Playtime Festival 2024 оны regular тасалбар 5 сарын 30-ны 12:00 цагаас эхлэн наадам дуустал наадмын албан ёсны тасалбар борлуулагч shoppy.mn-р борлуулагдаж эхэллээ.

Playtime Festival 2024 наадам нь бууриа сэлгэн шинэ газар болох бөгөөд Налайх дүүргийн нутаг дэвсгэрт 7 сарын 4, 5, 6, 7-ны өдрүүдэд буюу нийт 4 өдрийн турш зохион байгуулагдах билээ.

“earth. music. art. love.” уриан дор хөгжмөөр дамжуулан залууст эерэг хандлага түгээн ногоон хөгжилд уриалдаг Playtime Festival нь бүхий л үйл хэргээрээ ногоон тогтвортой хөгжилд хувь нэмрээ оруулан ажилладаг. Тэр ч утгаараа энэхүү зорилго, зорилтоо улам бататган “Playtime тогтвортой ногоон хүрээлэн” байгуулж үлгэр жишээ ногоон наадам болохоор зорин ажиллаж байна. 

Playtime 2023 оны үзэгчид тасалбар авбал үндсэн тасалбарын үнээс 50% хөнгөлөлтэй тасалбар авах боломжтой бөгөөд наадмын зүгээс хөнгөлөлтийг 7 хоногийн хугацаатай ахин зарласан байна. Playtime 2023 оны сүүлийн өдөр үер усны аюул, гамшгийн нөхцөл байдалтай холбогдуулан Онцгой байдлын албаны өндөржүүлсэн бэлэн байдлын нөхцөлийн дагуу давагдашгүй хүчин зүйлийн улмаас цуцлагдсан билээ. Хэдийгээр сүүлийн өдөр зохион байгуулагчдын үйл ажиллагаа, хүсэл зоригоос үл хамааран цуцлагдсан ч наадмын зохион байгуулагчдын зүгээс хөгжимд хайртай үнэнч үзэгчдэдээ 2024 оны тасалбарыг 50% хөнгөлөлттэй үнээр борлуулахаа амласан юм.

Тэгвэл 2023 оны энгийн болон VIP тасалбар авсан бүх үзэгчид regular тасалбар борлуулалтын эхний 7 хоногт энэхүү эрхээ эдлэх боломжтой аж. Энэхүү хөнгөлөлт нь энэ жилийн сүүлчийн хөнгөлөлт учир та бүхэн 5 сарын 30-наас 6 сарын 6 хүртэл 7 хоногийн хугацаанд regular тасалбараа амжиж аваарай.

Дурсамж дүүрэн зуны өдрүүд таныг хүлээж байна.

earth. music. art. Love.

Эх сурвалж: Playtime