Монголчуудын суралцах, амьдрахад мөрөөдлийн орон гэгддэг Австрали цагаачлал, оюутны визний зохицуулалтаа эрс чангатгахаар боллоо.

🗣️ Хүлээсэн мэдэгдэл

Австралийн Дотоод хэргийн сайд Тони Бөрк визний өөрчлөлтийн талаар анх өнгөрсөн 8-р сарын эхээр танилцуулахаар төлөвлөж байсан ч ЗГ дотроо нэгдсэн байр сууринд хүрээгүй тул шийдвэр 6 долоо хоногоор хойшилжээ. Харин өчигдөр тус улс энэ санхүүгийн жилд хүлээн авах цагаачдын тоог 47.1 мянгаар бууруулж 245 мянгад хүргэх төлөвлөгөөгөө танилцуулж, визний шинэ зохицуулалтаа зарлав.

• 🙅🏻‍♀️ Гэр бүлээ авчрахгүй: Шинэ журмаар оюутны виз мэдүүлэгчдийн дийлэнх нь гэр бүлийн гишүүдээ дагуулан ирэх эрхгүй болох аж. Өнгөрсөн жил гэхэд 337 мянган оюутны визний 45 мянга орчим нь гэр бүлийн гишүүдэд олгогдсон гэнэ.
• 🚫 Визээ өөрчилж болохгүй: Австралид байх хугацаагаа сунгах зорилгоор нэг визний ангиллаас нөгөө рүү шилждэг "Visa hopping" механизмыг хатуу зогсоох гэнэ. Түүнчлэн жуулчны визээр ирсэн иргэд Австрали дотроосоо өөр виз рүү шилжих боломжгүй болгох заалтыг заавал тусгаж, өргөжүүлэх аж.
• 👋🏻 Албадан гаргана: Австралид визгүй, хууль бусаар амьдарч буй 77 мянган иргэнийг эрэн сурвалжлах үйл ажиллагааг Австралийн Хил Хамгаалах Алба (ABF) болон холбогдох байгууллагууд эрчимжүүлж, албадан гаргах ажлыг эрчимжүүлэхээр тусгагджээ.

🔎 Австрали дахь Монголчууд

2025 оны 6-р сарын байдлаар Монголд төрсөн 14.9 мянга орчим иргэн Австралид амьдарч байгаа аж. Мөн Австралийн Боловсролын яамны мэдээлснээр, энэ оны эхний байдлаар 4.4 мянган Монгол оюутан тус улсад суралцаж байна. Тэгэхээр шинэ өөрчлөлт нь Австралид суралцах, ажиллах эсвэл гэр бүлийн гишүүнээ дагуулан амьдрахаар төлөвлөж буй Монгол иргэдэд шууд нөлөөлөхөөр байна. 

Эцэст нь… Энэхүү өөрчлөлтийг хууль батлуулахгүйгээр Засгийн газрын журам, зохицуулалтаар шууд хэрэгжүүлэх аж. Тиймээс Австрали руу зорчих төлөвлөгөөтэй хүмүүсийн хувьд шинэ журмыг сайтар анхаарах шаардлагатай болж байна шүү.