Mixmag Lab нь электроник хөгжим болон клуб соёлын чиг хандлагыг тодорхойлогч нэр бүхий live stream session хүргэдгээрээ танигдсан алдарт нэгдэл юм. Их Британийн DJ, электроник хөгжмийн салбарын хамгийн эртний, том сэтгүүлүүдийн нэг болох Mixmag-аас санаачлан эхлүүлсэн ба өдгөө Лондон, Нью-Йорк, Лос-Анжелес, Ибиза, Сидней, Сөүл, Бали зэрэг дэлхийн гол хөгжмийн төвүүдэд байрлах студиүдэд арга хэмжээнүүд тогтмол зохион байгуулдгаараа танигдсан билээ. 

Хөгжмийн шүтэн бишрэгчдэд хэдийн танигдсан уг нэгдэл энэ жил Төв Азид анх удаа ирж байгаа бөгөөд анхны зогсоолоор Монгол Улсыг сонгожээ. Mixmag Lab Asia болон KHARKHORUM фестиваль хамтран 2026 оны 7-р сарын 24-нд ZU Ballroom-д "The Mixmag Lab Mongolia" төслийг Улаанбаатар хотод зохион байгуулж, анхны үйл ажиллагаагаа эхлүүлэхээр бэлдээд байна. Арга хэмжээний хувьд Монголын электроник хөгжмийн урсгалыг тодорхойлж буй уран бүтээлчид болон олон улсад танигдсан зочдын хамт line up-аа зарлажээ.

Уран бүтээлчид

• Biliguudei: Монголд хаус болон техно урсгалаар дагнан тоглодог анхдагчдийн нэг хэмээн тодорхойлогддог Biliguudei нь Берлиний Электрон хөгжмийн сургуулийг (The Electronic Music School Berlin) төгссөн бөгөөд ADE, Wonderfruit, Savage, Social Room, Стокгольмын Bronx Bastun зэрэг нэр бүхий газруудад тоглосон билээ. Хөгжмийн хувьд түүний сетүүдээс техно, намуухан хаус, космик брейкс зэрэг шинэлэг өнгө аясыг мэдрэх боломжтой.
• Gonno: Японы электроник хөгжмийн урсгалыг эхлүүлэгчдийн нэг тэрбээр хөгжмийн үнэнч хорхойтнуудад хэдийнээ танил болсон чадварлаг уран бүтээлч. Ази болон бусад улсуудад өөрийн бүтээлээрээ танигдан, Ben UFO зэрэг домогт уран бүтээлчдэд үнэлэгдсэн сонсогчдын хамгийн дуртай уран бүтээлчдийн нэг юм.
• CMT: Дуу хөгжмийн тогтсон хил хязгаарыг ямагт эвдэж, бүтээлч ажлуудаараа гүн гүнзгий, нухацтай сет бэлдэн хүргэдгээрээ алдартай. Түүний сетүүд нь түүх өгүүлэх мэт сонсогддог нь онцлог бөгөөд тэрээр дуу авиагаар дамжуулж хэвшмэл болсон ойлголтуудыг тэлж буй Япон уран бүтээлч юм.
• Anu Dol: Anu Dol зөвхөн нэг жанрт баригдалгүй хаус, техно, минимал техно, диско болон бусад хэмнэлүүдийг чадварлагаар хослуулдаг. Түүний сетүүд ихэвчлэн сонсогчдод хүнд бус, харин дулаахан, хөнгөн бөгөөд тансаг хэмнэлийг мэдрүүлдэг.

2012 онд байгуулагдсанаас хойш The Mixmag Lab нь сая сая хүмүүст Carl Cox, Peggy Gou, Solomun, Charlotte de Witte зэрэг дэлхийн хэмжээний супер оддын сетүүдийг шууд дамжуулж, урьж оролцуулж байсан. Уг амжилтыг үргэлжлүүлэн Монгол улсад нэр бүхий уран бүтээлчдийн хамт эвентийг зохион байгуулж байгаа нь бүтээлч салбарын хувьд томоохон амжилт болж байна. 

Хэзээ: ZU Ballroom-д 7-р сарын 24

Хугацаа: 22:00 – 04:00 

Тасалбар: Эвентийн өдөр шууд үүднээсээ борлуулагдана. (Үнэ: ₮39,000)

Эх сурвалж: The Mixmag Lab