Зээ өнөөдөр хамгийн их хувьцаа эзэмшигчтэй ТОП-10 компанийн 7-рт эрэмбэлэгддэг Ард Санхүүгийн Нэгдэл ХК (AARD)-ийн 2023 оны тайланг тоймлоё. Шарсан өндөг, чанасан кофегоо бариад тухлаад суугаарай. Тэд орлого, ашгаа хэр өсгөсөн бол? 

Ай даа, ашиг буурлаа даа

Хөрөнгө Оруулагч Үндэстэнг цогцлоох эрхэм зорилготой уг финтек нэгдэл компанийн хувьд 44 компанийн хөрөнгийг удирдаж буй. Ард Санхүүгийн Нэгдэл ХК-ийн нийт орлогыг менежментийн, хөрөнгө оруулалтын, ногдол ашгийн, хүүгийн зэрэг орлогууд бүрдүүлж байгаа. Өөрөөр бол тэд удирдлагын үйл ажиллагаагаар мөнгө олдог. 

• Муу жил байв уу? Харин компанийн тусдаа санхүүгийн тайланг харвал өнгөрсөн онд тэдний хүүгийн орлого 59.4 дахин өсөж ₮1 тэрбумын босгыг давсан ч ногдол ашгийн орлого 96% буурч ₮45 сая, менежментийн орлого нь 34% буурч ₮1.9 тэрбум болжээ. Улмаар тус компанийн цэвэр ашиг 68% буурч ₮666 сая болсон байна. 
• Хувьцаа яав? Ард Санхүүгийн Нэгдлийн хувьцааны үнэ 2023 онд 23.6% унасан. Энэ он гарснаас хойш ч мөн 12.2% унаж ₮3,026-т хүрээд буй. Харин хувьцаа эзэмшигчдийн тооны хувьд 2023 оны 1-р сард 18,890 байсан бол жилийн дотор 181-ээр нэмэгджээ.

Үнэлгээ уруудсаар

Түүнчлэн Ард Санхүүгийн Нэгдэл нь компаниудад стратегийн болон тактикийн хөрөнгө оруулалт хийдэг. Тэд нийт 19 компанид стратегийн хөрөнгө оруулалт хийсэн бөгөөд үнэлгээ нь 2023 онд өмнөх жилийнхээсээ 16% буурч ₮77 тэрбум болсон байна. Харин Үндэсний Хувьчлалын Сан, Крипто Үндэстэн ХК (CNF) болон санхүүгийн хэрэгсэлд тактикийн хөрөнгө оруулалт хийсэн бөгөөд үнэлгээ нь 314% өсөж ₮4.4 тэрбумд хүрчээ. 

Эцэст нь… Заа AARD-н 2023 он нэг иймэрхүү байлаа. Мөн өнгөрсөн онд тэд Гүйцэтгэх захирлаа сольж, бүтцийн өөрчлөлт хийсэн. Одоо энэ жил үүнийх нь үр дүн хэр байх бол гэдэг сонирхолтой байна даа.