СЗХ өнгөрсөн оны компанийн засаглалын кодексын үнэлгээний тайланг гаргажээ. Даатгагч, ББСБ, Хөрөнгө оруулалт менежментийн нийт 116 компанийн кодексын хэрэгжилтийг үнэлэхэд 71.7%-ийн гүйцэтгэлтэй байв.

• Компанийн кодекс гэж юу вэ?: Энэ нь компанийн үйл ажиллагааны горимыг тогтоож өгдөг зохион байгуулалтын зарчмууд юм. Тодруулбал, үндсэн 9 зарчмаас бүрдэх бөгөөд сайн туршлагыг нэвтрүүлэх замаар харилцагчийн эрх ашгийг хамгаалах, урт хугацаанд тогтвортой үнэ цэн бүтээхэд дэмжлэг үзүүлэх зорилготой аж.  

Үнэлгээ яасан гэнэ ээ?

Тус судалгааг асуулгын аргаар явуулсан бөгөөд судалгааны үр дүнд компанийн кодексын хэрэгжилт 71.7%-ийн гүйцэтгэлтэй гарсан нь 2022 оны 8-р сарын үзүүлэлтээс 16.4 нэгжээр сайжирчээ. Компаниудын хамгийн сайн, хамгийн муу засаглалын үзүүлэлтийг харвал,

• Сайн: Нийт компаниудын 24.7% нь Төлөөлөн удирдах зөвлөлийн үйл ажиллагааны журамдаа шинэчлэл хийсэн бол 13.9% нь шинэчлэл хийж байгаа аж. Тиймээс тэдний 75%-ийн ТУЗ-ийн журмын зохицуулалтын үзүүлэлт сайжирчээ. 
• Муу: Харин судалгаанд оролцогчдын 31% нь л ёс зүйн дүрмийн шинэчлэл, 35% нь л цалин урамшууллын бодлогодоо шинэчлэл хийсэн байна.

Салбар, салбараар нь задалж харъя

• Даатгал: Нийт 18 даатгагчийн засаглалын зарчмын хэрэгжилтийг үнэлэхэд өмнөхөөсөө 12.13 нэгж хувиар сайжирч 71% болов. 
• ББСБ: Харин 62 ББСБ-ын зарчмын хэрэгжилт 21.1 нэгж хувиар өсөж 74.20% болжээ. 
•  ХОМК: Түүнчлэн 36 Хөрөнгө оруулалтын менежментийн компаниудын зарчмын хэрэгжилт өмнөхөөсөө 15.96 нэгж хувиар өсөж 69.97%-д хүрсэн байна. Харин тус салбаруудад цалин урамшууллын бодлого, зохицуулалтын асуудал хамгийн сул байгаа аж. 

Эцэст нь... Компаниуд ёс зүй, урамшуулал, тайлан, ил тод байдал дээрээ асуудалтай байгаа харагдлаа. Ямартай ч өмнөх үзүүлэлтээсээ багаар ч болтугай сайжирч ч байгаа нь авууштай юм даа.