Райнос Инвестмент ҮЦК ХХК болон ЛэндМН ББСБ ХК хамтран “Money Talks for Women” буюу Эмэгтэйчүүдийн санхүүгийн өсөлт ба хөрөнгө оруулалт арга хэмжээг 2026 оны 5-р сарын 16-ны өдөр ITC Tower-ийн Ballroom ZU танхимд амжилттай зохион байгууллаа. Арга хэмжээний мэдээллийн түншээр Монголын Үндэсний Олон Нийтийн Радио Телевиз (MNB) дэмжин ажиллаж, олон нийтэд санхүүгийн мэдлэг, мэдээллийг түгээх ажилд хувь нэмэр орууллаа.

Тус арга хэмжээнд хөрөнгө оруулалт, бизнесээ өргөжүүлэх зорилготой 300 гаруй эмэгтэйчүүд оролцож, санхүүгийн мэдлэгээ дээшлүүлсэн ба зохион байгуулагчдаас зээлийн зохистой хэрэглээ, хөрөнгө оруулалтын зөвлөгөө авах замаар харилцан туршлага солилцож, шинэ хамтын ажиллагааны эхлэл тавих боломжийг бүрдүүлэв.

Хөтөлбөрийн хүрээнд:

МҮОНРТ-ийн Ерөнхий захирал Г.Гэрэл тус арга хэмжээг нээж, эмэгтэйчүүдийнхээ санхүүгийн зорилгодоо хүрэх аянд амжилт хүсэв. Мөн Райнос Инвестмент ҮЦК ХХК-ийн Гүйцэтгэх захирал Н.Цэвэгмид “Мөнгөө өөртөө ажиллуулъя” сэдвээр хөрөнгө оруулалт, эмэгтэйчүүдийн санхүүгийн мэдлэгийн ач холбогдлын талаар илтгэл тавьсан бол ЛэндМН ББСБ ХК-ийн Гүйцэтгэх захирал Ц.Ууганбаяр “Бизнесээ хамтдаа өсгөх нь: Санхүү, хөрөнгө оруулалтын шийдэл” сэдвээр жижиг, дунд бизнес эрхлэгч эмэгтэйчүүддээ зориулсан санхүүгийн боломж, бизнесийн өсөлтийн тухай мэдээлэл хүргэлээ.

Райнос Инвестмент ҮЦК ХХК нь 2019 оноос хойш Олон улсын санхүүгийн зах зээлээс нийт 2.0 тэрбум гаруй ам.долларын хөрөнгө оруулалтыг амжилттайгаар татан төвлөрүүлээд байгаа ба иргэдийн санхүүгийн боловсролыг дэмжих, хөрөнгөтэй дундаж давхаргыг нэмэгдүүлэх зорилгоор “Money Talks for Women” арга хэмжээг санаачилсан ба цаашид тогтмол зохион байгуулахаар төлөвлөөд байна.

Хамтран зохион байгуулагч ЛэндМН ББСБ ХК нь 2024 онд Монгол Улсын зах зээлд 100% дижитал, барьцаагүй бизнесийн зээлийн үйлчилгээг анх нэвтрүүлж, бизнес эрхлэгчдийг дэмжин ажиллаж буйг онцоллоо. Мөн 100% дижитал, барьцаагүй зээлийн үйлчилгээ болох FlexiBusiness “БАЙГУУЛЛАГА” бүтээгдэхүүнээ зах зээлд шинээр нэвтрүүлж эхэлснээ танилцууллаа.

ЛэндМН ББСБ ХК-ийн харилцагч “FlexiBusiness санхүүгийн зөв шийдэл хэрхэн хувийн бизнесийн өсөлтөд бодитой нөлөө үзүүлсэн тухай” өөрийн түүхээсээ хуваалцсан бол Райнос Инвестмент ҮЦК ХХК-ийн харилцагч “хөрөнгө оруулалтаар дамжуулан мөнгийг өөртөө хэрхэн ажиллуулсан тухай” туршлагаа хуваалцсан нь тус арга хэмжээнд хүрэлцэн ирсэн оролцогчдын сонирхлыг ихээр татжээ.

МҮОНРТ-ийн “Монголын мэдээ” сувгийн Р.Гандиймаа захирал “Эмэгтэй бизнес эрхлэгчдийн өсөлт ба санхүүгийн боломж” сэдэвт хэлэлцүүлгийн модератороор ажиллаж, санхүүгийн хүртээмж, хөрөнгө оруулалтын боломж, зээлийн зохистой хэрэглээ болон санхүүгийн мэдлэгийн ач холбогдлын талаар илтгэгчид болон оролцогчидтой нээлттэй яриа өрнүүлэв.

Мөн арга хэмжээний үеэр нийт 10 оролцогчид Райнос Инвестмент ҮЦК-ийн Гүйцэтгэх захирал Н.Цэвэгмид “Хувийн санхүүгийн зөвлөгөө авах эрх”-ийг гардуулж, санхүүгийн зорилгодоо хүрэх үйл хэрэгт нь чиглүүлэхээр болжээ.

“Money Talks for Women” арга хэмжээ нь эмэгтэйчүүдийн санхүүгийн боловсрол, хөрөнгө оруулалтын ойлголтыг нэмэгдүүлэхээс гадна бизнес эрхлэгч эмэгтэйчүүдийг харилцан туршлага солилцож, хамтран ажиллах боломжийг нээсэн арга хэмжээ болж чадлаа.

Цаашид Райнос Инвестмент ҮЦК ХХК нь хөрөнгө оруулагчид, бизнес эрхлэгчдийг дэмжих, иргэдийн санхүүгийн боловсролыг нэмэгдүүлэх зорилготой контент, арга хэмжээнүүдийг жил бүр уламжлал болгон зохион байгуулах замаар гэр бүл, хувь хүний санхүүгийн мэдлэгийг тэлэх олон сонирхолтой ажил зохион байгуулахаар төлөвлөж буйг онцоллоо.

Санхүүгийн мэдлэг бол эмэгтэйчүүдийн эдийн засгийн бие даасан байдал, ирээдүйн баталгааны үндэс юм.

📺 Арга хэмжээний үеэрх видео үзэх холбоосууд:

https://youtube.com/shorts/h8kOoQofRo0

https://youtube.com/shorts/HvNUkRD6DuI

https://youtube.com/shorts/Z2aTaehkQJ4

Эх сурвалж: ЛэндМН ББСБ ХК