Монгол Улс Дэлхийн банкны бага орлоготой улс орнуудад зориулсан хөнгөлөлттэй зээл, буцалтгүй тусламж олгодог санд ₮4.8 тэрбумын хандив өгч, шинэ донор орон боллоо. Одоогоос 6 жилийн өмнө бид тус сангийн зээлдэгч орон байв. 

• 🔎 IDA хэрхэн ажилладаг вэ? Олон улсын хөгжлийн ассоциаци (IDA) бол Дэлхийн банкны бага орлоготой орнуудад маш бага хүүтэй, урт хугацаатай зээл, буцалтгүй тусламж өгдөг сан. Одоогоор 78 бага орлоготой улс уг сангаас санхүүжилт авдаг. Эсрэг талд өндөр болон дунд орлоготой гишүүн орнууд нь 3 жил тутам хандив өгөх замаар сангийн орлогыг нөхөн дүүргэдэг.

Зээлдэгчээс 👉 хандивлагч 

Манай улс 1991 онд Дэлхийн банкны гишүүн болсноос хойш IDA-с нийт $1.6 тэрбумын санхүүжилт авсан байна. Улмаар 2020 оноос бага орлоготой орнуудын хөнгөлөлттэй зээлийн ангиллаас гарч гарч IBRD буюу Олон улсын сэргээн босголт, хөгжлийн банкны харилцагч болсон юм.

😶‍🌫️ Өмнөх зээлүүдийн төлөлт 

Хэдий өнгөрсөн 30 жилд Монголын эдийн засгийн өсөж, орлогын түвшнээр, дундаж ангилал руу ахисан ч IDA-с авсан $1.1 тэрбумын дүн бүхий 53 зээлийнхээ алийг нь ч бүрэн төлж дуусгаагүй байгаа. Ядаж л сайн мэдээ нь алиных нь ч эргэн төлөлтийг хоцроогоогүй буюу нэн эртний 1991 онд авч байсан зээлийн эцсийн төлөлт нь 2031 онд. Тус 53 зээлийн 51 нь хуваарийн дагуу төлөгдөж байгаа бол 2-ынх нь төлөлт хараахан эхлээгүй байгаа юм. Харин 2006-2007 онд 8 буцалтгүй тусламж авч байсан түүхтэй аж. 

Эцэст нь… Олон улсын тавцанд Монголын зээлжих зэрэглэл сайжирч, 2023 оноос хойш дажгүй санхүүжилт татах хэмжээнд явж буй. Гол нь манай улсын өрийн удирдлагын бодлого хэр сайн байгаа билээ? Гаднаас татсан зээлүүд маань амласан бүтээн байгуулалтаа хийдэг билүү, идлэг уулга болдог билүү гэхчлэн бодох асуудал олон. Гэснээс манай улсын 28 ААН Дэлхийн банкны санхүүжилтийн хоригт байдаг юм байна. Зүгээр л хэлсэн юм. 👀