Оны бизнес, санхүүгийн салбарын шилдгүүдийг шалгаруулах “Lemon Press Awards” 5 дах жилдээ зохиогдож байна. Энэ жилийн хувьд манай редакцын зүгээс тодорхой шаардлага тавин 3 төрөлд 5, 5 нэр дэвшигчийг тодрууллаа. Эцсийн шийдвэрийг уншигч та бүхний шийдвэрээр гаргах бөгөөд ЭНД дарж саналаа өгөх боломжтой. Санал хураалт 12 сарын 24 буюу Лхагва гаргийн 13:00 цаг хүртэл үргэлжилнэ гэдгийг битгий мартаарай. 

“Онцлох компани” номинацид нэр дэвшигчдийг хэрхэн сонгов?

Бид уг номинацид нэр дэвшигчдийг МХБ-ийн I болон II ангиллын компаниудаас шигшиж, 2025 онд хувьцаа эзэмшигчдийн тоо нь хамгийн их өссөн, хувьцааны үнийн өсөлт, хагас жил, III улирлын цэвэр ашгийн өсөлт, шинэлэг байдал, салбарт үзүүлсэн нөлөө гэсэн үндсэн шалгуурт тулгуурлан тодрууллаа. Ингээд нэр дэвшигч нартайгаа танилцъя. 

ЛэндМН ББСБ ХК: Онцгой нэмэгдэл 

ЛэндМН ББСБ ХК (LEND)-ийн жижиг хувьцаа эзэмшигчдийн тоо энэ оны 11-р сард өнгөрсөн оны сүүлээс 2,684-өөр нэмэгдэж, нийт нээлттэй компаниуд дундаас өсөлтөөрөө эхний 3-т оров. Түүнчлэн тэдний хувьцааны үнэ энэ он гарснаас хойш 14% өссөн байна. Онцлох амжилт нь $LEND энэ онд анх удаа ТОП-20 индексэд багтсан билээ. 

• Тэргүүлэл: Цаашлаад, энэ онд $LEND нийт хөрөнгийн өсөлт, зах зээлийн үнэлгээний өсөлтөөрөө нээлттэй ББСБ-уудыг тэргүүлэв. Цэвэр ашиг нь энэ оны III улиралд 16.4% өссөн бөгөөд 2024 оны цэвэр ашгаасаа 9.85%-ийн өгөөжтэй ногдол ашиг хуваарилсан юм. Хамгийн чухал нь $LEND ногдол ашгийн төлөлтийн өдрөө тогтмол тодорхой зарладаг компани. Хураангуйлан харахад, ЛэндМН ББСБ ХК 2025 оныг Lendable Asset Management-с $20 саяын санхүүжилт

ХААН Банк ХК: Өсөлт үргэлжилсээр

Банкны салбартаа тэргүүлэгч ХААН Банк ХК (KHAN) энэ онд санхүүгийн болон зах зээлийн үзүүлэлтээ өсгөснөөс гадна салбарт нөлөө үзүүлэх олон санаачилгыг хэрэгжүүлж, банкны эх үүсвэрээ солонгоруулах олон санхүүжилтийг амжилттай татав. Тэдний хувьд нийгмийн хариуцлагаар манлайлагч байгууллагаар 4 дэх удаагаа шалгарсан. Учир нь “Багийн бага сургууль” төслийг ₮5 тэрбумаар санхүүжүүлж байгаагаас гадна Монголын анхны Жендер бондыг гаргаж ₮30 тэрбумын санхүүжилтийг босгосон билээ. Үүнээс гадна $KHAN тогтвортой хөгжлийн зорилтдоо уялдуулан салбар нэгжүүдээ сэргээгдэх эрчим хүчээр хангах гэх мэт ногоон чиглэлд олон санаачилга хэрэгжүүлж буй. 

