Их Британийн Гадаад Хэрэг, Хамтын Нөхөрлөл, Хөгжлийн Яамны Энэтхэг-Номхон Далайн бүс нутгийн асуудал эрхэлсэн Төрийн сайд Катрин Вест 8 сарын 22-23-ны өдрүүдэд Монгол Улсад айлчилж, Улаанбаатар хотноо болох ‘’Дэлхийн эмэгтэйчүүдийн чуулга уулзалт”-д оролцоно. Тэрээр энэхүү арга хэмжээнд оролцон, дэлхийн охид, эмэгтэйчүүдийн эрхийг дэмжих Их Британийн байр суурийг илэрхийлэх болно.

Айлчлалынхаа хүрээнд Сайд Катрин Вест Их Британийн талаас нөөц бололцоо багатай сургуулиудын Англи хэлний багш нарыг эрчимжүүлсэн сургалтанд хамруулахад зориулж £500,000-ийн тусламж үзүүлэх тухай зарлана. Тэрээр бусад эмэгтэй манлайлагчидтай хамтран, боловсрол охид, эмэгтэйчүүдийг чадавхжуулан дэмжихэд ямар ач холбогдолтой болох талаар хэлэлцэх юм.

Сайд Вест айлчлалын талаар: “Монгол Улс бол Их Британи улсын хувьд чухал түнш. Энэтхэг-Номхон далайн бүс нутгийн сайдын хувиар анхны гадаад айлчлалаа энэхүү гайхалтай улсаас эхлүүлж буйдаа баяртай байна. Манай хоёр улс Монголын залуусыг олон улсад өрсөлдөн өөрчлөлт авчрах зэмсэг нь боловсрол хэмээн санал нэгтэй байдаг. ‘’Дэлхийн эмэгтэйчүүдийн чуулга уулзалт’’-ын үеэр би Их Британи улс Монголын сурагчдад Англи хэл заах үйл хэрэгт хэрхэн ач холбогдол өгч буйг онцлон, нөөц бололцоо багатай сургуулиудын багш нарт зориулсан тэтгэлгийг дэмжихээ илэрхийлнэ. Бид Монгол Улстай уур амьсгалын өөрчлөлт гэх мэт олон улсад тулгарч буй асуудлууд дээр хамтран ажиллаж, хамтын түүхэн харилцаагаа үргэлжлүүлэн хөгжүүлсээр байх болно” гэжээ.

Айлчлалын үеэр Сайд Катрин Вест Монгол Улсын Гадаад харилцааны сайд Б.Батцэцэг болон Боловсролын сайд П.Наранбаяр нартай уулзан, хоёр орны хамтын ажиллагааны талаар санал солилцоно. Тэр дундаа Монголын эрчим хүчний шилжилтийг дэмжих, Британийн сэргээгдэх эрчим хүчний салбарын туршлагаас хуваалцах юм. Мөн Улаанбаатар хотын гэр хороололд хэрэгжүүлж буй ахуйн хэрэглээнээс нүүрсийг халж нарны эрчим хүч ашиглах төсөлтэй танилцана.

Их Британи улс Монгол Улстай жендерийн тэгш байдал, уур амьсгалын өөрчлөлттэй тэмцэх зэрэг олон улсад тулгарч буй асуудлуудаар хамтран ажиллаж, түншлэлээ улам бэхжүүлэх зорилготой юм. 

Эх сурвалж: Их Британийн Элчин Сайдын Яам