Голомт банкны IPO-н захиалгын үнийн дүн ₮175.8 тэрбумд хүрч 148%-ийн биелэлттэй хаагдлаа. Ингэснээр тэдний ХЗЗ-ээс татан төвлөрүүлсэн дүн нь ээлжит түүхэн хэмжээг тогтоов.

Түүх шинэчлэгдсэн нь...

Төрийн банк (SBM)-ны IPO дуусахад захиалгын дүн болон биелэлтийн хувь нь Монголын ХЗЗ дээрх хамгийн хамгийн болоод буй талаар бичиж байлаа. Гэтэл яг 55 хоногийн дараа энэ түүхийг Голомт банкны IPO шинэчлэх нь тэр. Тэдний босгосон ₮118.8 тэрбумын хөрөнгө нь сүүлийн 10 IPO-р босгосон ₮246.9 тэрбумын 48.1%-ийг дангаараа бүрдүүлж буй. Мөн нийт хөрөнгө оруулалтын захиалга нь ₮175.8 тэрбумд хүрсэн нь урьд харагдаагүй өндөр дүн боллоо.

Тэд хэрхэн энэ хэмжээний хөрөнгийг татав?

• Стратегийн хөрөнгө оруулагчид 80%: Тэд нийт хувьцааны 80% буюу ₮82.6 тэрбумыг нь стратегийн хөрөнгө оруулагчдаасаа татан төвлөрүүлсэн. Стратегийн хөрөнгө оруулагчид нь багадаа ₮200 саяын хөрөнгө оруулалт хийх нөхцөлтэй ба IPO-с хойш 6 сараас дээш хугацаанд хувьцааг тусгаарлах нөхцөлтэй.
• Олон нийт 20%: Харин үлдсэн 20% буюу ₮20.7 тэрбумыг нь олон нийтийн хөрөнгөөр босгожээ. Манай уншигчид уг түүхэн хөрөнгө оруулалтын нэг хэсэг нь шүү дээ. Учир нь бидний явуулсан Голомт банкны IPO оролцох эсэх талаар асуулгад бараг 500 хүн оролцсоны 53.2% нь оролцоно хэмээн хариулсан байсныг уламжилъя.

Жич: Greenshoe-тэй холбоотойгоор дээрх харьцаа өөрчлөгдөх боломжтой. 

Хэрхэн хуваарилах вэ?

Тэдний IPO-н захиалга татан төвлөрүүлэх дүнгээсээ 1.5 дахин давж биелсэн. Үүнтэй холбоотойгоор Голомт банк болон андеррайтер нь нэмж 80.4 сая хувьцааг стратегийн бус хөрөнгө оруулагчдад хуваарилахаар болсон. Хэдий нэмж хувьцаа гаргасан ч хөрөнгө оруулагчдын эрэлтийг хангаж чадахгүй тул ₮12,850 хүртэлх бүх захиалгыг 100% биелүүлж түүнээс давсан үнийн дүн бүхий захиалгуудыг хувь тэнцүүлэх аргаар хуваарилах юм. Харин стратегийн хөрөнгө оруулагчдын захиалга 100% биелнэ.