• Ногоон тоонууд: $KHAN-н санхүүгийн хувьд энэ оны III улиралд цэвэр ашгаа 13.6% өсгөж ТОП-5 банк дундаа ганцаар ашгаа өсгөсөн банк болсон билээ. Мөн 2024 оны цэвэр ашгаасаа 16.1%-ийн өгөөжтэй ногдол ашиг тараасан байна. Улмаар тэдний жижиг хувьцаа эзэмшигчдийн тоо энэ оны 11-р сарын байдлаар өнгөрсөн оны төгсгөлөөс 2,443-өөр нэмэгдсэн нь ТОП-4-т бичигдэх амжилт болов. Түүнчлэн уг банкны хувьцааны үнэ он гарснаас хойш 16% өссөн байна. Үүнээс гадна хагас жилийн кодексийн үнэлгээгээр ТОП-20 компанийг тэргүүлсэн аж. 

Инновэйшн Инвестмент ХК: Ширүүн өсөлт 

Инновэйшн Инвестмент ХК (QPAY) 2023 оны сүүлээр IPO хийсэн. Тэдний хувьд оройхон гараад ширүүхэн дайрна гэгчээр 2024 оны сүүлээр буюу IPO хийснийхээ 1 жилийн дараагаас МХБ-ийн II ангилалд бүртгэгдэж, энэ оны 3-р сард ТОП-20-н сагсанд орсон билээ. Хамгийн гол нь компани IPO хийгээд нээлттэй компани болсноосоо хойш жижиг хөрөнгө оруулагчдын эрх ашигт анхаарч, хагас жил тутамд IR Calendar-аа зарлаж явсан юм. Үүнд хэзээ ногдол ашиг тараах, хэзээ хувьцаа эзэмшигчдийн хурлаа хийх, хэзээ чухал арга хэмжээ болох гэх мэт жижиг хөрөнгө оруулагчдад хэрэгтэй бүх мэдээллийг багтаасан аж. 

• Нэмэх үзүүлэлт: $QPAY-н хувьд хагас жил тутамд ногдол ашиг хуваарилдаг цөөн хэдэн компанийн нэг. Иймдээ ч тэдний жижиг хувьцаа эзэмшигчдийн тоо он гарснаас хойш 2,435-аар нэмэгдэж, өсөлтөөрөө ТОП-5-д орсноос гадна хувьцааны үнэ нь 6% өсжээ. Мөн тэдний 2024 сүүлийн хагас жилийн цэвэр ашгаас тараасан ногдол ашгийн өгөөж нь 9.51% байсан аж. 

Эрдэнэ Ресурс Девелопмент Корпорэйшн ХК: Онцлох амжилт

Эрдэнэ Ресурс Девелопмент Корпорэйшн ХК (ERDN)-ийн МХБ-д бүртгэлтэй хувьцааны үнэ энэ он гарснаас хойш хамгийн ихээр буюу 106% өсөөд байна. Учир нь энэ онд $ERDN-н энгийн хувьцааг тус компанийн Канад Улсын Торонтогийн хөрөнгийн биржид нэмж бүртгэсэн 50,000 ширхэг хувьцаагаар нэмэгдүүлснээс гадна компани өнгөрсөн 9-р сард Баянхөндий төслийн анхны алтыг үйлдвэрлэсэн билээ. Улмаар энэ оны эцэст олборлолтыг тогтворжуулахаар төлөвлөж буй. 

• Ирээдүйг харсан өсөлт: Компанийн Баянхөндий боловсруулах үйлдвэр нь жилд 650,000 тонн хүдрийг боловсруулж, 85,000 унц алтыг олборлох хүчин чадалтай гэж тогтоогдсон буюу цаашид үйл ажиллагаа нь улам өргөжих хүлээлт үүсээд буй. Үүнээс гадна компани Тэрэг Уул зэс-алтны порфирийн илрэл бүхий талбайн 80 хүртэл хувь эзэмших эрхийг авах опцион гэрээнд гарын үсэг зурсан. Улмаар $ERDN-н хувьцаа хөрөнгө оруулагчдын өсөх ирээдүйтэй хувьцааны байнд тусаад байна. 

