Францад төсвийн хэмнэлт, Италид орон сууцны түрээсийн өсөлт, бага цалин, шатахууны үнийг эсэргүүцсэн оюутан, залуусын жагсаал мөргөлдөөн болж хурцадлаа. Тэгвэл энэ сэдэв рүү орохоос өмнө хээрийн галуу нисэн үл хүрэх Европт хэчнээн монголчууд суралцаж буйг сонирхоё.

📈 Олон олон монголчууд

Сүүлийн 10 жилд Оросыг хасаж тооцвол Европт суралцаж буй монголчуудын тоо 1.5 дахин өсөж 3.3 мянга болжээ. Улсаар нь авч үзвэл Герман 1,258 оюутантайгаар тэргүүлж, Ирланд 805 оюутантайгаар удаалсан аж. Сонирхуулахад, Ирландад суралцагчдын тоо 50 дахин нэмэгдсэн бол Их Британид 31% буурчээ. Жагсаал хурцдаж буй Италид суралцаж буй монголчуудын тоо 6.1 дахин өсөж 334-т, Францад суралцагчдын тоо 62% нэмэгдэж 73-т хүрсэн байна.

• 🛡️ Яамны мэдэгдэл: Нөхцөл байдал хүндэрсэнтэй холбоотой Парис дахь Монгол Улсын Элчин сайдын яам энэ сарын 6-нд анхны сэрэмжлүүлгээ гаргаж, өнгөрсөн амралтын өдрүүдэд дахин мэдэгдэл хүргүүлжээ. Итали дахь Элчин сайдын яамны хувьд мөн адил өнгөрсөн амралтын өдрүүдээр иргэдэд зориулсан анхны сэрэмжлүүлгээ гаргасан аж.

💥 Жагсаалын өрнөл

Францад төсвийн хямрал, багшийн хомсдол, анги дүүргэлтийг эсэргүүцсэн жагсаалд үйлдвэрчний эвлэлүүд болон “шар хантаазтан”-ууд нэгдэж, 550 мянга гаруй хүн оролцжээ. Үүний улмаас 400-500 ахлах сургууль хаагдаж, 1,200 гаруй хүн баривчлагдан, 1,500 орчим дэлгүүр хохирол амссан гэнэ. Харин Италид залуус орон сууцны түрээсийн өсөлт, бага цалин, шатахууны үнийг эсэргүүцэн Милан, Болонья, Турин хотод жагсаж, зөвхөн Милан хотод гэхэд 200 гаруй хүнийг баривчлав.

• 🛒 Carrefour-н хохирол: Монголд үйл ажиллагаагаа өргөжүүлж буй Францын жижиглэн худалдааны хамгийн том сүлжээ Carrefour ч жагсаалын хөлд нэрвэгдлээ. Энэ үеэр тус брэндийн 50 гаруй дэлгүүр халдлагад өртөж, үүнээс 20 супермаркет нь бүрэн тонуулжээ. Үр дүнд нь Carrefour-н хохирол, засварын зардал $11.2 саяд хүрсэн аж.

Эцэст нь… Цагдаагийн хүч нэмэгдэж, жагсагчдын идэвх түр сулрах үед мөргөлдөөн хэд хоногтоо намжиж болох ч боловсрол, амьжиргааны өртөг зэрэг суурь асуудлууд богино хугацаанд шийдэгдэхгүй. Иймээс Европ даяарх тогтворгүй байдал энэ оныг дуустал үе үе дахин сэдэрч, цаашид ч үргэлжлэх төлөвтэй гэнэ шүү.