийн тайлан, үйл ажиллагааны талаарх дүгнэлтийг та бүхэндээ танилцуулъя. 

Бодь Даатгал ХК-ийн хувьцаа эзэмшигчдэд

2025 онд Монгол Улсын эдийн засгийн бодит өсөлт 5.8% инфляцын түвшин 7.5% гарсан бол даатгалын салбарын цэвэр хураамж 15.6%-иар өссөн байна. Цэвэр хураамжийн өсөлтөд тээврийн хэрэгслийн даатгалын хураамж болон гэнэтийн осол, эмчилгээний зардлын даатгал, хөрөнгө болон хариуцлагын хариуцлагын даатгалын цэвэр хураамж өссөн нь голлох нөлөө үзүүлсэн байна. Бодь Даатгал ХК-ийн хувьд 2025 онд санхүүгийн гол үзүүлэлтүүд дараах байдалтай гарсан. Үүнд:

Хураамжийн орлого

• Нийт хураамжийн орлого 34.6%-иар өсөж ₮43.2 тэрбум, цэвэр хураамжийн орлого 5.8%-иар өсөж ₮23.5 тэрбумд хүрсэн байна. Цэвэр хураамжийн орлогын 83%-ийг гэнэтийн осол, эмчилгээний зардал, тээврийн хэрэгсэл, хөрөнгө хариуцлагын даатгал бүрдүүлэв. 
• Компани 2025 онд жилийн эцсийн даатгалын цэвэр хураамжийн төлөвлөгөө 80.6%-ийн гүйцэтгэлтэй гарсан ба давхар даатгалын төлөвлөгөөний гүйцэтгэл 65% гарсан нь нийт гүйцэтгэлд нөлөөлжээ. 

Төлбөрийн чадварын үзүүлэлт

• Хөрөнгийн хүрэлцээтэй байдлын байвал зохих доод харьцаа 127% байгаа бөгөөд гүйцэтгэл 316% гарсан нь даатгагчийн төлбөрийн чадвар 2-р түвшний буюу хангалттай үзүүлэлттэй гарчээ. 

Нөөцийн сан

• 2025 оны байдлаар нөхөн төлбөрийн нөөц сангийн хэмжээ ₮8.25 тэрбум байгаа нь өмнөх онтой харьцуулахад 9.5%-аар буюу ₮865.6 саяар буурсан хэдий ч зохистой түвшинд байгуулж ажилласан. Нөөц сангийн хэмжээ буурсан нь 2025 оны даатгалын цэвэр хураамжийн хэмжээ 5.8% өсөж, цэвэр нөхөн төлбөрийн хэмжээ 9.7%-иар буурсантай холбоотой байна.
• Компанийн цэвэр хосолсон харьцаа 115.9% гарсан, зардлын харьцаа, хохирлын харьцаа зохистой түвшинд байх ба хосолсон харьцаа зохист түвшнээс 5.9%-аар давсан нь үйл ажиллагааны зардал 14.2% өссөн нь нөлөөлсөн байна.

Ашигт ажиллагаа

• Тайлант үеийн цэвэр ашиг ₮5.4 тэрбум буюу өмнөх оноос 112%-иар өсөж хуримтлагдсан ашиг 85.6% буюу ₮4.2 тэрбумаар нэмэгдсэн байгаа нь компани 2025 онд хангалттай сайн ажилласан гэж үзэж байна. 
• Цаашид даатгалын хосолсон харьцааг зохистой түвшинд барьж андерратингийн үйл ажиллагааны хяналтыг сайжруулж, даатгалын борлуулалтыг өсгөх, ашигт ажиллагааг илүү өсгөж ажиллахад анхаарч ажиллах нь зүйтэй гэж ТУЗ-өөс дүгнэлээ. 

Үүний дараа хэлэлцэх асуудлын дарааллын дагуу 2 дахь асуудал болох 2025 оны санхүү, үйл ажиллагааны үр дүнтэй уялдуулан ногдол ашиг тараах тухай шийдвэрийг Гүйцэтгэх захирал А.Энхжаргал уншиж танилцуулав. 

2. Ногдол ашгийн талаарх танилцуулга: Гүйцэтгэх захирал А.Энхжаргал

Компанийн тухай хуулийн 46 дугаар зүйлийн 46.5 дахь хэсэг Бодь Даатгал ХК-ийн дүрмийн 8 дугаар зүйлийн 8.12.12 дахь заалт, 15 дугаар зүйлийн 15.1 дэх хэсгийг тус тус үндэслэн тогтоох нь:

1. Компанийн 2025 оны жилийн эцсийн санхүүгийн үр дүнг үндэслэн татварын дараах цэвэр ашгаас ₮1,356,798,385.80-ийг компанийн хувьцаа эзэмшигчдэд мөнгөн хэлбэрээр ногдол ашиг болгон хуваарилсугай.
2. Компанийн хувьцаа эзэмшигчдэд олгох ногдол ашгийн нэгж хувьцаанд ногдох хэмжээг ₮5.85-өөр тооцож ногдол ашгийг 2026 оны 4 дүгээр сарын 30-ны дотор ҮЦТХТ-өөр зуучлуулан хувьцаа эзэмшигчдийн дансанд шилжүүлсүгэй.
3. Ногдол ашиг авах эрхтэй хувьцаа эзэмшигчдийн нэрсийн жагсаалт гаргах бүртгэлийн өдрийг ХЭХ-ын бүртгэлийн өдрөөр тогтоосугай.
4. Энэхүү шийдвэрийн хувьцаа эзэмшигчдэд хүргэх, хэрэгжилтийг хангаж ажиллахыг Гүйцэтгэх захирал А.Энхжаргалд үүрэг болгосугай. 