Премиум Нэксус ХК: Халааслалтыг дагасан өсөлт

Премиум Нэксус ХК (CUMN)-ийн ашиг энэ онд арвинаар үржсэн билээ. $CUMN-г IPO хийх үед хэзээ ашигтай ажиллах нь хүн бүхэнд сонирхолтой сэдэв байсан. IPO-с өмнөх жилүүдэд компанийн борлуулалт тогтмол өсөж байсан ч тогтмол алдагдал хүлээдэг байлаа. Энэ хүлээлтийн эцэст компани 2024 оны эхний хагаст анх удаа ₮10.7 тэрбумын ашигтай ажилласан. Харин энэ оны эхний хагаст цэвэр ашиг нь 47.6% өсөж ₮15.7 тэрбумд хүрсэн байна. Үүнд борлуулалтын орлогын 37.3%-ийн өсөлт нөлөөлсөн. Үйл ажиллагааны хувьд ч салбарын тоо нь тэлж өнгөрсөн 8-р сарын байдлаар 15 аймагт 500 гаруй салбар дэлгүүртэйгээр үйл ажиллагаа явуулж буй. 

• Чухал шийдвэр: Үүнээс гадна өнгөрсөн сард Премиум Нэксус ХК-ийн нэгдмэл сонирхолтой хувьцаа эзэмшигчид нь компанийн нийт энгийн хувьцааны 75%-ийг эзэмшдэг болж хувьцаа эзэмшигчдийн эзэмшиж байгаа энгийн хувьцааг компанид буцааж худалдахыг шаардах эрхтэй болсон. Улмаар нэгж хувьцаагаа сүүлийн 6 сарын жигнэсэн дундаж үнээс 75.2%-иар илүү дүнгээр буюу ₮350-өөр худалдаж авах санал гаргасан. Үүний дүнд $CUMN-н хувьцааны үнэ он гарснаас хойш 50% өсөөд байна.

Сэндли ББСБ ХК: Хувьцаа эзэмшигчдийн онилох цэг

Сэндли ББСБ (SEND)-ын жижиг хувьцаа эзэмшигчдийн тоо энэ онд 2,910-аар өсөж, өсөлтөөрөө ТОП-2-т жагсаж байна. Харин тус хугацаанд компанийн хувьцааны үнэ 11% өсжээ. Мөн тэд 2024 оны цэвэр ашгаасаа нэгж хувьцаанд ₮7.61-ийн ногдол ашиг тарааж, хувьцаа эзэмшигчдэдээ 5.2%-ийн өгөөж өгчээ. Түүнчлэн цэвэр ашгийн хувьд, энэ оны III улиралд жилийн өмнөхөөсөө 19% нэмэгдэж ₮7.2 тэрбум болсон аж. Нэмж дурдахад компани cүүлийн 2 жилийн турш ногдол ашгийн төлөлтийн өдрөө тодорхой зарлаж, сайн жишиг тогтоож буй компаниудын нэг. 

• Анхдагч үзүүлэлт: Тэдний энэ жилийн үйл ажиллагаанаас онцолбол, 9-р сард Өмнөд Солонгосын хөрөнгийн зах зээлд 10 жилийн хугацаатай, ₩2 тэрбумын Ариранг бондыг амжилттай гаргасан анхны монгол компани болсон. Мөн Sendly апп цар хүрээгээ тэлж Европын 27 улс, Австрали, Америк, Япон, Хонгконг, Сингапур болон Канад зэрэг 33 улсаас Монгол руу гүйлгээ хийх боломжтой болсон байна. 

Юутай ч бидний зүгээс 2025 оны “Онцлох компаниудаа” ололт, амжилттай нь танилцуулж дууслаа. Харин одоо таны хувьд энэ оны “Онцлох компани” аль компани нь байв? Саналаа идэвхтэй өгөөрэй. 🍋