Өнгөрсөн Баасан гарагаас “Виртуал хөрөнгийн үйлчилгээ үзүүлэгчийн тухай хууль” мөрдөгдөж эхэлсэн. Ийнхүү СЗХ-ноос уг хуулийг дагаж мөрдөх журмын төслүүд дээр нээлттэй санал авч байгаа билээ. Тэгвэл ирэх саруудад крипто салбарын үйл ажиллагаа ямархуу байр байдалтай байхыг харцгаая. 

Биржүүдийн хувьд

Хуулийн дагуу СЗХ-ноос крипто биржүүдийг бүртгэж, харин биржүүд ямар койныг бүртгэхээ өөрсдөө шийдээд явах юм. СЗХ 6 сарын 25-аас биржүүдийг бүртгэж эхлэх ба хууль хэрэгжихээс өмнө үйл ажиллагаа эхлүүлсэн биржүүдийн хувьд 9 сарын 25 гэхэд бүртгэгдсэн байх шаардлагатай. Журмын төслийн дагуу бирж үйл ажиллагааны чиглэлээс хамаарч дор хаяж ₮0.5-₮1.5 тэрбумын хувь нийлүүлсэн хөрөнгө, хүний нөөц, программ хангамжийн шаардлагыг хангасан байх ёстой. Түүнчлэн, стэйкинг үйл ажиллагааг эрхлэх биржийн хувьд өөрийн хөрөнгөөс 30 дахин их хөрөнгийг удирдахгүй байх гэх мэтээр заалтууд орж ирж буй.   

Койн эзэмшигчдийн хувьд 

Таны эзэмшдэг койны арилжаалагдаж буй биржүүд бүртгэгдэж эхлэх хүртэл бас нэлээн хэдэн сар байна аа гэсэн үг. Тэр хүртэл хоёрдогч зах зээл дээр арилжаалагдаж буй койнуудын арилжаа хэвийн явах ч 9 сарын 25 гэхэд тухайн бирж нь СЗХ-нд бүртгэгдээгүй бол яах нь тодорхой бус байна. Мэдээж тухайн үед бүртгэлтэй болсон бирж рүү шилжих боломж байгаа ч хүлээн авах бирж байх уу гэдгээс бас хамаарна.  

Шинээр койн гаргах гэж буй хүмүүсийн хувьд 

Шулуухан хэлэхэд та койн гаргах гэж байгаа бол жаахан харзнах хэрэгтэй. Учир нь биржүүд бүртгэгдэж эхэлтэл дор хаяж 4 сарын хугацаа байна. Харин эхнээсээ бүртгэгдээд эхэлбэл, тухайн бирж дээр гарах нь зөв сонголт биз ээ. Түүнчлэн ойрын хэдэн сардаа койноор хөрөнгө оруулалт татсан ч тухайн койныг хоёрдогч зах зээл дээр гаргахыг хориглоод буй. Мөн СЗХ-ноос койнын танилцуулга, технологийн аюулгүй байдал, эдийн засгийн үр ашигтай эсэх зэрэг дээр шалгуурууд тавьж буй учир тэдгээрийг хангах тал дээр илүү анхаарлаа төвлөрүүлэх хэрэгтэй байх. Яарвал даарна гэгчээр хэдэн сардаа бол IEO төлөвлөөд дэмий л болов уу. 

Эцэст нь 

Ийнхүү 10 сараас крипто салбар маань нэлээн цэгцэрч эхлэхээр байна. Та ч мөн крипто салбарын зохицуулалтын орчин нөхцөлд өөрийн саналыг өгөхийг хүсвэл энд дарж, журмын төсөлд саналаа хүргүүлээрэй.