Дэлхийн бүтээлч салбарын ноён оргил Каннын Арслан наадам 72 дах жилдээ зохион байгуулагдаж байгаа бөгөөд энэ удаагийн наадамд Монголын Маркетингийн Холбооны Ерөнхийлөгч, KMG Creative Group-н захирал Т.Энхбаясгалан шүүгчээр ажиллаж байна.

Cannes Lions наадамд жил бүр дэлхийн өнцөг булан бүрээс 26,000 бүтээл хүрэлцэн ирдэг бөгөөд энэ жил 79 орны шүүгчид хамтран ажиллаж дэлхийн шилдгүүдийг тодруулна.

2025 оны 3 сард Монгол улсаас анх удаа Spikes Asia 2025 наадмын шүүгчээр Whyze Agency үүсгэн байгуулагч М.Билгүүн ажилласан бол ийнхүү манай улс 2 дахь ОУ-ын шүүгчтэй боллоо.

Одоогоос 11 жилийн өмнө Breakthrough PR агентлагийн Х.Энхбат болон Т.Энхбаясгалан нар эдгээр ОУ-ын наадамд түүчээлэн оролцож байсан ба улмаар Монголын Маркетингийн Холбоо нь Spikes Asia, Cannes Lions, Dubai Lynx зэрэг наадмуудын Монгол дахь албан ёсны төлөөлөгчөөр ажиллаж байна.

Монгол улсын бүтээлч салбарын амжилтаас дурдвал 2019 онд Ази, Номхон далайн орнуудын залуу маркетеруудийн Young Spikes тэмцээнд Viral Agency төлөөлөл болох Х.Цэнд, Б.Есөнзаяа нар ялалт байгуулж, Азийн дэвжээнд нэрээ цуурайтуулж байсан түүхтэй.

Cannes Lions-н албан ёсны мэдэгдэлд Монгол Улсыг анх удаа шүүгчдийн бүрэлдэхүүнд багтсан талаар онцлон дурдсан бөгөөд дараах холбоосоор дэлгэрэнгүй мэдээлэлтэй танилцаарай.

Каннын Наадмын шүүгчээр ажиллах нь зөвхөн хувь хүний амжилт төдийгүй, Монголын бүтээлч салбар дэлхийн тавцанд хүлээн зөвшөөрөгдөж буйг илтгэж, олон мянган залууст урам зориг өгч, Төв Азийн нүүдэлчин орон дэлхийн зар сурталчилгааны салбарын хөгжилд бодитой хувь нэмэр оруулж эхэлсний илрэл юм.

Хэрэв та энэ жилийн Cannes Lions 2025 фестивальд оролцохыг хүсвэл дараах холбоосоор зочлоорой.

Дэлгэрэнгүй: ⁦http://canneslions.com/⁩

Монголын Маркетингийн Холбоо: ⁦http://marketing.org.mn/⁩

Эх сурвалж: KMG Holding