Энэ жилийн шалгаруулалтад манай редакцын баг болон нийт 1,137 уншигч оролцож, шилдгүүдийг шилэв. 

ХӨРӨНГӨ ОРУУЛАГЧДАД ЭЭЛТЭЙ КОМПАНИ: Инвескор ББСБ ХК

Инвескор ББСБ ХК нийт санал асуулгад оролцогчдоос 35.3%-ийн санал авч ХӨРӨНГӨ ОРУУЛАГЧДАД ЭЭЛТЭЙ КОМПАНИ-иар шалгарав.

• Яагаад? Энэ жил тус компанийн хувьцаа эзэмшигчдийн тоо 10.4% нэмэгдсэн. Тэдний хувьд IPO хийснээс хойш үйл ажиллагаа нь ч тэлж, хувьцааны үнэ нь ч 56.4% өсөөд амжсан. Ингэснээр тэд IPO-н дараа амжилттай явж буй цөөн хэдэг компанийн нэг болсон юм. 

ОНЦЛОХ ҮНЭТ ЦААСНЫ КОМПАНИ: Голомт Капитал ҮЦК ХХК

Голомт Капитал ҮЦК ХХК нийт санал асуулгад оролцогчдоос 31%-ийн санал авч ОНЦЛОХ ҮНЭТ ЦААСНЫ КОМПАНИ-иар шалгарлаа. 

• Яагаад? Компани энэ жил ҮЦК-иуд дундаасаа хамгийн өндөр ашигтай ажилласан. Тэд эхний 10 сард ₮170.3 тэрбумын арилжаа хийж, II улиралд ₮3.1 тэрбумын ашигтай ажилласан юм. Энэ жил Голомт Капитал ҮЦК ХХК СИМПЛ I, II бондын андеррайтераар ажилласан билээ. 

ОНЦЛОХ CEO: Ж.Болд | Түмэн Шувуут ХК

Санал асуулгад оролцогчдын 34.2% буюу 389 хүн Түмэн Шувуут ХК-ийн захирал Ж.Болдод санал өгснөөр ОНЦЛОХ CEO-р шалгарч байна. 

• Яагаад? Тэрбээр 2007 оноос хойш буюу 16 жил Түмэн Шувуут ХК-ийн Гүйцэтгэх захирлын албан тушаалыг хашиж байгаа нэгэн юм. Энэ хугацаанд тэдний компани IPO хийж, цар хүрээгээ тэлж Түмэн Шувуут 2 фермийн төслөө ашиглалтад оруулаад амжсан. Ингэснээр тэдний өндөгний үйлдвэрлэл 80 сая ширхгээр нэмэгдэж, борлуулалтын орлогоо ₮32 тэрбумаар нэмэх төлөвтэй байгаа. 

ОНЦЛОХ КОМПАНИ: ХААН Банк ХК

ХААН Банканд санал асуулгад оролцогчдын талаас их буюу 57.4% нь саналаа өгөв. Улмаар тэд энэ оны ОНЦЛОХ КОМПАНИ боллоо. 

• Яагаад? ХААН Банк ХК өнгөрсөн 4-р сард IPO хийж 26,942 хувьцаа эзэмшигчтэй болж ТОП-уудын эгнээ рүү цахилгаан шатаар л өгсөв. Мөн тэд оны төгсгөлд дотоодын анхны Ногоон бондыг гаргаж захиалга нь 1 цаг хүрэхгүй хугацаанд биелэв.  

ОНЦЛОХ ХҮН: Р.Мөнхтуяа | ХААН Банк ХК-ийн Гүйцэтгэх захирал

ХААН Банк ХК-ийн Гүйцэтгэх захирал Р.Мөнхтуяа 542 хүнээс санал авснаар ОНЦЛОХ ХҮН номинацид шалгарлаа. 

• Яагаад? Р.Мөнхтуяа нь 2021 оноос хойш Монголын хамгийн том банкийг удирдан манлайлж ажиллаж байна. Улмаар ХААН Банк энэ он дуусахад ₮450 тэрбумын ногоон зээлийг олгох, цаашлаад 2025 он гэхэд ₮1.2-₮1.3 их наядын ногоон зээлийг олгох зорилттойгоор банкнуудыг манлайлан ажиллаж буй.