Ингээд хурлаар хэлэлцэх асуудлын дарааллын дагуу 3 дахь асуудал болох компанийн Дүрмийн санг нэмэгдүүлэх тухай асуудлыг Гүйцэтгэх захирал А.Энхжаргал танилцуулсан юм.

3. Дүрмийн сан нэмэгдүүлэх тухай асуудлыг хэлэлцэж, батлах тухай: Гүйцэтгэх захирал А.Энхжаргал

Даатгалын зах зээл дээр одоогоор 18 ердийн даатгал, 3 урт хугацааны даатгал, 1 давхар даатгалын компани буюу нийт 22 компани үйл ажиллагаа явуулж байна. Өнгөрсөн жилийн байдлаар 1 ердийн болон 1 урт хугацааны даатгалын компани шинээр нэмэгджээ. Ерөнхийдөө 22 компани өрсөлдөж буй даатгалын зах зээл нь жижиг ангилалд хамаарах бөгөөд ийм нөхцөлд өрсөлдөөн нэмэгдэхийн хэрээр компаниудын үйл ажиллагааг тэлэх, өрсөлдөх чадварт тодорхой сорилт, дарамт үүсэх боломжтой гэж үзэж байна.

Цаашдаа ердийн даатгал, урт хугацааны даатгалын компаниудын дүрмийн санг нэмэгдүүлэх асуудлыг хөндөж эхэлсэн. Одоогоор эцэслэн батлагдаагүй байгаа ч хэлэлцэж буй төслийн хүрээнд ердийн даатгалын компанийн дүрмийн сангийн хэмжээг эхний ээлжид ₮10 тэрбумд, урт хугацааны даатгалын компанийнхыг ₮8 тэрбумд хүргэх зэрэг санал яригдаж байна. 

Тиймээс дүрмийн санг урьдчилаад нэмэгдүүлж байх нь зүйтэй гэсэн байр суурьтай байгаа бөгөөд энэ саналыг дэмжиж ажиллаж байна. Мөн энэ хүрээнд бодлого зохицуулагч байгууллагад саналаа тодорхой хэмжээнд хүргүүлсэн явж байна. Ингээд дүрмийн сангийн хэмжээг энэ жилийн ашигт ажиллагаа болон хуримтлагдсан ашгаасаа бүрдүүлэн ₮2,588,516,898-өөр нэмэгдүүлэх гэсэн саналыг ХЭХ-д оруулж ирж байна. Ингэж нэмэгдүүлснээр нэг бүрийн нэрлэсэн нэгж хувьцааны үнийг ₮36-т хүргэх боломж бүрдэх юм. Мөн дараах давуу талууд үүснэ. Тухайлбал:

• Хүний нөөцийг чадавхижуулах, дэвшилтэт технологийг ашиглах боломж нэмэгдэнэ;
• Хувьцаа эзэмшигч, хөрөнгө оруулагч нарын үйл ажиллагаанд тавих хяналт сайжирна;
• Салбарын эрсдэл даах чадвар сайжирснаар давхар даатгалын хураамж хэлбэрээр гадагш шилжих валютын урсгал буурна;
• Санхүүгийн тогтвортой байдал нэмэгдэнэ;
• Харилцагч, даатгуулагчдын итгэл нэмэгдэнэ;
• Төлбөрийн чадварын харьцаа үзүүлэлтүүдэд, орлого ашигт эерэг нөлөө үзүүлнэ

Үүний дараа 4 дахь асуудал болох Бодь Даатгал ХК-ийн дүрэмд өөрчлөлт оруулах тухай асуудлыг хэлэлцэхээр болсон бөгөөд тус асуудлыг Гүйцэтгэх захирал А.Энхжаргал танилцууллаа.

4. Бодь Даатгал ХК-н дүрэмд өөрчлөлт оруулах тухай тухай асуудлыг хэлэлцэж батлах тухай: Гүйцэтгэх захирал А.Энхжаргал

Компанийн дүрэмд үндсэн 3 өөрчлөлт оруулахаар санал оруулж байна. Эхний асуудал нь Бодь Даатгал ХК-ийн байршиж байгаа барилгын нэр албан ёсоор өөрчлөгдсөнтэй холбоотой компанийн дүрэм дээрх албан ёсны нэр, хаягийн асуудлыг өөрчлөх шаардлага үүссэн. Үүний хүрээнд компанийн дүрмийн 1.4-д заасныг одоо дараах байдлаар өөрчлөн найруулж байна.

