Монгол Улсын ЗГ ирэх оны төсвийн төслийг УИХ-д өргөн бариад буй. Тэгвэл ирэх оны төсвийн орлого, зарлагын төсөөлөл ямар байгааг харцгаая. 

Орлого 

Боомтуудын сэргэлт эрчимжиж, экспорт нэмэгдэх тул ирэх оны нэгдсэн төсвийн нийт орлогыг өнгөрсөн оныхоос 20.4% нэмэгдүүлэн ₮19.6 их наядад хүрнэ гэж тооцоолжээ. Тодруулбал,

• Татварын орлого: Нийт төсвийн орлогын 87%-ийг татварын орлого бүрдүүлэх бөгөөд татварын орлогын төсөөллийг өнгөрсөн жилийнхээс 25.2% нэмэгдүүлсэн аж. Уг төсөөллийн орлогын бүрдэлтийг задалж харвал, нэмэгдсэн орлогын албан татвар хамгийн өндөр буюу 26.5%, харин НДШ 21.1%-ийг тус тус бүрдүүлэхээр байна. Засаг төр маань татварын орлогоо ингэж нэмэгдүүлэхийн тулд ХХОАТ-ыг шаталсан байдлаар авна, тансаг хэрэглээнд татвар ногдуулна гээд л олон арга сүвэгчилж байна даа. 
• Уул уурхайн орлого: Ирэх онд нүүрсний экспортын хэмжээ нэмэгдэж 36.5 сая тн, зэсийн баяжмалын экспортын хэмжээ 1.4 сая тн-д тус тус хүрч уул уурхайн салбар ₮4.9 их наядын орлого олох гэнэ.

Төр тэвчинэ 🙈

Төр ирэх онд хэмнэлтийн тухай хуулийн дагуу тэвчиж болох урсгал зардлуудаа 50% бууруулж нийт ₮240 тэрбумыг хэмнэх гэнэ. Тэгвэл хаана, хэдийг төсөвлөсөн бэ?

• Халамж: Нийгмийн халамжийн санд ₮596.8 тэрбумыг төсөвлөсөн нь өнгөрсөн оныхоос 23.6% нэмэгдсэн дүн.
• Боловсрол: Мэргэжлийн боловсрол, сургалтыг дэмжих сангийн төсөв ₮85 тэрбум бөгөөд энэ нь өнгөрсөн оныхоос 153.7% өссөн төсөв аж. 
• Томчуул: Нийт төсвийн 59.3% буюу ₮3.7 их наядыг НДС-д, ₮1.5 их наядыг ЭМДС-д төсөвлөжээ. 
• Та нарыг хаслаа: Харин Шинжлэх ухаан, технологийн сан, хөдөлмөр эрхлэлтийг дэмжих сан, ЗГ-ын нөөцийн сангийн төсвийг багасгажээ. Шинжлэх ухаанаа хэдийг хүртэл орхигдуулах юм бол доо.  

Эцэст нь… Төсвийн орлого хэт өөдрөг л санагдлаа. Одоо УИХ-аар орж хэлэлцэгдэх бөгөөд нэмэлт өөрчлөлтүүд орох нь тодорхой биз ээ.