Рио Тинто Монгол компани НЗДТГ-тай хамтран их хотын зүрхэн хэсэг буюу ҮСАХ, бидний нэрлэж заншсанаар “Хүүхдийн парк”- ийн баруун жигүүр дэх 10.2 га газрыг ногоон байгууламж болгон тохижуулахаар ажиллаж буй билээ. 

“Паркаа хамтдаа бүтээе” төслийн багийнханд өнгөрсөн хагас жилийн хугацаанд 10,000 орчим санал хүсэлт иржээ. Рио Тинто Монгол компанийнхан санал хүсэлтэд тулгуурлан тасралтгүй ажилласны үр дүнд НОГООН цэцэрлэгт хүрээлэн байгуулах зураг төслийг боловсруулж, батлуулсан байна.

Уг төсөл нь дэлхийн өндөр хөгжилтэй хотуудын жишгээр иргэдийн амьдралын чанарыг сайжруулж эрүүл мэнд, сэтгэл зүй, нийгмийн харилцаанд эергээр нөлөөлөх, агаар орчны бохирдлыг бууруулах зорилготой гэнэ.

Энэхүү цэцэрлэгт хүрээлэнгийн 80% нь нөхөн сэргээгдэх боломжтой ногоон байгууламж, 20% нь иргэдийн чөлөөт цагаа өнгөрөөх талбай болон дасгал хөдөлгөөн хийх орчин буюу автомашингүй, хүүхдүүдэд ээлтэй, их хотын дуу чимээнээс хол байх шийдэлтэй аж.