Голомт банк (GLMT)-ны хоёрдогчийн арилжаа эхэлснээр МХБ дээр ₮1 их наядын үнэлгээтэй 2 компани нээлттэй арилжаалагдах болсон. Тэгвэл ₮1 их наядын үнэлгээнд анх удаа хүрсэн АПУ (APU)-гийн хувьцаа энэ сард хэр байх бол?

• Голомт капитал ҮЦК чөлөөт мөнгөн урсгалын арга (FCFE), ногдол ашиг хорогдуулах арга (DDM), харьцуулалтын арга (Relative valuation) ашиглан тэдний хувьцааг шинжилж үнэ нь ₮1,814-т хүрэх боломжтой хэмээн таамаглажээ. Харьцуулахад, ханш өнөөдрийн байдлаар ₮1,538 байна.

Яагаад?

• Зах зээлийн давамгайлал: Монголын шингэн хүнсний үйлдвэрлэлд тэргүүлэгч тэд архины ЗЗ-ийн 83%, шар айргийн ЗЗ-ийн 93%, сүүний ЗЗ-ийн 30%-ийг бүрдүүлдэг. Түүнчлэн өнгөрсөн онд хамгийн анхны ₮1 их наядын үнэлгээтэй компани болсон тэд өнгөрсөн Баасан гарагийн байдал (2022.12.16)-аар ₮1.6 их наядын үнэлгээнд хүрэв.
• Зөвхөн дотоодод биш: Тэдний экспорт 2021 онд өмнөх оноосоо Орост 220%, Хятадад 440% өсөв. Энэ нь нийт борлуулалтын 2%-ийг эзэлж байсан ба ирэх жилүүдэд 20% хүргэхээр төлөвлөж буй. Ийнхүү энэ онд Солонгост GS25-н 14,000 сүлжээ дэлгүүрүүдээр Алтан Говь шар айргийг борлуулж эхэлснээс гадна Хятадад охин компаниа байгуулжээ.
• Ногдол ашиг: АПУ 2021 онд түүхэн дээд буюу нэгж хувьцаанд ₮105-ийн ногдол ашиг тараасан нь цэвэр ашгийн 73% байсан. Энэ нь өмнөх онуудын жишиг болох 85%-114% олголтоос буурсан. Гэхдээ цар тахал, дайн, хилийн асуудлууд шийдэгдэхэд тэд ногдол ашгийн хэмжээг нэмэгдүүлэх бүрэн боломжтой. Мөн зээлийн өр, нэмэлт хөрөнгө оруулалт (CAPEX)-ийн хэрэгцээгүй зэргээс ногдол ашиг олголтыг нэмэгдүүлж ч болох гэнэ.
• Үйл ажиллагааны үр ашиг: Тэдний үйл ажиллагаа нь хэдийгээр тогтворжсон ч сүүлийн жилүүдэд зардлын үр ашигт байдлаа нэмэгдүүлж, ашигт ажиллагаагаа өсгөсөөр буй. Тухайлбал, 2017-2021 онд компанийн нийт ашгийн маржин 19%, цэвэр ашгийн маржин 12% тус тус нэмэгдэж, улмаар компанийн эздийн өмчийн өгөөж 6 дахин өсжээ.

Эцэст нь... Уг шинжилгээг дэлгэрүүлж унших бол ЭНД дарна уу.