NRCC буюу Үндэсний судалгаа, зөвлөлийн төвийн хэрэглэгчийн итгэлийн индекс (ХИИ)-ийн шинэ дүн гарлаа. Энэ удаагийн дүр зураг тун сонирхолтой. Монголчууд өнөөдрөө гайгүй гэж харж байгаа ч маргаашдаа итгэхээ больжээ.

• 📌 Юуг илэрхийлэх хэмжүүр вэ? ХИИ нь иргэд өнөөгийн болон ойрын ирээдүйн эдийн засгийн нөхцөл, орлого, хөдөлмөр эрхлэлтийн талаар ямар хүлээлт, итгэлтэй байгааг илтгэдэг үзүүлэлт юм.

💔 Итгэл юм шүү дээ: -16.6

2026 оны II улиралд ХИИ 90.6-д хүрч өмнөх улирлаас 16.6 пунктээр буурлаа. Жилийн өмнөхөөс 8.3 пунктээр доогуур байна гэсэн үг. Өнгөрсөн оны сүүлээр 91.9 хүртэл унаад, I улиралд 107.2 болж сэргэсэн итгэл ганцхан улирлын дотор буцаад шалаар нэг болсон хэрэг. Бүр 2025 оны IV улирлын хамгийн доод цэгээс ч доогуур ороод байгаа нь энэ дээ. Учир нь:

• 🙃 Өнөөдөр гайгүй: Бизнесийн нөхцөл болон хөдөлмөрийн зах зээлийн одоогийн байдлыг илэрхийлдэг Өнөөгийн байдлын индекс 105.6-аас 107.9 болж өсжээ. Өөрөөр хэлбэл, иргэд одоогийн ажил, бизнесийн орчноо өмнөхөөсөө арай дээр гэж үнэлж байна. Асуудал өнөөдөртөө биш.
• 🤕 Маргааш санаа зовооно: Харин ирэх үеийн бизнес, орлого, ажлын байрны талаарх хүлээлтийг харуулдаг Ирээдүйн хүлээлтийн индекс 107.7-оос 84.9 болж, нэг улиралд 22.8 пунктээр огцом унав. Нийт итгэлийг доош татсан гол хүчин зүйл нь энэ. Иргэд "одоохондоо болж байна, гэхдээ удахгүй хүндэрнэ" гэж харж байна гэсэн үг.

📈📉 Итгэл ба өсөлт

Өмнөх динамикаас харахад ХИИ 100-гаас дээш үед эдийн засаг дунджаар 6% орчим өсдөг бол 100-гаас доош үед өсөлт 2%-3% орчимд саардаг. 90.6 гэсэн үзүүлэлт нь хүлээлт дахин хэвийнээс доош түвшинд орсны дохио юм. Ирээдүйн хүлээлт муудахаар өрхүүд томоохон худалдан авалтаа хойшлуулж, мөнгөө хуримтлуулах, зардлаа танах хандлагатай болдог. Энэ нь эргээд худалдаа, үйлчилгээ, бизнесийн орлогод нөлөөлж буй. Бидний амьдралын түгшүүр өдрөөс өдөрт л нэмэгдэж байна даа.