Монголын Хөрөнгийн Бирж (МХБ)-д бүртгэлтэй компаниудын үнэлгээ ээлж дараатайгаар түүхэн рекордоо эвдсээр ₮17.1 их наядад хүрээд байна. Энэ өсөлтөд юу нөлөөлж байна вэ? 

💸 Зах зээлийн 2/3 =5

ХААН Банк (KHAN), Тавантолгой (TTL) гэх 2 компанийн үнэлгээ ₮3 их наядыг давснаар нийт үнэлгээний 41%-ийг бүрдүүлж буй. Энэ 2 дээр нэмээд ХасБанк (XAC), АПУ (APU), Эрдэнэ Ресурс (ERDN) гэх 5 компанийн үнэлгээ нийлээд ₮11 их наяд болсноор зах зээлийн үнэлгээний 64.5%-ийг эзэлж байгаа хэрэг. ТОП-20-ийг авч үзвэл зах зээлийн 92%-ийг эзэлж,үлдсэн 140 компанид ердөө 8% нь ногдож байна.

🏦 Санхүүгийн салбарын давамгайлал 

ТОП-20 компанийн 12 нь санхүүгийн салбарынх бөгөөд зах зээлийн нийт үнэлгээ нь ₮9.3 их наяд буюу том жингийн 55%-ийг эзэлнэ. Үүний цөм нь мэдээж системийн 5 банк. Нийтэд нээлттэй болсон банкнууд биржийн гол хөдөлгүүр болсон бол Инвескор (INV), ЛэндМН (LEND) зэрэг ББСБ-ууд салбарын жинг улам нэмж буй.

• ⚒️ Уул уурхай ба бусад салбар: Тавантолгой, Эрдэнэ Ресурс гэх 2 компани нийт зах зээлийн үнэлгээний 25%-ийг дүүргэж байна. Хүнсний салбарыг АПУ, Сүү (SUU) 2 төлөөлж 8%-ийн нөлөө үзүүлж. Харин бусад салбарын компаниуд нийлээд ердөө 4.4%-ийг бүрдүүлж байна.

📌 Төвлөрлийн эрсдэл 

Өндөр төвлөрөл мэдээж эрсдэл дагуулна. ХААН Банк, Тавантолгой 2-ын хувьцаа 10%-иар савлахад л нийт зах зээлийн үнэлгээнээс ₮700 орчим тэрбум арчигдана. Өөрөөр хэлбэл, биржийн рекорд нь нийт зах зээлийн бус, цөөн компанийн гүйцэтгэлийг илэрхийлж буй. Иймд манай зах зээлд шинэ IPO, шинэ бүтээгдэхүүнүүд тун хэрэгтэй байна даа.