Улиран одсон 2023 онд ХК-уудаас Өндөрхаан (ONH)-ы хувьцааны үнэ 826.9% өсөн өсөлтөөрөө тэргүүлсэн бол хувьцааны үнэ нь хамгийн уналттай компаниар Эрдэнэс Сольюшинс (AMT) тодорлоо. Гэхдээ эдгээр тоонуудад хууртагдаж болохгүй ээ.

Эрүүл бус өсөлт

МХБ (MSE) дээр 174 компанийн хувьцаа бүртгэлтэй байгаагаас 2023 онд арилжаа хийгдсэн 144 компани байгаа аж. Сонирхолтой нь тус 144 хувьцаанууд дундаас арилжааны идэвх сул боловч жилийн дотор 300%-иас илүүгээр өссөн хувьцаанууд байна. Тодруулбал,

• Гаднын нөлөөтэй: Өндөрхаан ХК-ийн хувьцааг Ард санхүүгийн нэгдэл (AARD) худалдаж авснаар хувьцааны үнэ нь 2023 онд 826.9% өсөн ₮24,100 дээр хаагдсан аж.
• Хувьцааны үнэд бүү хууртагд: 555.7% өссөн Эрээнцав (ECV)-ын хувьд эхний 9 сарын хугацаанд арилжаалагдахгүй явсаар сүүлийн 3 сард гэнэт өсчихсөн нь энэ. Оны эхний хагаст МХБ-ээс “Бүртгэлээс хасагдах нөхцөл үүссэн” хэмээх сануулга авч байсан шүү дээ.
• Шалаар нэг болсон ч тоохгүй нь: Эрдэнэс Сольюшинс ХК харин 77.2% унаж ₮10.2 дээр хаагдсан нь гэнэтийн байсангүй. Учир нь оны эхний хагаст хэдийн 66.6% унаад байсан юм. Тэд энэхүү асуудлыг залруулах, арга хэмжээ авах хугацаа байсан ч хийсэнгүй. Ядаж мэдэгдэл хийсэн бол ч.

ТОП-оос илүү 

Компани бүрээр харахад эрүүл бус өсөлт их байсан бол индексүүдийг харьцуулж харахад MSE A (MSEA) индекс өнгөрсөн онд хамгийн их буюу 21.6% өсөв. Харин ТОП-20 индекс 11% л өссөн аж.

• 20 vs 27: Үнэт цаасны I ангиллын компаниудаас бүрддэг MSE A индексэд өнгөрсөн онд хувьцааны үнэ нь 25.6% өссөн ХААН Банк (KHAN) болон 17% өссөн МХБ зэрэг компаниуд багтдаг юм.

Дүгнэхэд, нийтээр нь хараад байхад ХЗЗ маань хөгжөөд байгаа боловч компани бүрээр хальт харахад л хэцүүхэн дүр зураг угтаж байна. Зах зээлийн зарчмын дагуу өсөж, унахад компаниуд нь мэдэгдэл гаргаад, юу болж байгаа талаарх нэг сонин хачныг цаг тухай бүрд нь өгөөд байвал хувьцаа эзэмшигчид хохирох нь бага л байх юм.