Өнгөрсөн долоо хоногийн УИХ-ын чуулганаар ирэх оны төсвийг баталсан билээ. Тэгвэл ямар төсөв батлагдчихав, төсвийн хүрээнд юу хийх гэж байна? 

Хумих ≠ тэлэх

Улсын инфляц 13.8%-д хүрч, он гарсаар төгрөгийн ханш долларын эсрэг 19.5% сулран, гадаад валютын нөөц оны эхнээс 36.2% багасаад буй. Тиймээс Монголбанк инфляцыг хазаарлахын тулд бодлогын хүүгээ 12% болгосон. Гэтэл ЗГ зах зээлийг тэлсэн буюу өмнөх жилээс 20.4% өссөн орлоготой, 14.3% нэмэгдсэн зардалтай төсөв өргөн барьж түүнийг нь УИХ баталж орхилоо. Нэг их шүүмж, шуугиан ч болсонгүй, чимээгүйхэн л… 

Баруун солгойгүй орж ирэх гадаад валют

Заа, төсвийн бодлого бол мөнгөний бодлогынхоо эсрэг явдаг юм байж. Тэгвэл гадаад валютын нөөцийг нэмэгдүүлэх, хөрөнгө оруулалт татах тал дээр юу хийгдэх вэ? 

• Газартай болчихвол учиртай: Энэ сарын 11-нд болсон УИХ-ын чуулганаар Эдийн засаг, хөгжлийн яамны харьяа Хөрөнгө оруулалтын газрыг байгуулахаар болсон аж. Уг газрыг байгуулснаар хөрөнгө оруулалт хийх эдийн засгийн боломж бүрдэх гэнэ. ХО-ын газраараа дамжуулаад олон улсаас хөрөнгө оруулалт татаад л байх нь дээ.
• Жуулчид ирчихвэл болно: Монгол Улс Аялал жуулчлалыг хөгжүүлэх үндэсний хороотой болсонтой холбоотойгоор 2023 онд 1 сая жуулчныг Монголд ирүүлж $1.2 тэрбумын орлого олохоор төлөвлөж буй. Гэхдээ Ковид-19-ийн өмнөх үед буюу 2019 онд 637 мянган жуулчин л манайд ирсэн бөгөөд энэ нь сүүлийн 10 жил дэх хамгийн өндөр үзүүлэлт юм. 
• Зээл, тусламж татна: Ирэх оны төсөвт ₮1.8 их наядын гадаадын зээл, тусламж авахаар тусгасан нь энэ онд тусгасан дүнгээс 6.7% их аж. Төсөвт тусгаснаар бол ирэх жил бидэнд Азийн хөгжлийн банк ₮432 тэрбум, Хятад ₮249 тэрбум, ЕСБХБ ₮105 тэрбумын зээлийг тус тус олгох нь. Түүнчлэн Америк ₮341 тэрбумын туслалцаа үзүүлнэ гэж тооцоолсон нь энэ онд тусгасан дүнгээс 3.6 дахин их байна. 

Эцэст нь… Энэ бүх төлөвлөгөө нь биелж, ирэх оны эдийн засгийн өсөлт нь 5%, инфляц нь 8% болох хүсэл нь биелэх болтугай.