• Дүрмийн 1.4-т заасан нэмэлт өөрчлөлт: “Компанийн оршин байгаа газрын хаяг: Монгол улс, Улаанбаатар хот, Чингэлтэй дүүрэг 1-р хороо, Ц.Жигжигджавын гудамж-9, Богд тауэр 3-р давхар, утас: 75054800”

Харин удаах асуудал бол дүрмийн сан нэмэгдүүлэхтэй холбоотой асуудалтай юм. Мөн нэгж хувьцааны үнийг өөрчилж дүрмээ шинэчлэн найруулж байна. Үүнийг танилцуулбал:

• 2. Дүрмийн 4.1-т заасан нэмэлт өөрчлөлт: “Хувьцаа эзэмшигчдийн худалдан авч эзэмшсэн буюу эргэлтэд гаргасан хувьцааны нэрлэсэн үнийн дүнгээс компанийн хувь нийлүүлсэн хөрөнгө бүрдэнэ. Компанийн хувь нийлүүлсэн хөрөнгийн хэмжээ нь нэг бүрийн ₮36-ийн нэрлэсэн үнэтэй 235,319,718 ширхэг энгийн хувьцаа байна.”

Дараагийн өөрчлөлт нь компанийн гүйцэтгэх удирдлагыг Гүйцэтгэх захирал хэрэгжүүлнэ гэх заалттай холбоотой. Үүнтэй холбогдох зүйл заалтуудын өөрчлөлтийг танилцуулахаас өмнө уг өөрчлөлтийн үндэслэлийг тайлбарлах нь зүйтэй гэж үзэж байна.

Компанийн гүйцэтгэх удирдлагын баг нь үйл ажиллагааны онцлогоос хамааран 6, 7 эсвэл 8 хүний бүрэлдэхүүнтэй байхаар зохион байгуулагддаг ба үүн дээр нэмэлтээр Ерөнхий нягтлан бодогч ордог. Эдгээр гүйцэтгэх удирдлагын бүрэлдэхүүнд аливаа өөрчлөлт орох, тухайлбал шинэ хүн томилох, солих эсвэл өөрийн хүсэлтээр чөлөөлөгдөх зэрэг тохиолдолд зайлшгүй хороонд мэдэгдэх, тэр тусмаа шинээр томилж байгаа тохиолдолд хороонд мэдэгдээд хорооноос бас албан ёсоор зөвшөөрөл авах ийм зохицуулалт нь даатгалын багц дүрэм дээр заагдсан байдаг. 

Тиймээс эхний ээлжид ТУЗ-ийн нэр дэвших хороогоор оруулаад дараа нь зөвшөөрөл авахаар хүсэлтээ явуулдаг. Энэ процесс нь багадаа 14 хоног, заримдаа бүр 21 хоног эсвэл нэг сар болох тохиолдол байдаг. Энэ нь нөгөө талдаа бидний үйл ажиллагаанд тодорхой хэмжээний цаг хугацаа алдах, зарим тохиолдолд боломжит нэр дэвшигчийн хугацаа алдах зэрэг сөрөг үр дагавруудыг бий болгодог. Нөгөө талаас хорооноос энэ зохицуулалт нь бодлого зохицуулагч газар нэгжийн хувьд хиймэл ачааллыг үүсгэж байгааг онцолж, дүрмийн холбогдох заалтыг өөрчлөн найруул гэх санал хэд хэдэн удаа тавьж байсан. Эдгээр үндэслэлээр бид дүрэмдээ дараах өөрчлөлтийг оруулж байна. 

• Дүрмийн 8.12.16 дахь заалтаас хасагдсан үг: “... тэдгээрийг дарга, захирлыг томилох;”
• Дүрмийн 12.2-т заасан нэмэлт өөрчлөлт: “Компанийн Гүйцэтгэх удирдлагыг хувь хүн буюу Гүйцэтгэх захирал (цаашид “Гүйцэтгэх удирдлага” гэнэ) хэрэгжүүлнэ.” гэж;
• Дүрмийн 12.3, 12.6 болон 12.7 дахь заалтуудыг тус тус хасав.
• Дүрмийн 12.3, 12.6 болон 12.7 дахь заалтууд хасагдсантай холбоотойгоор Гүйцэтгэх захирлын эрх, үүрэг бүлгийн дугаарлалтыг 12.5 болгож, 12.5.1.2-т нэмэлтээр өөрчлөлт оруулав. “Хараат болон охин компани, салбар, төлөөлөгчийн газар байгуулах саналыг ТУЗ-д, танилцуулж батлуулах ба тэдгээрийн захирлуудыг Гүйцэтгэх захирал томилж, чөлөөлөх, хөдөлмөрийн ба үр дүнгийн гэрээ байгуулах” гэж;
• Дүрмийн 12.5.1.14-т нэмэлт оруулав: “Удирдлагын багийг бүрдүүлж, тэдгээрийн захирлуудыг Гүйцэтгэх захирал томилж, чөлөөлөх, хөдөлмөрийн ба үр дүнгийн гэрээ байгуулах;” гэж;
• Дүрмийн 13.1-т заасан нэмэлт өөрчлөлт: “ТУЗ-ийн дарга, гишүүн, Гүйцэтгэх захирал, Гүйцэтгэх захирлын орлогч захирал, Ерөнхий нягтлан бодогч, хараат болон охин компаниудын захирлуудыг компанийн эрх бүхий албан тушаалтанд тооцно.” гэж;

