1995 онд дэлхий даяарх нийт зэсийн олборлолт 9.8 сая тн байсан бол уг хэмжээ өнгөрсөн жилд 21 сая тн болж, 30-аад жилийн өмнөхөөс хэрэглээ нь 2 нугарчээ. 

Жилд 20 сая тн зэс олборлоход хэний үүрэг өндөр байв? 

Чили Улсад байрлах Рио Тинто группийн хувь эзэмшдэг Escondida зэсийн уурхай нь дэлхийн хамгийн том зэсийн уурхай ба жилд 1.5 сая тн зэс олборлох хүчин чадалтай юм. Харин Escondida-гийн араас топ-5-т орох уурхайнуудын хувьд жилд 500-800 мянган тн зэс олборлох чадвартай бол Монголын Оюу толгой уурхайн хувьд оргил үедээ жилд 500 мянган тн зэс үйлдвэрлэнэ гэхээр эдгээр томчуудын эгнээнд удахгүй зүй ёсоор багтах нь ээ. 

100 жилийн хэрэглээ үлдсэн

Харин хүн төрөлхтөн өнөөдрийг хүртэл нийт 700 сая тн зэс олборлосон бол хараахан олборлогдоогүй 2.1 тэрбум тн зэс газар доор байгаа аж. Бидний зэсийн хэрэглээ энэ эрчээрээ байвал олборлож эхлээгүй 2.1 тэрбум тн зэсийг 100-аад жилийн дотор л газрын гүнээс ухаад гаргаад ирэх гэнэ. Түүнчлэн илрүүлээгүй орд ч мөн бий. Тэгэхээр нөөцийн хувьд бол өнөө маргаашдаа санаа зовох асуудал байхгүй мэт. Харин хэн тэрхүү нөөцийг ухан гаргаж, эрэлт нь өндөр буй зэсийг нийлүүлэх вэ гэдэг л гол асуудал бололтой.