Дэлхийн түүхэнд тодоор тэмдэглэгдэн үлдсэн 9 сарын 11-ний өдрийн халдлага болсноос хойш 20 жил өнгөрчээ. Тус аймшигт халдлагын улмаас Америкийн эдийн засагт шууд болон шууд бусаар хэрхэн нөлөөлсөн талаар баримтуудыг хүргэе.

Түүхийг сөхвөл...

2001 оны 9 сарын 11-ний өглөө “Аль Кайда” бүлэглэл АНУ-ын зорчигч тээврийн 4 онгоцыг барьцаалж, дэлхийн худалдааны төвийн 2 барилга болон Пентагоны байрыг мөргөж нураасан юм. Тус халдлагаар 2,977 хүн нас баржээ. Мөн NYSE, Nasdaq биржүүд халдлагын дараа 1933 оноос хойш хамгийн удаан хаалттай байсан гэдэг.

Эдийн засагт үзүүлсэн нөлөө:

• $500 мянга: 9 сарын 11-ний халдлагыг төлөвлөж, гүйцэтгэхэд шаардагдах мөнгөний хэмжээ.
• $123 тэрбум: Дэлхийн худалдааны ихэр цамхаг нурсны дараах 2-4 долоо хоногийн хугацаанд гарсан эдийн засгийн хохирлын мөнгөн дүн.
• $60 тэрбум: Ойролцоох барилга, байгууламж, дэд бүтэц, метроны буудалд учирсан хохирлын хэмжээ. 
• $40 тэрбум: 2001 оны 9 сарын 14-нд АНУ-ын Конгрессоос баталсан яаралтай терроризмтой тэмцэхэд зарцуулагдсан мөнгөн дүн.
• $9.3 тэрбум: Тус халдлагаас үүдэлтэй даатгалын хохирлын хэмжээ. 
• $750 сая: Хохирлоос үүдэж бий болсон 1.8 сая тн хог хаягдлыг 2002 оны 5 сарын 30-нд бүрэн цэвэрлэж дууссан бөгөөд нийт $750 саяыг зарцуулжээ.  

Дүгнээд харвал...

АНУ-ын олон агаарын тээврийн компани дампуурч, нислэгүүд цуцлагдаж, аюулгүй байдлын шалгалтыг чангаруулсан. Мөн түүхий эдийн фьючерсийн арилжаа зогсож, олон улсын хил дамнасан түүхий эдийн импортыг зогсоосноор ХАА салбар санхүүгийн томоохон алдагдал хүлээсэн гэдэг. Тэд халдлагын дараах он жилүүдэд ч их хэмжээний хохирол амссан ба одоо ч үр нөлөө нь үргэлжилсээр буй юм.