Үргэлжлүүлэн хэлэлцэх асуудлын 5 дахь асуудал болох ТУЗ-ийн гишүүдийг дэвшигчдийг сонгох нэр асуудлыг Гүйцэтгэх захирал А.Энхжаргал танилцуулав.

5. Төлөөлөн Удирдах Зөвлөлийн гишүүдийг сонгох: Гүйцэтгэх захирал А.Энхжаргал

Компанийн тухай хууль болон дүрэмд ТУЗ-ийн ердийн болон хараат бус гишүүдийг 3 жилийн хугацаатай сунгаад явдаг. Энэхүү заалтын хүрээнд одоогийн ТУЗ-ийн гишүүдийн бүрэн эрхийн хугацааг сунгах эсэх асуудлыг та бүхэнд танилцуулж байна.

Монгол Улсын Компанийн тухай хуулийн 62 дугаар зүйлийн 62.1.7 дэх заалт, 77 дугаар зүйлийн 77.2 дахь хэсэг удирдлага болон Хувьцаа эзэмшигчдийн ээлжит хурлын Тооллогын комиссын 2026 оны 04 сарын 20-ны өдрийн 02 дугаар тогтоолын дүнг үндэслэн тогтоох нь:

1. Бодь Даатгал ХК-ийн ТУЗ-ийн хараат бус гишүүнээр Б.Бүжинлхам, Э.Бямбажав, Л.Банзрагч нарыг сонгосугай.
2. Бодь Даатгал ХК-ийн ТУЗ-ийн ердийн гишүүнээр Л.Болдхуяг, Б.Билэгт, Г.Саруул, Д.Даянбилгүүн, Ш.Бэжид, Ш.Сүхбаатар нарыг сонгосугай.

Үүний дараагаар ТУЗ-ийн үйл ажиллагааны зардлыг хэлэлцэн, гарах шийдвэрийн төслийн хамт батлах асуудлыг Гүйцэтгэх захирал А.Энхжаргал танилцууллаа.

6. Төлөөлөн Удирдах Зөвлөлийн үйл ажиллагааны зардлыг батлах тухай: Гүйцэтгэх захирал А.Энхжаргал

Сүүлийн 5 жилийн хугацаанд ТУЗ-ийн үйл ажиллагааны зардал дээр ямар нэгэн өөрчлөлт ороогүй бөгөөд тогтмол дүнгээр явж ирсэн байна. Харин энэ хугацаанд компанийн үйл ажиллагаа тодорхой хэмжээнд өргөжин тэлж, сайжирсан. Үүнтэй холбоотой ТУЗ-ийн үйл ажиллагааны зардалд тодорхой хэмжээнд бага зэргийн нэмэлт, өөрчлөлт оруулах нь зүйтэй гэж үзэж байна. Нөгөө талаас инфляцын өөрчлөлтөөр цалингийн асуудал жил болгон яригдаж, зарим компаниуд жилдээ 1-ээс 2 ч удаа цалингаа нэмэгдүүлж байна. Эдгээр хүчин зүйлстэй холбоотойгоор сүүлийн жилүүдэд өөрчлөлт оруулаагүй байсан уг асуудлыг шинэчлэн танилцуулж байна.

Зардлын дэлгэрэнгүй: ТУЗ-ийн даргын нэг жилийн цалинг ₮14.4 сая, ТУЗ-ийн ердийн 5 гишүүдийн цалинг ₮72 сая, ТУЗ-ийн хараат бус 3 гишүүдийн цалинг ₮48.6 саяар тус тус нэмэгдүүлэхээр төлөвлөсөн. Мөн сургалт хөгжил бусад үйл ажиллагаатай холбоотой зардлыг ₮17 саяд хүргэхээр байна. ТУЗ-ийн гишүүдийн сургалт хөгжилд тодорхой хэмжээний сургалтуудыг байнга авч байх хэрэгцээ шаардлагыг зөвхөн биднээс бус СЗХ-ноос тогтмол шаардаж, хэрэгжилт талаас нь хяналт тавьж байна. Энэ нь компанийн зохистой засаглалын хэрэгжилтийн үр дүнд эерэг, сөрөг нөлөөллийг бий болгодог тул зайлшгүй хэмжээнд тодорхой төсвийг батлаад зарцуулж явах нь зүйтэй юм. Ингээд ТУЗ-тэй холбоотой нийт зардлыг ₮152 саяар батлуулахаар та бүхэнд танилцуулж байна.

