Өнгөрсөн 7 хоногт гарсан хүн ам, орон сууцны завсрын тооцооллоор гадаадад оршин суугаа Монгол Улсын иргэдийн тоо 201.4 мянгад хүрчээ. Энэ нь 5 жилийн өмнөхөөс 79 мянгаар буюу ойролцоогоор 64% өссөн үзүүлэлт юм. Хууль ёсоор бүртгэгдсэн нь л энэ гэхээр… 🤕

🇰🇷 Өмнөд Солонгост бумаараа

Өмнөд Солонгост хамгийн их монголчууд байгаа буюу 51.2 мянга, араас нь Америкт 31.8 мянга, Японд 19.1 мянга, Австралид 14.5 мянга, Чехэд 10.5 мянга, Германд 9.3 мянга гэх зэргээр суурьшиж буй. Өөрөөр хэлбэл, зөвхөн эдгээр зургаан улсад нийт гадаадад суугаа иргэдийн 68% нь төвлөрчээ.

• 📌 Хэдэн жил болов? Нийт иргэдийн 76.7 мянга нь тухайн улсад 0-1 жил, 59 мянга нь 2-5 жил амьдарч байна. Харин 6+ жил амьдарсан иргэд 65.6 мянга, үүнээс 11+ жил болсон нь 31 мянга байна. Энэ 31 мянга гэдэг тоо 5 жилийн өмнө 15.9 мянга байж. Гадаадад удаан амьдрах сонирхолтой хүмүүсийн тоо жилээс жилд нэмэгдэж байгаа нь харамсалтай.

🌍 Улс орны онцлог

Улс орноор нь харвал суурьшлын хэв шинж ихээхэн ялгаатай. Тухайлбал, Казахстан дахь монголчуудын 55.4% нь 6+ жил амьдарсан бол Америкт энэ үзүүлэлт 41.2%, Австрид 41.1%, Францад 39.9% байна. Харин Хятадад амьдарч буй монголчуудын 82.9% нь 5 жилээс бага, Японд 78.4% нь 5 жилээс бага хугацаатай байна.

• 🤔 Юу хэлнэ вэ? Энэ нь Монголын гадаад шилжилт хөдөлгөөн хоёр өөр дүр зурагтай болсныг харуулж буй. Нэг талд сүүлийн жилүүдэд шинээр гадагш чиглэсэн урсгал томорч нөгөө талд Америк, Европт олон жил амьдарсан монголчуудын бүлэг бүрэлджээ.

Эцэст нь… Гадаадад байгаа иргэд 201 мянгад хүрсэн гэдэг нь зөвхөн статистик тоо биш. Харин Монголын хөдөлмөрийн зах зээлээс гарч буй хүн амын хэмжээ, гадаадад бий болж буй Монголын диаспора, цаашлаад Монгол руу чиглэх мөнгөн гуйвуулга, ур чадварын эргэлт зэрэг асуудлыг зэрэгцүүлэн харах шаардлагатайг харуулсан тоо юм. Эрх баригчид маань нэгийг бодом зээ.