Монгол Улсын Засгийн Газар 5 жилийн хугацаатай, 8.65%-ийн купонтой, $650 саяын бонд гаргалаа.  

Яагаад? 

Энэ онд Гэрэгэ бондын $800 саяыг, 2024 онд Хуралдай бондын $600 саяыг төлнө. Одоо гаргаж буй бондоор дээр дурдсан хоёр бондыг дахин санхүүжүүлэх юм. Шинэ бондын талаар дэлгэрүүлж харвал,

• Шинэ бонд: ЗГ Мягмар гарагт $650 саяын шинэ бонд босгох арилжааг олон улсын зах зээл дээр хийжээ. Бондын хүүг 11%-12% байхаар тооцоолж байсан ч 138 хөрөнгө оруулагчаас нийт $4 тэрбумын захиалга ирсэн учир бондын хүү 8.65% болж буурав. Зээлжих зэрэглэл Тогтвортой В үнэлгээтэй хэвээр байгаа нь хөрөнгө оруулагчдыг татсан бололтой. 

Нөхцөл байдал ямар байгаа вэ?

Хүндхэн нөхцөл байдалд тун дажгүй нөхцөлтэй бонд гаргах шиг боллоо. Хүндхэн нөхцөл байдал гэдэг нь... 

• Алдагдал: Монгол Улсын төсвийн тэнцэл сүүлийн 10 жилийн 9-д нь алдагдалтай гарсан. Сүүлийн 10 жилийн нийт алдагдал ₮17 их наяд буюу бүтэн 1 жилийн төсвийн орлоготой дүйж байна. 
• Өр: Манай гадаад өр өнгөрсөн оны III улиралд 10 жилийн өмнөхөөс 2.2 дахин өсөж $32.4 тэрбумд хүрсэн. Үүнийг иргэн бүрд хуваавал, 1 хүн ₮32.9 саяын өртэй болно гэсэн үг. 
• Хомсдол: Түүнчлэн гадаад валютын албан нөөц сүүлийн жилүүдэд огцом буурч, 2022 оны эцэст $3.4 тэрбум болсон нь 2021 оныхоос 22.4% буураад буй. 
• Тэгэхээр: Бид дотроо гадаад валютын нөөц багатай болж, төсвийн алдагдал нь ужгирч, өр нь нэмэгдэж, түүнийгээ төлж чадахгүй болохоороо дахиад л өр тавьж байна даа. 

Эцэст нь… ЗГ 2012 оноос хойш нийт $5.2 тэрбумын үнийн дүн бүхий 7 бонд гаргасан. Үүнээс Чингис бонд л 1,660 гаруй төслийг санхүүжүүлсэн. Харин 2016-2021 онд гарсан бондуудаар дандаа л өмнөх өрийг төлсөн байдаг. Одоо ч гэсэн бондын өрийг бондоор дарах гэж байна. Энэ тогтолцоо хэзээ өөрчлөгдөж, бондоор босгосон хөрөнгөө үр дүнтэй зарцуулах вэ?