Энэхүү асуудлыг танилцуулсны дараа хурлын дэгийн дагуу хурлаас гарах шийдвэртэй холбоотой санал асуулгын процесс эхэлсэн юм. Үүнтэй холбогдуулан саналын хуудас бөглөх зааврыг Тооллогын комиссоос хувьцаа эзэмшигчдэд танилцууллаа. Үүний дараа хурлын дэгийн дагуу асуулт хариулт хүлээж авах үйл ажиллагаа эхлэв.

Асуулт-хариултын хэсэг

Асуулт хариултын хэсгийг Гүйцэтгэх захирал А.Энхжаргал удирдаж, хариулж оролцов.

Асуулт 1: Ногдол ашгийн хэмжээг нэмэгдүүлэх үү?

Асуултад Гүйцэтгэх захирал А.Энхжаргал хариулав. 

Ирэх жилүүдэд ногдол ашгийн хэмжээг нэмэгдүүлэх боломж байгаа ч хэд хэдэн хүчин зүйлийг харгалзан үзэх шаардлагатай байна. Тухайлбал, дүрмийн санг хамгийн багадаа ₮10 тэрбумд хүргэх шаардлага үүсэж байгаа бөгөөд үүнтэй холбоотой дараа жил дүрмийн санг дахин энэ дүнгээр эсвэл түүнээс арай өндөр дүнгээр нэмэгдүүлэх хэрэгцээ гарахыг үгүйсгэхгүй. Цаашлаад, жилийн эцсээр компани ямар үр ашигтай ажиллахаас хамаарч, сая дурдсан нөхцөл байдлыг харгалзан үзэж, ногдол ашгийн хэмжээг нэмэгдүүлэх эсэхийг шийдвэрлэн хэрэгжүүлэхээр төлөвлөж байна.

Асуулт 2: Дараа жил ХЭХ-ыг танхимаар зохион байгуулах уу?

Асуултад Бизнес хөгжил хариуцсан захирал М.Мөнхбаатар хариулав. 

Ирэх жил ХЭХ-ыг танхимаар хийх бүрэн боломжтой. Гэхдээ компанийн хувьд технологийн дэвшлийг ашиглаад, тэгш хүртээмжтэй байдлыг нэмэгдүүлэх, ХЭХ-д хувьцаа эзэмшигчдийг илүү өргөнөөр оролцуулах үүднээс Би Ди Сек ҮЦК (BDS)-тай хамтран ажиллаж байна. Одоогоор танхимын хэлбэрээр хэлэлцэх нөхцөл бүрэн боломжтой байгаа ч дараа дараагийн ХЭХ-ыг хувьцаа эзэмшигчдээс гарсан саналыг үндэслэн танхимаар зохион байгуулах талаар удирдлагын баг болон бусад ажлын алба, холбогдох нэгжүүд анхаарч ажиллах боломжтой гэж үзэж байна.

Асуулт 3: Ашигт ажиллагаанд нөлөөлсөн голлох хүчин зүйлс юу байсан бэ?

Асуултад Гүйцэтгэх захирал А.Энхжаргал хариулав. 

Өнгөрсөн жил 2024 онтой харьцуулахад ашигт ажиллагаа тодорхой хэмжээнд чамлахааргүй өсөлттэй гарсан байна. Энэхүү үзүүлэлтэд нөлөөлж байгаа хамгийн гол хүчин зүйл бол борлуулалт тодорхой хэмжээнд нэмэгдсэн явдал юм. Үүнтэй уялдаад өнгөрсөн жилийн удирдаж байсан хөрөнгө оруулалт, хөрөнгө оруулалтын өгөөжийг нэмэгдүүлэхэд оновчтой, тодорхой бодлогын асуудлуудыг хэрэгжүүлж эхэлсний үр дүнд хөрөнгө оруулалтын орлого 27.8%-иар нэмэгдсэн байна. Энэ нь ашигт ажиллагаанд тодорхой нөлөөг үзүүлсэн юм. 

Нөгөө талаас зардлын менежментийг тодорхой хэмжээнд үр дүнтэй хэрэгжүүлж ирсэн. Санхүүгийн үзүүлэлтүүдийн хүрээнд үйл ажиллагааны болон бусад зардлыг төлөвлөсөн түвшнээс хэтрүүлэхгүйгээр, холбогдох газар нэгжүүд зардлаа оновчтой, хэмнэлттэй удирдаж ажилласны үр дүн юм. Дараагийн нэг хамгийн чухал нөлөөлсөн гол зүйл нь нөхөн төлбөрийн зардал тодорхой хэмжээнд буурсан явдал. Нөхөн төлбөрийн зардал буурснаар нөөц сан тодорхой хэмжээнд буурна. Энэхүү нөөц сангийн үзүүлэлт буурсан нь ашигт ажиллагаанд эерэг нөлөөллийг бий болгосон байна. 

