Санхүүгийн Инновац Текспринт уралдаан нь салбарын тодорхой асуудлыг шийдвэрлэхэд инновац, технологийг ашигласан ухаалаг, шийдлийг эрэлхийлэх зорилгоор санхүү, технологийн салбарын мэргэжилтнүүд болон тус салбарт сонирхолтой хэн бүхэнд нээлттэй зохион байгуулагддаг бүтээлч арга хэмжээ юм.

Сүүлийн жилүүдэд санхүүгийн зохицуулагч байгууллагууд тус уралдааныг санхүүгийн салбарт тулгамдаж буй асуудлыг шийдвэрлэх зорилгоор зохион байгуулж эхэлсэн бөгөөд Санхүүгийн Зохицуулах Хороо энэ жил анх удаагаа Монгол Улсад зохион байгуулах гэж байна. 

Текспринтийн оролцогчид ухаалаг, тогтвортой, хүртээмжтэй санхүүгийн салбарыг хөгжүүлэхэд технологийн дэвшил, инновацыг ашиглахад чиглэх бөгөөд уралдаанд дараах үндсэн сэдвүүдийн хүрээнд инновац шийдлүүдийг хөгжүүлэн оролцох юм. 

• e-KYC буюу харилцагчийг зайнаас таньж мэдэх үйл ажиллагааг хялбарчлах технологийн шийдэл; 
• Санхүүгийн салбарын үр ашигт байдал, хүртээмжийг нэмэгдүүлэх ногоон финтекийн бүтээгдэхүүн, үйлчилгээ, шинэ шийдэл;
• Олон нийтийн сүлжээ болон нийтэд нээлттэй өгөгдлийг ашиглан санхүүгийн зах зээлийн хяналтыг хэрэгжүүлэх, санхүүгийн залилан болон бусад төрлийн зохицуулалтгүй үйл ажиллагааг илрүүлэх технологийн шийдэл;
  
• Санхүүгийн байгууллагуудын тайлан мэдээг бодит цагийн горимоор цуглуулах, цуглуулсан өгөгдөлд аналитик шинжилгээг автоматаар хийх технологийн шийдэл;
  
• Хэрэглэгчийн санхүүгийн эрүүл мэндийг хэмжих, санхүүгийн ухаалаг шийдвэр гаргалтад туслах технологийн шийдэл.
  

Тус уралдаанд багаар оролцох бөгөөд баг бүр 3-5 гишүүний бүрэлдэхүүнтэйгээр дээр дурдсан сэдвийн хүрээнд шийдэл, санаагаа боловсруулах юм. Багийн гишүүд нь програм хөгжүүлэгч, график дизайнер, бизнес хөгжүүлэгч, судлаач, дата аналист, байгаль орчин, технологийн салбарын мэргэжилтэн, оюутнууд, сонирхогчид байж болох бөгөөд уралдаанд оролцоход нас, туршлага харгалзахгүй.

Уралдааны бүртгэл 11 сарын 21-ний өдрийг хүртэл үргэлжлэх бөгөөд дэлгэрэнгүй мэдээллийг ЭНД дарж авна уу.