Дэлхийн хүнсний үнэ 2015 оноос хойших хамгийн том уналтад орлоо. Юу болоод байна? 

Индексүүд уруудсаар…  

НҮБ-ын Хүнс, хөдөө аж ахуйн байгууллагаас гаргасан хүнсний барааны үнийн индекс 2023 онд 10% буурсан аж. Уг индекс нь жижиглэнгийн үнэ гэхээсээ илүү түүхий эдийн өртгийг хянадаг. Тиймээс үнийн бууралт супермаркетууд болон хэрэглэгчдэд мэдрэгдэхэд багагүй хугацаа шаардагдаж буй. 

• Яагаад? Орос Украины асуудлаас үүдэн хурцадсан нийлүүлэлтийн асуудал арилснаар эрдэнэ шиш, улаан буудайн үнэ өнгөрсөн онд сүүлийн арван жилд байгаагүйгээрээ уруудсан аж. Улмаар үр тарианы үнийн индекс өнгөрсөн оны мөн үеэс 16.6% буурав. 
• Юуны үнэ буурав? Хүнсний үнийн индекс буурахад элсэн чихэр, ургамлын тос, махны үнийн индексийн бууралт хамгийн ихээр нөлөөлсөн байна. 
• Хаана? Яаж? Их Британид хүнсний барааны үнийн индекс огцом буурч 2022 оны 6-р сараас хойших хамгийн доод хэмжээнд хүрсэн бол Шинэ Зеландад хүнс, шатахуун, архины үнийн өсөлт удааширчээ.

Монголд юу болж байна? 

Импортоор авч буй эрдэнэ шишийн үнэ 60.8% буурсан аж. Тодруулбал, 2022 оны эхний 11 сард 1 кг эрдэнэ шишийг дунджаар $1.4-оор авдаг байсан бол 2023 оны мөн үед $0.6-оор импортолжээ. Түүнчлэн импортын улаан буудайн үнэ кг тутамд дунджаар 65.5%, овьёосных 19.1% тус тус буурсан бол пүнтүүз, шар будааны импортын үнэ өссөн байна. Ийм болохоор л дотооддоо боловсруулалтыг дэмжих хэрэгтэй байгаа юм даа. 

• 🥓 Мах ч бас: Цаашлаад харвал импортоор авч буй лаазалсан махан бүтээгдэхүүн, хиам зайдасны ч үнэ буурсан аж. Энд ярьж байгаа үнэ гаалийн үнэ гэдгийг санаарай. Лангуун дээр ирээд буурсан уу гэвэл арай өөр л байх даа. 

Энэ онд яах вэ?

Хүнсний инфляц дэлхий дахинд 1.5%-3% байх төлөвтэй байна гэнэ. Монголд ч мөн 2022 онд хөөрөгдсөн хүнсний инфляц буурч хүнсний бус инфляц өсөхөөр байгааг Монголбанкны тайлангаас харж болно. Харин 2023 онд та бидний захаас авч буй хүнсний үнэ яаж өссөнийг ЭНД-ээс уншаарай. 🍋