Apple (AAPL) Америкийн Виржиниа мужид иргэний үнэмлэх болон жолооны үнэмлэхээ Apple Wallet-д дижитал хэлбэрээр хадгалах функц нэвтрүүллээ. Улмаар тус муж уг функц нэвтэрсэн Америкийн 18 дахь муж болоод буй. 

👛 Apple Wallet-д хадгалж болох зүйлс 

Сонирхолтой нь $AAPL анх 2012 онд Apple Wallet-г Passbook нэртэйгээр iOS6 үйлдлийн системдээ нэвтрүүлж байв. Тухайн үед төлбөрт тооцооны функцгүй буюу онгоцны тасалбар, кино тасалбар, лоялти карт, купон хадгалах энгийн апп байжээ. Улмаар 2 жилийн дараа ApplePay хэрэглээнд нэвтэрснээр, 2015 оноос одоогийн бидний мэдэх Apple Wallet үндсэн өнгө төрхөө олсон түүхтэй. 

• ➕ Түүнээс хойш Apple Wallet-д хадгалж болох зүйлс алхам алхмаар нэмэгдсээр, 2016 оноос Токио болон Японы бусад хотын нийтийн тээврийн карт (Suica), 2020 онд CarKey буюу машины дижитал түлхүүр, 2021 онд Home Key буюу гэр, зочид буудлын түлхүүр зэргийг нэмж байв.
• 🪪 Улмаар 2022 оноос Apple Wallet-д жолооны үнэмлэх болон иргэний үнэмлэх нэмэгдсэн юм.

Товчхондоо $AAPL-н алсын хараа иргэний үнэмлэх, жолооны үнэмлэх, мөнгө, карт гэхчлэн бүрэн утгаар нь биет түрийвчийг орлох апп болгохоор зорьж ирсэн. Энэ зорилгоо ч амжилттай биелүүлж байгаа. Гол сорилт нь зарим мужид Apple Wallet дээрх иргэний болон жолооны үнэмлэхийг бүрэн хүлээн зөвшөөрөөгүй буюу зайлшгүй биет үнэмлэхүүдээ авч явахыг шаардсаар байгаа. 

⏰ Тун удахгүй

Apple ирэх 9 сарын 9-нд iPhone 18 гар утсаа танилцуулахаар болсон. Энэ удаагийн Apple-н арга хэмжээ тус компанийн шинэхэн удирдлага Жон Тернусын анхны арга хэмжээ болж буй. Гэвч ч энэ удаагийн арга хэмжээгээр шинэ гар утаснаас илүүтэй AI-г бүрэн нэвтрүүлсэн iOS27 үйлдлийн системийн шинэчлэлүүд нэлээдгүй хүлээлт үүсгэж байгаа билээ. 

• 🗂️ Тэр тусмаа iOS27 үйлдлийн систем дээр Apple Wallet 3 төрөлтэй болж байгаа сурагтай. Тухайлбал, улбар шар өнгөтэй "Standard", цэнхэр өнгөтэй “membership", ногоон өнгөтэй эвэнт болон тийз хадгалах загварууд нэмэгдэж байгаа аж. 

Эцэст нь… Одоогоор Apple Wallet-г Америкт л утгаар нь ашиглах боломжтой байгаа. Бидний хувьд E-Mongolia хэрэглээнд нэвтэрснээр анх удаа иргэний үнэмлэх, жолооны үнэмлэх гэхчлэн зайлшгүй биедээ авч явах баримт бичгүүдийг дижиталжуулж, утсан дээрээ хадгалах болсон. Юутай ч ирээдүйд Apple Wallet дээр хадгалах боломжтой бүхий л баримт бичиг, тоглолтын тасалбар гэхчлэн биет түрүүвчээс ч давсан хэрэглээтэй болох төлөвтэй.