Системийн нөлөө бүхий 5 банкны тайлан бүрэн гарч банкнуудын үйл ажиллагааг том зургаар харах цаг бидэнд ирлээ.

Ерөнхийдөө өмнөх жилийн мөн үетэй харьцуулахад банкнуудын санхүүгийн үр дүн дажгүй гарав. Тэгвэл задалж харахад,

• Ашиг, ашиг: Банкнуудын татварын дараах ашиг 4 ногоон, 1 улаан байх нь тэр. ХААН Банк (KHAN)-ны ₮424.1 тэрбумын ашиг бусад 4 банкны ашгийн нийлбэрээс ч их байгаа нь тэргүүлэгч болохоо дахин баталсан хэрэг болов. Харин Голомт банк (GLMT)-ны ашиг хамгийн их буюу 66.2% өсөв. 1 улаан нь Төрийн банк (SBM) юм. Тэдний ашиг 31.3% буурч ₮59.6 тэрбумд хүрсэн байна. Хүүгийн зардлаа бууруулчихсан бол ч…
• Чанаргүй зээл чанаржсаар: Эдгээр банкнууд зээл олголтоо дунджаар 15%-30% нэмсэн ч чанаргүй зээлийн хэмжээ буурсан нь зээлийн удирдлага өмнөх жилтэй харьцуулахад сайн ажиллаж байна гэж дүгнэхээр юм. ХХБ (TDB)-ны чанаргүй өнгөрсөн оны мөн үед ₮1 их наядыг даваад байсан бол өдгөө ₮600 тэрбум болтол буулгаж чадсан ч чанаргүй зээлийн хувь 12.2% буюу хамгийн их хэвээрээ байна.
• Хувьцаа харин: Ганцхан ХААН Банкны хувьцаа үнэ IPO үнээсээ илүү явна. Харин Голомт банк болон Төрийн банкны P/B харьцаа 1-с бага буюу банкны хувьцааны үнэ дансны үнээсээ доогуур байв.

Эцэст нь, системийн нөлөө бүхий банкнуудын ашигт ажиллагаа сайжирч, онцын эрсдэл харагдахгүй байгаа хэдий ч хөрөнгө оруулагчдын сонирхлыг татаж зах зээл дээр хувьцааны үнэ нь төдийлөн өсөж чадахгүй л байна…