Сонгуулийн Ерөнхий Хорооны 2024 оны 5 сарын 30-ны өдрийн хуралдаанааc нэр дэвшигчид тавигдах шаардлага хангаагүй 154 хүнийг Монгол Улсын Их Хурлын 2024 оны ээлжит сонгуульд нэр дэвшигчээр бүртгэхээс татгалзсан шийдвэр гаргасан билээ.

Тэгвэл Монгол Улсын Их Хурлын Сонгуулийн тухай хуулийн 33-р зүйлийн 33.2-т “Нэр дэвшигчээр бүртгэхээс татгалзсан тохиолдолд санал авах өдрөөс 25-аас доошгүй хоногийн өмнө зөрчлийг арилгасны үндсэн дээр дахин бүртгүүлэхээр шаардагдах баримт бичгийг Сонгуулийн Ерөнхий Хороонд ирүүлж болно” гэж заасны дагуу Сонгуулийн Ерөнхий Хорооноос томилсон ажлын хэсэг 2024 оны 6 сарын 2-ны өдрийг дуустал нэр дэвшигчдийн баримт бичгийг хүлээн авчээ.

Ажлын хэсэгт 16 нам, 2 эвслээс 101 нэр дэвшигч, 3 бие даан нэр дэвшүүлэгч, нийт 104 иргэн дахин бүртгүүлэхээр баримт бичгээ ирүүлсэн байна.

Монгол Улсын Их Хурлын сонгуулийн тухай хуульд заасны дагуу Сонгуулийн Ерөнхий Хороо 2024 оны 6 сарын 10-ны өдрөөс өмнө нэр дэвшигчийг бүртгэх эсэх шийдвэрийг гаргах юм.