Нэмж дурдахад, 2023 оны 7 сард байгалийн гамшигт үзэгдэл буюу үерийн улмаас манай харилцагч нарт хэд хэдэн нөхөн төлбөрийн тохиолдол үүссэн. Үүнтэй холбоотойгоор холбогдох журам, зааврын дагуу нөөц санг бүрдүүлэн ажилласан. Эдгээр нь 2-3 томоохон хэмжээний, давхар даатгалтай тохиолдлууд байсан бөгөөд сүүлийн 2 тохиолдол нь 2025 онд эцэслэгдэн шийдвэрлэгдсэн байна. Нөөц сангийн дарамт буурсан нь 2025 оны үйл ажиллагааны ашигт эерэг үр дүн авчирсан байна.

Цаашид өмнө дурдсан үйл ажиллагааны зардлыг тогтмол түвшинд оновчтой, үр ашигтайгаар удирдах, хөрөнгө оруулалтын өгөөжийг нэмэгдүүлэх, орлогыг өсгөх замаар ашигт ажиллагааг дэмжих зэрэг бодлогын асуудлуудыг тасралтгүй сайжруулж, компанийн үйл ажиллагаанд хэрэгжүүлэн ажиллах шаардлагатай гэж  харж байна.

Асуулт 4: 2026 онд бодлого, стратегийн түвшинд хийгдэхээр төлөвлөгдөж байгаа ажлууд юу вэ?

Асуултад Гүйцэтгэх захирал А.Энхжаргал хариулав. 

Бодлого стратегийн хүрээнд өнгөрсөн жил компанийн санхүүгийн үр дүн, санхүүгийн чадавх болон төлбөрийн чадварыг сайжруулах зорилгоор эрсдэлд суурилсан бодлогыг хэрэгжүүлж ажилласан. Үүний үр дүнд компанийн санхүүгийн үзүүлэлтүүд мэдэгдэхүйц сайжирсан байна. Тэгэхээр үүнд үндэслэн дараагийн жилүүдэд, ялангуяа энэ жилээс эхлэн зах зээл дэх байр сууриа бэхжүүлэх, үйл ажиллагааны цар хүрээг тэлэх, шинэ бүтээгдэхүүн үйлчилгээ нэвтрүүлэх зэрэг өсөлт, хөгжлийн чиглэлд төвлөрсөн стратегийн ажлуудыг үргэлжлүүлэн хэрэгжүүлэхээр төлөвлөж байна.

Тэр дундаа өмнөх танилцуулгад дурдсанчлан технологийн хөгжилд онцгой анхаарч ажиллана. Технологийн хөгжил өдөр бүр хурдацтай өөрчлөгдөн шинэчлэгдэж байгаа энэ үед компанийн хувьд ч шинэ шийдэл, технологитой хөл нийлүүлэн дасан зохицох боломжийг бүрдүүлэх нь чухал гэж үзэж байна. Тиймээс энэ чиглэл рүү тодорхой хэмжээний хөрөнгө оруулалтыг аль болох үр өгөөжтэй хийхээр төлөвлөж ажиллаж байна. 

Мөн ойрын хугацаанд биш юм гэхэд дунд болон урт хугацаанд үйл ажиллагааны зардлыг бууруулах, цаашлаад бүтээгдэхүүн үйлчилгээний хурд, чанар, хүртээмжийг сайжруулах ажиллана. Түүнчлэн зах зээлд эзлэх байр сууриа нэмэгдүүлэх зорилгоор 2026 оны төлөвлөгөөг амбицтай боловсруулж байна. Өнгөрсөн жилтэй харьцуулахад санхүүгийн гол үзүүлэлтүүд дээр 40%-иас дээш, цаашлаад 60%-70% хүртэл өсөлт бий болгохоор зорьж төлөвлөсөн. Нэмээд өнгөрсөн жилээс авхуулаад хэрэгжүүлж буй зарим ажлууд ч үргэлжилж байна. 

Одоогийн байдлаар энэ 5-р сард хувь хүний эрүүл мэндийн даатгалын бүтээгдэхүүнийг зах зээлд нэвтрүүлэхэд бэлэн болоод байна. Мөн үүнээс гадна төлөвлөсөн хэд хэдэн шинэ бүтээгдэхүүнүүд үе шаттайгаар зах зээлд гаргахаар зорьж  байна. Технологийн чиглэлд зөвхөн дан ганц энэ жил анхаараад өнгөрөх биш өнгөрсөн жилүүдээс эхлэн өөрсдийн боломжид нийцүүлэн хөрөнгө оруулалт тогтмол хийж ирсэн. Үүний үр дүнд өнгөрсөн жилийн 11 сард шинэ апп-аа зах зээл нэвтрүүлсэн. Тус апп нь даатгалын зах зээлд анхдагч шийдэл болж, олон төрлийн үйлчилгээг нэг дороос авах бүрдүүлснээрээ онцлог юм. Цаашид энэхүү апп-ыг илүү хөгжүүлж, боломжуудыг илүү нь өргөжүүлэх чиглэлд үргэлжлүүлэн ажиллахаар төлөвлөж байна.

