Хэдэн өдрийн турш хүмүүсийн ярианы сэдэв болоод байсан IHC койны анхдагч зах зээлийн арилжаа дотоодын 4 бирж дээр нэгэн зэрэг явагдаж, нүд ирмэхийн зуурт л 100% биеллээ. Цаана чинь давхардсан тоогоор хагас сая хүн IEO-д оролцохоор хандсан гэж байдаг шүү.

Анхдагч зах зээл 

IHC койны хөрөнгө оруулагчдаас татан төвлөрүүлэх хэмжээ ₮30 тэрбум байсан бөгөөд IEO-д нийтдээ 20 мянган хүн оролцож, койны захиалга 1 цагийн хугацаанд бүрэн дуусжээ. Хөрөнгийн зах зээл дээр дотоодын компаниуд маань IPO, бонд босгох гэж ямар хугацаа зарцуулдаг билээ дээ. Ёстой л манай санхүүгийн салбарт түүхэнд бичигдэх өдөр болжээ. IHC-ийн хувьд нийт 1 их наяд койн байгаагаас одоо 100 тэрбумыг нь олон нийт эзэмшиж эхэллээ.  

Крипто биржүүдийн оролцоо

Анхдагч зах зээлийн арилжаа эхэлсэнтэй зэрэгцээд хамгийн түрүүнд Coinhub-ийн захиалга 30 секундэд хаагджээ. Бусад биржүүдийн захиалгын хувьд системийн хэт ачааллаас шалтгаалж харьцангуй сүүлд дууссан аж. Албан бус эх сурвалжийн мэдээлснээр 4 бирж дээр нийт ₮663 тэрбум цугларсан гэнэ. Хэрэв бүх бирж Coinhub шиг байсан бол ёстой нүд ирмэхийн зуурт л захиалга биелэх байж дээ.

• Coinhub: Тус биржээр нийт 2,860 хөрөнгө оруулагч IHC койны анхдагч зах зээлийн арилжаанд оролцжээ. (Эд нарын нэг нь гэхээр л инээд хүрээд байх юм.) 
• DAX: Сервер хэт их ачаалсны улмаас 40 минутын дараа эхэлсэн ч DAX биржийн захиалга 11 секундэд дуусчээ. 
• Trade.mn: Нийт 130 мянган хүн Trade.mn биржээр захиалга өгөх гэж оролдсон нь систем гацахад хүргэсэн аж.
• CompleX: Сервер гацаж, систем хэт ачаалсан ч гэсэн ямартай ч захиалгууд амжилттай биелжээ. 

Эцэст нь... 

Санхүүгийн салбарт анхдагч зах зээлийн арилжаа ямар байхаас шалтгаалж хоёрдогч зах зээлийн арилжаа хэр байх нь тодорхойлогддог гэсэн бичигдээгүй дүрэм байдаг билээ. IHC-ийн хувьд энэ дүрэмд хэр захирагдахыг ирэх 9 сарын 13-нд хүлээх л үлдлээ дээ. 

Хэрэв та өмнө нь Lemon Press- ийн IHC койнын талаар бичсэн нийтлэлийг уншихыг хүсвэл энд дараарай.