Аз жаргалгүй ажилчид дэлхийн ДНБ-ийг 9% бууруулж чадна гэвэл итгэх үү? Өөрөөр бол тэдний ажилдаа сэтгэл ханамжгүй, оролцоо багатай ажиллаж буй нь эдийн засагт $8.9 их наядын алдагдлыг авчрах боломжтой аж. 

• Тайлан: Саяхан Gallup-с 2023 оны дэлхийн ажлын байрны судалгааг танилцуулсан бөгөөд ингэхдээ 140 орны 128,278 ажилчдыг хамруулан хөдөлмөр эрхэлж буй хүмүүсийн ажилдаа хандах хандлага эдийн засагт ямар үр нөлөө үзүүлж болохыг тооцоолсон билээ.

♾️ Хөдөлмөрийн ЭЗ ба сэтгэл ханамж

Хийж буй ажилдаа сэтгэл хангуулан байх хэрэгтэй гэдэг ч бодит байдал дээр дийлэнх хүмүүс хүсэж буй ажлаа хийж чаддаггүй бололтой. 

• 62% VS 23%: Тухайлбал, ажлын байран дээрээ оролцоотой байдаг хүмүүсийн хувь өнгөрсөн жилээс өөрчлөгдөөгүй буюу 23% байгаа бол оролцоогүй хэсгийнх нь 3 нэгж хувиар өсөж 62%-д хүрчээ.
• Зонхилох мэдрэмж: Цаашлаад, судалгаанд хамрагдсан хүмүүсийн хамгийн их буюу 41% нь өдөр тутамдаа стресстдэг, 21% нь ганцаардсан, гунигласан, уурласан мэдрэмжийг мэдэрдэг хэмээжээ. Тус үзүүлэлтийг дан ганц ажилтай холбох нь өрөөсгөл ч буцаад бүтээмжид асар их нөлөөлдөг нь лавтай.

🧐 Мэдрэмжийг нь задалъя

Ажил эрхэлж буй хүмүүст төрж буй нийтлэг мэдрэмжүүдийг бүс нутгаар нь задлан харвал, Ойрх Дорнод болон Хойд Америк стрессийн түвшингээр тэргүүлсэн бол ганцаардал, гуниг, уур бухимдлаар Өмнөд Азийн орнууд тэргүүлж буй. Харин ажилдаа оролцоотой сэтгэл хангалуун байдаг гэх өнөө 23%-ийнхан чинь Америк, Канад, Австрали, Шинэ Зеланд хавиар ажиллаж, амьдардаг байх нь. Цаашлаад судалгаанд оролцсон хүмүүсийн тал нь буюу 53% нь ажлаа солих талаар бодож, бясалгаж байгаа гэнэ ээ. 

🇲🇳 Харин Монголд

Монголчуудын ажлын байран дээрх оролцоо өнгөрсөн жилээс 3 нэгж хувиар нэмэгдэж 41% болоод буй. Тус үзүүлэлтээр Зүүн Азидаа тэргүүлсэн төдийгүй өдөр тутамдаа гуниглах мэдрэмж хамгийн өндөр байгаа байдлаараа ч тэргүүлэв. Харин уур бухимдал болон стрессийн хувьд бусад Зүүн Азийн орнуудтай харьцуулахад харьцангуй гайгүй шүү. 

Эцэст нь… Дээрх тооцооллоос харж байгаачлан хөдөлмөр эрхэлж буй хүмүүсийн ажлын байран дээрх оролцоо, сэтгэл ханамж дан ганц компанийн ашигт ажиллагаанаас давж эдийн засагт ч ихээхэн нөлөө үзүүлдэг. Сэтгэцийн эрүүл мэнд биеийн эрүүл мэндээс дутуугүй чухал шүү. Ажлаасаа ямар мэдрэмж мэдэрдгээ хааяа ч гэсэн анзаарч байгаарай. 🧖‍♀️