
ҮСХ-ны Өрхийн нийгэм, эдийн засгийн судалгааны дүнгээр энэ оны III улиралд нэг өрхийн сарын дундаж бодит орлого ₮2.7 сая болж жилийн дотор ₮61.1 мянгаар, өмнөх улирлаас ₮8.5 мянгаар буурчээ.
😢 Цаасан дээрх өсөлт, халаасан дахь бууралт
Нэрлэсэн дүнгээр орлого ₮3.6 сая болж 10.3% өссөн ч үнийн өсөлт түүнээс давсан тул худалдан авах чадвар суларсан хэрэг. Сард ₮5 саяас дээш орлоготой өрхийн тоо 107.2 мянгаар нэмэгдсэн нь бодит баяжилт гэхээсээ илүү дан үнийн дүнгийн өсөлт байсан аж.
🔻 Бизнесийн орлого унав
Бууралтын гол шалтгаан нь өрхийн үйлдвэрлэл, үйлчилгээний орлого 11.4%, тэр дундаа ХАА-н бус бизнесийн орлого 24.1% унасан явдал. Мөн хөрөнгийн орлого 65.8%, бусдаас авсан тусламж 30.4% буурчээ. Харин бодит цалин 2.5%, тэтгэвэр, тэтгэмж 3.6%, ХАА-н орлого 23.3% тус тус өсөж, уналтыг зөөллөв. Мөнгөн орлогын 59.5%-ийг цалин бүрдүүлж, өрхүүд цалиндаа улам түшиглэх болжээ.
🥺 Хэрэглээгээ танаж, зээлээ төлж байна
Бодит зарлага ₮144.8 мянгаар буурсан нь орлогын бууралтаас 2 дахин их. Хүнсний бус бараа, үйлчилгээний зардал 7.2% танагдаж, хүнсний зардал 2% өссөн нь өрхүүд зайлшгүй хэрэгцээндээ төвлөрч байгааг харуулна. Харин сарын дундаж зээлийн төлөлт ₮810.9 мянга болж 24.6% нэмэгдсэн бөгөөд нэрлэсэн орлогын 22.6%-ийг эзэлж байна. Өмнөх онд энэ дүн 20.0% байж. Өрхүүд хэрэглээнээсээ хумсалж зээлийн төлбөрт илүү мөнгө хуваарилж байна даа.
📌 Эрсдэл хэнд илүү тусах вэ?
Сард ₮1.1 саяас доош орлоготой өрхийн мөнгөн орлогын 83.5%-ийг тэтгэвэр, тэтгэмж бүрдүүлдэг тул тэд үнийн өсөлтөд хамгийн эмзэг байна. Цалингийн өсөлт үнийн өсөлтийг гүйцэхгүй бол өрхийн санхүүгийн дарамт цаашид нэмэгдэх эрсдэлтэй хэцүүхэн дүр зураг ажиглагдаж байна даа.
Сэтгэгдэл
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд lemonpress.mn хариуцлага хүлээхгүй.