Салбарын шинэ технологи, инновацын шийдлүүдийг танилцуулдаг "IFFA 2025" олон улсын үзэсгэлэн энэ сарын 3-8-нд өдрүүдэд Германы Франкфуртад болж байна. 3 жил тутамд 1 удаа зохион байгуулагддаг тус үзэсгэлэнд томоохон компаниуд эх орноо төлөөлөн оролцдог. Харин Монгол Улсаас 33 дахь жилдээ үйл ажиллагаа явуулж буй Хүнс группийн Хүнсний манлай үйлдвэр “Хүнс комплекс” ХХК 5 нэр төрлийн бүтээгдэхүүнээрээ тус үзэсгэлэнд оролцлоо.

Улмаар “Хүнс комплекс” ХХК-ийн олон жилийн ноу хау шингэсэн технологиор бүтээгдсэн “Үхрийн махан салями”, “Шанзтай зайдас”, “Sticks салями”, "Утаж шарсан үхрийн өвчүү" гэх 4  бүтээгдэхүүн алтан медаль, дайвар бүтээгдэхүүнээр хийсэн “Хэлтэй царцаамаг" мөнгөн медаль тус тус хүртэж амт, чанар, боловсруулалтын түвшнээрээ шүүгчдийн зүгээс өндөр үнэлгээ авлаа. 

IFFA олон улсын үзэсгэлэн нь мах, махан бүтээгдэхүүний боловсруулалт түүний бүхий л  үе шатыг хамарсан инновац, бүтээгдэхүүний чанар, шийдлүүдийг танилцуулдаг дэлхийн хамгийн нэр хүндтэй үзэсгэлэнгийн нэг бөгөөд 50 гаруй орны 1,000 гаруй ААН-ийг цуглуулж эерэг туршлага солилцох боломжийг олгодог.

Тус үзэсгэлэнд хувь хүн, ААН оролцсоноор олон улсын мэргэжил нэгт түншүүдтэй биечлэн уулзаж туршлага солилцох, ирээдүйн хүнсний салбарын чиг хандлага, соёлын онцлогийн талаар суралцах, мэдлэг мэдээллийг бодитоор авах зэрэг олон талын боломж бүрдэх юм. 

Ийнхүү “Хүнс комплекс” ХХК уламжлалт махан бүтээгдэхүүний үйлдвэрлэлээ орчин үеийн технологитой хослуулан чанартай, байгальд ээлтэй шийдлүүдээрээ онцгойрч, олон улсын экспертүүдийн талархлыг хүлээснээр Монголын хүнсний салбарын өрсөлдөх чадвар, чанарын түвшнийг дэлхийн тавцанд батлан харууллаа.

Эх сурвалж: “Хүнс комплекс” ХХК