Тооллогын комиссын дарга Х.Сарангоо

Асуултын, хариултын хэсэг өндөрлөсний дараа тооллогын систем дээрх албан ёсоор санал хураах хэсэг хаагдаж, саналыг нэгтгэн, үр дүнг тооллогын комиссын дарга Х.Сарангоо танилцууллаа. Бодь Даатгал ХК-ийн саналын эрхтэй 231,931,348 ширхэг хувьцаанаас 88.61% буюу 205,510,132 ширхэг хувьцаа эзэмшиж буй 26 хувьцаа эзэмшигч хуралд оролцсон байна. Хурлаар дараах асуудлуудыг ердийн аргаар санал хураан шийдвэрлэв.

• 1. Компанийн 2025 оны үйл ажиллагааны болон санхүүгийн тайлангийн талаарх ТУЗ-ийн гаргасан дүгнэлтийг хэлэлцэж батлах тухай асуудалд хуралд оролцсон нийт хувьцаа эзэмшигчдийн 99.99% буюу 205,495,369 ширхэг хувьцаатай 18 хувьцаа эзэмшигч хүчинтэй санал өгсөн байна. Хүчинтэй санал өгсөн нийт хувьцаа эзэмшигчдийн 100% зөвшөөрсөн, 0% татгалзсан, 0% түдгэлзсэн байна. 
• 2. ТУЗ-ийн үйл ажиллагааны зардлыг хэлэлцэн батлах тухай асуудалд хуралд оролцсон нийт хувьцаа эзэмшигчдийн 99.99% буюу 205,495,369 ширхэг хувьцаатай 18 хувьцаа эзэмшигч хүчинтэй санал өгсөн байна. Хүчинтэй санал өгсөн нийт хувьцаа эзэмшигчдийн 100% зөвшөөрсөн, 0%, 0% түдгэлзсэн байна.
• 3. Дүрмийн сан нэмэгдүүлэх шийдвэрийг батлах тухай асуудалд хуралд оролцсон нийт хувьцаа эзэмшигчдийн 99.99% буюу 205,495,369 ширхэг хувьцаатай 18 хувьцаа эзэмшигч хүчинтэй санал өгсөн байна. Хүчинтэй санал өгсөн нийт хувьцаа эзэмшигчдийн 99.0999% нь зөвшөөрсөн, 0.0001% нь татгалзсан, 0% хувь түдгэлзсэн байна. 
• 4. Бодь Даатгал ХК-ийн дүрэмд өөрчлөлт оруулах тухай шийдвэрийг батлах тухай асуудалд хуралд оролцсон нийт хувьцаа эзэмшигчдийн 99.99% буюу 205,495,369 ширхэг хувьцаатай 18 хувьцаа эзэмшигч хүчинтэй санал өгсөн байна. Хүчинтэй санал өгсөн нийт хувьцаа эзэмшигчдийн 100% нь зөвшөөрсөн, 0% нь татгалзсан,  0.0001% түдгэлзсэн байна. 

Хурлаар дараах асуудлуудыг кумулятив аргаар санал хураан шийдвэрлэв. Үүнд 

5. Компанийн ТУЗ-ийн гишүүдийг шинээр сонгох тухай асуудалд хуралд оролцсон нийт хувьцаа эзэмшигчдийн 99.99% буюу 205,495,369 ширхэг хувьцаатай 18 хувьцаа эзэмшигч саналын хуудсаар хүчинтэй саналыг өгсөн байна. Ингээд ердийн гишүүдэд өгсөн саналаар ТУЗ-ийн ердийн гишүүнд нэр дэвшигчдийн нэрсийг танилцуулав.

1. Болдхуягийн Билэгт кумулятив аргаар өгсөн саналын тоо 205,507,199. 
2. Лувсанвандангийн Болдхуяг 205,507,099. 
3. Ганбаатарын Саруул 205,507,399. 
4. Данзангийн Даянбилгүүн 205,510,108. 
5. Ширчингийн Сүхбаатар 205,487,199. 
6. Шонуунорсонгийн Бэжид 205,487,019.

Дараа нь хараат бус гишүүдэд санал өгсөн талаар ТУЗ-ийн хараат бус гишүүнд нэр дэвшигчдийн нэрсийг танилцуулав.

1. Батчулууны Бүжинлхам 205,486,899. 
2. Эрдэнийн Бямбажав 205,486,899. 
3. Лхагвасүрэнгийн Банзрагч 205,478,500

Бодь Даатгал ХК-ийн ХЭХ-ын тооллогын комиссын шийдвэрийг танилцуулж дууссаны дараа хурал үргэлжлэн ХЭХ-аас гарах тогтоолыг хэлэлцсэн бөгөөд холбогдох тогтоолын төслүүдийг Гүйцэтгэх захирал А.Энхжаргал танилцуулав.

