Өмнөд Солонгос улс төрийн кампанит ажилдаа “Зан төлөвийн тест” (MBTI) ашигласан анхны улс боллоо. Дэвшил үү? Дэмийрэл үү?

👔 Удирдагч төрдөг нам

Юу болсон бэ гэхээр, Ард түмний хүч намын дотоод сунгааны үеэр ирэх 6 сарын 3-нд болох Өмнөд Солонгосын Ерөнхийлөгчийн сонгуульд нэр дэвшигчид MBTI төрлөө тодорхойлж, олон нийтэд нээлттэй танилцууллаа. 

• 🙋 Бүгд экстроверт: Тэдний тэн хагас нь өөрсдийгөө ENTJ гэж танилцуулсан бол үлдсэн нь ESFJ, ESTJ болон ENFJ гэхчлэн тодорхойлж. Барак Обама, Нельсон Мандела, Опра Уинфри гээд ENFJ зан төлөвтэй улс төрчид угаас олон. Анзаарвал, эд бүгд MBTI-н улс төрийн луужингийн “удирдагч” хэв шинжийг агуулсан интервалын ноён оргилуудад байна. 

Өмнөд Солонгосын ард түмэн хэзээний энтертайнмент трэндэд амь тавин хошуурцгаадаг. Тэндхийн 2021 оны насанд хүрсэн 1,000 иргэдийн дунд хийсэн судалгаагаар л гэхэд MBTI-д итгэдэггүй хүмүүс 35%, итгэдэг хүмүүс 36% байсан бол 20-иод насныхны 52% нь итгэдэг гэж тодорхойлсон байна.  

• 💯 Ташраараа итгэдэг: 2021 онд Өмнөд Солонгосын нийт иргэдийн тал хувь буюу 25.9 сая хүн, харин 19-28 насныхны 90% нь MBTI тест өгч байжээ. Түүнчлэн 16Personalities дээр л гэхэд сар бүр 730 мянга гаруй Өмнөд Солонгосчууд MBTI тест өгдөг тооцоо гарч.

🌀 Соёлын популизм

Анх 2022 оны Ерөнхийлөгчийн сонгуулиар Юн Сок Ёл MBTI төрлөө ENFJ гэж зарлаж байв. Эндээс харахад тус намын хувьд аливаа сонгуульд улс төр ба соёл хооронд эвтэйхэн огтлолцдог “Би та нарын нэг” ойлголтыг ард түмэнд төрүүлэх стратеги ашиглах хандлагатай аж. 

• ☝️ Тэр цагаас Өмнөд Солонгосын ард түмний эрх баригч намд итгэх итгэл бууран буурсаар Юн Сок Ёлийн импичментээс хойш 39%-д хүрсэн. Харин сөрөг хүчинд итгэх итгэл 44.3% хүртэл өссөн байна. 

Хэдийгээр 16 тестээр 8 тэрбум хүний зан чанарыг яг таг тодорхойлох нь учир дутагдалтай ч, энтертайнмент соёлын нөлөөгөөр “үнэмшилтэй” брэнд болжээ. Энэ ч утгаараа улс төрийн салбарт ард түмний ой тойнд хоногших стратегийн хэрэгсэл болж эхлэв. Гэвч улс төр бол бодлого, хариуцлага, үнэт зүйл дээр тогтдог тогтолцоо гэдгийг санах хэрэгтэй.