₮2.4 их наядын өртэй болоод буй нийслэлийн 2023 оны төсвийг хэлэлцэж байна. Тэгвэл хэр хэмжээний төсөв батлагдах вэ?

Эерэг жилүүд

Нийслэлийн төсвийн тэнцэл 2008-2013 онд ашигтай гарчээ. Тодруулбал,

• Тэртээ 14 жилийн өмнө: 2008 онд нийслэлийн төсөвт ₮65.6 тэрбумын орлого орж, ₮62.8 тэрбумын зардал гаргаснаар төсвийн тэнцэл ₮2.8 тэрбумын ашигтай гарсан аж. 
• Онцгой жил: Үргэлжлүүлээд 2012 он бол гоц он байв. Тус оны нийслэлийн төсвийн орлого 2008 оныхоос 7 дахин ихэссэн юм. Учир нь 2012 онд тусламжийн ₮109 тэрбумын орлого орж иржээ. Улмаар төсвийн тэнцлийн ашиг хамгийн өндөр буюу ₮118.6 тэрбумд хүрэв. 

Алдагдал

Харин 2014 оноос хойш нийслэлийн төсвийн зардал нэмэгдсэнээр төсвийн тэнцэл алдагдал хүлээж эхэлсэн байна. 

• 16.9% пуужиндав: 2014 оны нийслэлийн төсвийн зардал өмнөх жилийнхээс 16.9% нэмэгдсэн бөгөөд үүний 66.3%-ийг урсгал зардал, үлдсэн хэсгийг хөрөнгийн зардал бүрдүүлсэн байна. Улмаар тус оны нийслэлийн төсвийн алдагдал ₮2.3 тэрбум болов. 
• Дараалсан олон жил: Цаашлаад 2016 оны нийслэлийн төсвийн алдагдал хамгийн өндөр буюу ₮88.7 тэрбумд хүрсэн юм. Түүнчлэн өнгөрсөн жилийн нийслэлийн төсвийн зардал л гэхэд 10 жилийн өмнөхөөсөө 6 дахин ихэссэнээр  ₮15 тэрбумын алдагдал үүрсэн.

Тэгвэл энэ жил

Энэ жилийн нийслэлийн төсвийн орлого 2013 оныхоос 2.4 дахин, зардал нь 2.2 дахин өсөхөөр тусгагдсан. Мэдээжийн хэрэг орлогын 88.9%-ийг татварыг орлого, үлдсэн ₮193.4 тэрбумыг татварын бус орлого бүрдүүлнэ. Гэхдээ үүндээ хүрэх үгүй нь эргэлзээтэй. 

Алдсаар л байх уу? Ирэх оны нийслэлийн төсвийн тэнцэл ашигтай гарах тооцоотой. Гэвч 2020 онд ₮342 тэрбумын ашигтай төсөв батлаад ₮2.4 тэрбумын алдагдал хүлээсэн. Ер нь бол нийслэлийн төсвийн тэнцэл сүүлийн 8 жил алдагдалтай гарсан. Оновчтой хуваарилалт, ашигтай зарцуулалт хэзээ бий болох юм бол доо.