Өнгөрсөн онд долларын ханш төгрөгийн эсрэг 21% чангарлаа. Өөрөөр хэлбэл 1 сар Netflix үзэх эрхийг 2022 оны 1-р сард ₮19.9 мянгаар авдаг байсан бол 2022 оны сүүлээр ₮24 мянгаар авдаг болсон гэсэн үг. 

Юу болов? 🔍

Ер нь бол 2022 онд төгрөгийн хүч хамгийн их суларлаа. Учир нь валютын ханшид нөлөөлөгч гадаад худалдааны тэнцэл, гадаадын шууд хөрөнгө оруулалт, валютын нөөц зэрэг хүчин зүйлс нэлээд дордов. Тодруулбал… 

• Сүүлийн 5 жилийн ёроол: Гадаад валютын албан нөөц 2022 оны 8-р сард $2.7 тэрбумд хүрсэн нь жилийн өмнөхөөс 39% буурсан төдийгүй 2017 оны 11-р сараас хойших хамгийн доод үзүүлэлт болсон. 
• Хөрөнгө оруулалт хөвөн одов: 2022 оны II улирлын байдлаар Монгол Улсад $518 саяын гадаадын шууд хөрөнгө оруулалт орж ирсэн нь жилийн өмнөхөөс 4.5%, 10 жилийн өмнөхөөс 29% буурчээ. 

Жилд 8.65% чангардаг… 

Одоогоос 10 жилийн өмнө буюу 2013 онд $1=₮1,392 байв. Харин 2022 оны сүүлд $1=₮3,444 боллоо. Сүүлийн 10 жилд долларын ханш төгрөгийн эсрэг жилд дунджаар 8.65% чангарч байна. Харин бусад валют төгрөгийн эсрэг сүүлийн 10 жилд дунджаар хэдэн хувь чангарсныг харвал,

• Евро: 6.17% 
• Иен: 5.47% 
• Юань: 7.53% тус тус чангарчээ. 

Ийм маягаар жил бүр чангарсаар чангарсаар юанийн ханш төгрөгийн эсрэг 10 жилийн өмнөхөөс 124.6% чангарч, анх удаа ₮501-д хүрээд буй.  

Гадаадын ХО

Төгрөг ийм сул байсаар байвал гадаадын хөрөнгө оруулалт Монголд орж ирэх нь юу л бол. Жишээ нь, Гадаадын хөрөнгө оруулагч Монголд доллараа төгрөг болгон хөрөнгө оруулбал жил бүр зөвхөн ханшийн алдагдал нь 8.65% байх хүлээлттэй байх нь.