Рио Тинто Монгол болон Оюу толгой компаниуд ШУТИС-тай хамтарч уул уурхайн геотехникийн бакалавр болон магистрын хөтөлбөрийг хөгжүүлнэ. 

Яагаад геотехникийн инженер гэж?

Геотехник нь энгийнээр хэлбэл хөрс, чулуулгийн массыг судалдаг ба уг мэргэжлээр төгссөн хүн барилга, гүүр зэрэг дэд бүтцийн төслүүд дээр ажиллах нь элбэг. Харин уул уурхайн геотехникийн инженерийн хувьд чулуулгийн шинж чанар, тогтворжилтыг судалж уурхайн хана, бэхэлгээний дизайныг гаргах гол үүрэгтэй аж. Геотехникийн судалгаа хийгдээгүй уурхайд хүн амиа алдах, машин техник эвдрэх гээд асар их эрсдэлтэй учир геотехникийн инженерийн үүрэг уурхайн хувьд туйлын чухал гэсэн үг. 

Ирээдүйн геотехникийн инженер танд…

2021-2022 оны хичээлийн жилийн байдлаар уул уурхайн олборлолт чиглэлээр сурч буй 1,709 оюутны 60 нь геотехникийн чиглэлээр мэргэжил эзэмшиж буй ажээ. Рио Тинто, Оюу толгой, ШУТИС гурвын хамтран хэрэгжүүлж буй геотехникийн хөтөлбөр, үүний хүрээнд 2025 он гэхэд ашиглалтад орох геотехникийн судалгааны төв зэргийн ачаар дээрх оюутны тоо өсөхөөс гадна олон улсад өрсөлдөх мэргэжилтнүүдийг бэлтгээд эхэлсэн байна. Ирэх онд Оюу толгойн гүний уурхайн үйлдвэрлэл эхлэхтэй зэрэгцэн чадварлаг геотехникийн инженерүүдийн эрэлт улам ихсэх биз ээ.