ХЭХ-ийн тогтоол:

<b>Тогтоол №1</b>

Компанийн 2025 оны жилийн үйл ажиллагааны болон санхүүгийн тайлангийн талаарх ТУЗ-ийн гаргасан дүгнэлтийг хэлэлцэж, батлах тухай,

Үндэслэл: Компанийн тухай хуулийн 59 дүгээр зүйлийн 59.11 дэх заалт, 62 дугаар зүйлийн 62.1.9 дэх заалт, ХЭХ-ын 2026 оны 4 дүгээр сарын 20-ны өдрийн тооллогын комиссын 2 дугаар тогтоолыг тус тус үндэслэн тогтоох нь: 

1. Бодь Даатгал ХК-ийн 2025 оны жилийн үйл ажиллагааны болон санхүүгийн тайланд өгсөн ТУЗ-ийн дүгнэлтийг хувьцаа эзэмшигчдийн ээлжит хуралд танилцуулсныг дурдсугай,
2. Бодь Даатгал ХК-ийн 2025 оны жилийн үйл ажиллагааны болон санхүүгийн тайлангийн талаарх ТУЗ-ийн гаргасан дүгнэлтийг Хавсралт №1-т заасны дагуу баталсугай.

<b>Тогтоол №2</b>

Монгол Улсын Компанийн тухай хуулийн 31 дүгээр зүйлийн 31.2.1 дэх заалт болон 62 дугаар зүйлийн 62.1.1 дэх заалтуудыг удирдлага болгон ХЭХ-ын 2026 оны 4 дүгээр сарын 20-ны өдрийн тооллогын комиссын 2 дугаар тогтоолыг тус тус үндэслэн тогтоох нь: 

1. Бодь Даатгал ХК-ийн хувь нийлүүлсэн хөрөнгийн хэмжээг ₮2,588,516,898-өөр нэмэгдүүлэн нэг бүрийн нэрлэсэн үнийг ₮36 болгон өөрчилсүгэй,
2. Энэхүү тогтоолын хэрэгжилтийг хангаж хувь нийлүүлсэн хөрөнгийн хэмжээний өөрчлөлтийг дүрэмд тусган дүрмийн өөрчлөлтийг СЗХ, Хуулийн этгээдийн улсын бүртгэлийн газарт бүртгүүлж ажиллахыг Гүйцэтгэх захирал А.Энхжаргалд даалгасугай.

<b>Тогтоол №3</b>

Монгол Улсын Компанийн тухай хуулийн 62 дугаар зүйлийн 62.1.1 дэх заалтыг удирдлага болгон ХЭХ-ын 2026 оны 4 дүгээр сарын 20-ны өдрийн тооллогын комиссын 2 дугаар тогтоолыг тус тус үндэслэн тогтоох нь: 

1. Бодь Даатгал ХК-ийн дүрэмд орох өөрчлөлтийг Хавсралт №1-д заасны дагуу баталсугай,
2. Энэхүү тогтоолын хэрэгжилтийг хангаж, дүрмийг СЗХ, Хуулийн этгээдийн улсын бүртгэлийн газарт бүртгүүлж ажиллахыг Гүйцэтгэх захирал А.Энхжаргалд даалгасугай.

<b>Тогтоол №4</b>

Монгол Улсын Компанийн тухай хуулийн 62 дугаар зүйлийн 62.1.7 дахь заалт 77 дугаар зүйлийн 77.2 дахь хэсэг ХЭХ-ын 2026 оны 4 дүгээр сарын 20-ны өдрийн тооллогын комиссын 2 дугаар тогтоолыг тус тус үндэслэн тогтоох нь: 

1. Бодь Даатгал ХК-ийн ТУЗ-ийн хараат бус гишүүнээр Б.Бүжинлхам, Э.Бямбажав, Л.Банзрагч нарыг улируулан сонгосугай,
2. Бодь Даатгал ХК-ийн ТУЗ-ийн ердийн гишүүнээр Л.Болдхуяг, Б.Билэгт, Г.Саруул, Д.Даянбилгүүн, Ш.Бэжид, Ш.Сүхбаатар нарыг улируулан сонгосугай.

<b>Тогтоол №5</b>

Монгол Улсын Компанийн тухай хуулийн 62 дугаар зүйлийн 62.1.13 дахь заалтыг удирдлага болгон хувьцаа эзэмшигчдийн ээлжит хурлын 2026 оны 4 1 дүгээр сарын 20-ны өдрийн тооллогын комиссын 2 дугаар тогтоолыг тус тус үндэслэн тогтоох нь: 

1. Бодь Даатгал ХК-ийн компанийн ТУЗ-ийн үйл ажиллагааны зардлыг Хавсралт №1-д заасны дагуу баталсугай,
2. Бодь Даатгал ХК-ийн ТУЗ-ийн ердийн гишүүнээр Л.Болдхуяг, Б.Билэгт, Г.Саруул, Д.Даянбилгүүн, Ш.Бэжид, Ш.Сүхбаатар нарыг улируулан сонгосугай.

Эцэст нь ХЭХ өндөрлөж, Гүйцэтгэх захирал А.Энхжаргал хуралд оролцсон хувьцаа эзэмшигчид, зохион байгуулагчдад талархал илэрхийлэн албан ёсны хаалтын үгийг хэлэв. Ингэснээр 13 цаг 07 минутад өндөрлөв.