Өнгөрсөн 7 хоногт SpaceX (SPCX) сансраас интернэтийг түгээдэг Starlink-г дараагийн шатад гаргах нэгэн мэдээг хуваалцлаа. Энэ нь Starlink Америк даяар ашиглагдах радио давтамжийн эрхийг худалдан авах тохиролцоонд хүрсэн тухай байв. 

⏰ $8 тэрбумын хэлцэл

Тодруулбал, SpaceX хөрөнгө оруулалтын Grain Management-н эзэмшдэг Америк даяарх 800 MHz-ийн радио спектрийн лицензүүдийг ойролцоогоор $8 тэрбумаар худалдан авах тохиролцоонд хүрчээ. Reuters-н мэдээлснээр, хэлцэл нь нийтдээ 14 MHz хүртэлх хосолсон давтамжийг хамрах бөгөөд Холбооны харилцаа холбооны комисс (FCC)-ийн зөвшөөрлийг хүлээж байгаа аж.

• 🛜 Энгийнээр хэлбэл, бага давтамжийн радио спектр нь дохиог хол зайд дамжуулах, барилга дотор болон саадтай орчинд хүргэхэд давуу талтай. Уг хэлцлийн үр дүнд SpaceX хиймэл дагуулын сүлжээгээ газрын дэд бүтэцтэй хослуулан, Starlink Mobile үйлчилгээгээ илүү өргөн хүрээнд хүргэх боломжтой болно.

😰 Томчуудын хар дарсан зүүд

Энэ мэдээ нь томоохон операторуудын хувьцааг эзэмшиж буй хөрөнгө оруулагчдыг түгшээсэн юм. Учир нь өнгөрсөн Баасан гарагт томоохон операторуудын хувьцаа дунджаар 9.1% унажээ. Үүнээс хамгийн өндөр бууралтыг 13.3%-ийн уналттай T-Mobile (TMUS) үзүүлсэн аж. Түүнчлэн Европын томчууд гэгддэг Deutsche Telekom (DTE.DE)-н нэгж хувьцааны үнэ 7.9%, Vodafone (VOD)-нх 5.6% тус тус унасан байна.

🛰️ Монголын сонин хачин

Starlink-н гар утсанд шууд холбогдох технологи Монголд ч нэвтрэхээр бэлтгэгдэж эхэлсэн. Өнгөрсөн 9 сарын 25-нд Харилцаа холбооны зохицуулах хороо Direct-to-Cell технологийг турших зорилгоор PLMN-ID дугаарлалтыг Мобиком Корпораци болон ЖиМобайл ХХК-д туршилтын журмаар олгожээ. 

• 🧑🏻‍🔧 Үүний хүрээнд Мобиком Корпораци Starlink-тэй хамтран mobispace үйлчилгээг нэвтрүүлэхээр төлөвлөсөн бол ЖиМобайл ч SpaceX-тэй хамтран хиймэл дагуулын сүлжээг гар утсанд шууд хүргэх үйлчилгээг нэвтрүүлэхээ мэдэгдэв.

Эцэст нь… Starlink-н хувьд энэ алхам нь хиймэл дагуулын интернэтийн үйлчилгээ үзүүлэгч байхаас гадна үүрэн холбооны зах зээлийн тоглогч болгох стратегийн нэг хэсэг юм. Үүнээс хамаарч энэ салбарын өрсөлдөөн улам бүр ширүүсгэж магадгүй байна. 🔮